ب / ئه‌و كاره‌كێ خه‌له‌ته دكه‌ت و نه‌يێ دورسته و بلا بزانيت ئه‌و نه دينداريا دورسته، و نه‌گرتن و كرنه ب سونه‌تا پێغه‌مبه‌رى (سلاڤێت خودێ لێ بن) چونكى بوخارى و موسلم ژ ئه‌بى مووسايێ ئه‌شعه‌رى (خودێ ژێ رازى بيت) ڤه‌دگێرن پێغه‌مبه‌رى (سلاڤێت خودێ لێ بن) گۆت: (إِنِّي واللَّهِ إِنْ شَاءَ اللَّه لاَ أَحلِفُ عَلَى يمِينٍ، ثمَّ أَرَى خَيْراً مِنهَا إِلاَّ كَفَّرْتُ عَنْ يمِيني، وأَتيْتُ الَّذي هُوَ خَيرٌ) ب راستى ب خودێ هه‌كه خودێ حه‌ز بكه‌ت، ئه‌ز سوينده‌كێ ل سه‌ر تشته‌كى ناخۆم پاشى ئه‌ز باشتر ژێ ببينم هه‌كه ئه‌ز كه‌فاره‌تا سويندا خۆ نه‌ده‌م و وێ نه‌كه‌م يا باشتر. و بلا كه‌س هزر نه‌كه‌ت مانا ل سه‌ر سويندێ ب خێرتره. به‌رێ خۆ بدێ كا پێغه‌مبه‌رآ خودێ (سلاڤێت خودێ لێ بن) د ڤێ راستێدا چ دبێژيت هه‌روه‌كى بوخارى و موسلم ڤه‌دگێرن: (لأَنْ يلَجَّ أَحَدُكُمْ في يمِينِهِ في أَهْلِهِ آثمُ لَهُ عِنْدَ اللَّهِ تَعَالى مِنْ أَنْ يُعْطى كَفَّارَتَهُ الَّتي فَرَض اللَّه عَلَيْهِ) ب خودێ ئێك ژ هه‌وه يێ رژد بيت ل سه‌ر سويندا خۆ د راستا مالا خۆدا گونه‌هكارتره ل ده‌ف خودێ كو ئه‌و (سويندا خۆ بخۆت و) كه‌فاره‌تا خودێ ل سه‌ر فه‌رزكرى بده‌ت. و خودآ مه‌زن ئه‌مر دكه‌ت:
((وَلَا تَجْعَلُوا اللَّهَ عُرْضَةً لِّأَيْمَانِكُمْ أَن تَبَرُّوا وَتَتَّقُوا وَتُصْلِحُوا بَيْنَ النَّاسِ وَاللَّهُ سَمِيعٌ عَلِيمٌ )) و سويندخوارنا خۆ ب خودێ نه‌كه‌نه هێجه‌ت و مهانه، بۆ نه‌كرنا باشيێ و پارێزكاريێ و خۆشكرنا ناڤبه‌را خه‌لكى، و خودێ يێ گوهدار و زانايه. ڤێجا يێ ركێ ل سه‌ر ڤى ره‌نگێ سويندێ دگريت ئه‌و دێ چ كه‌ت به‌رامبه‌ر ڤى ئه‌مرێ خودايى، ديسا خودێ مه‌زن د ئايه‌ته‌كا ديدا دبێژيت: ((وَلَا يَأْتَلِ أُولُو الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَىٰ وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ)) و بلا خودانێت خێر و سه‌ده‌قه و كه‌ره‌م و به‌رفره‌هيێ ئه‌وێت ده‌ست به‌رى هه‌ميان د دينێ خودێدا هه‌ى، ـ كو ئه‌بو به‌كره ـ سويند نه‌خۆن، كو قه‌نجى و خێرێ دگه‌ل كه‌س و كارێت خۆ يێت هه‌ژار و به‌لنگاز و مشه‌ختى يێت رێكا خودێ ناكه‌ن، و بلا ل وان ببۆرن و چاڤێ خۆ ژ وان بگرن و ئازا بكه‌ن، ما هه‌وه نه‌ڤێت خودێ ل هه‌وه نه‌گريت و گونه‌هێت هه‌وه ژێ ببه‌ت، و خودێ ب خۆ گونه‌ه ژێبه‌ر و دلۆڤانه. هه‌لبه‌ت ئه‌ڤ ئايه‌ته د ده‌رهه‌قێ ئه‌بو به‌كري (خودێ ژێ رازى بيت) و مسته‌حێ كورخاله‌تێ ويدا هاتبوو خوارێ ده‌مێ مسته‌حى پشكدارى دگه‌ل بێخێر و مونافقاندا كرى و نه‌جوانى د ده‌رهه‌قآ عائيشايێ ده‌يكا مه موسلماناندا ئاخفتى و ئه‌بو به‌كرى (خودێ ژێ رازى بيت) مه‌سره‌ف ل موسته‌حى دكر چونكى يآ هه‌ژار و ده‌ست كورت بى، پشتي ئه‌و پشكدارى كرى و ئه‌بو به‌كرى (خودێ ژێ رازى بيت) زاني سويند خوار ئه‌و چو نه‌ده‌تآ و هاريكاريا وى نه‌كه‌ت، پشتى وى پێغه‌مبه‌ر (سلاڤێت خودێ لێ بن) و ده‌يكا مه موسلمانان و موسلمان هه‌مى ب ئاخفتنێت خۆ ئێشاندين و ئه‌و ڤه‌گێراى يا مونافقان ژ بێبه‌ختى د راستا ده‌يكا مه موسلماناندا دگۆت، به‌لێ دگه‌ل هندێ ژى خودێ ئه‌مرێ وى و ب رێكا وى ئه‌مرێ مه هه‌ميان كر و گۆت: بلا خودانێت خێر و سه‌ده‌قه و كه‌ره‌م و به‌رفره‌هيێ سويند نه‌خۆن، كو قه‌نجى و خێرێ دگه‌ل كه‌س و كارێت خۆ يێت هه‌ژار و به‌لنگاز ناكه‌ن، و بلا ل وان ببۆرن و چاڤێ خۆ ژ وان بگرن و ئازا بكه‌ن، ما هه‌وه نه‌ڤێت خودێ ل هه‌وه نه‌گريت و گونه‌هێت هه‌وه ژێ ببه‌ت، پشتى ئه‌بو به‌كرى (خودێ ژێ رازى بيت) ئه‌ڤ ئايه‌ته گولێ بووى گۆت: به‌لێ يا خودێ من دڤێت گونه‌هێت من بێنه ژێبرن، و جابا موسته‌حي هنارت و گۆت: من قه‌بويلكر يا خودێ ئينايه خوارێ سه‌رسه‌رێ من و سه‌ر چاڤێت من و كا چ د دايێ هه‌ر ئه‌و بۆ دانا و به‌رده‌وامى دايێ و سويندا خۆ شكاند و كه‌فاره‌تا سويندا خۆ دا. ئها دڤێت ئه‌م د هۆسابين و هۆسا سه‌ره‌ده‌ريێ دگه‌ل ڤان ره‌نگێت سويندان بكه‌ين و خۆ ژ خێرێ نه‌ده‌ينه پاش ب هێجه‌تا سويندێ، رێك يا هه‌ي سويندا خۆ بشكێنه و خێرێ بكه و خۆ ژ خێرێ نه‌ڤه‌گره و كه‌فاره‌تا سويندا خۆ بده، و خودێ چێتر دزانيت.
