ب / ده‌ستپێكێ دڤێت ئه‌م بزانين پێغه‌مبه‌رى (سلاڤێت خودێ لێ بن) نه‌هيا ژ سويندخوارنێ كرى ب هه‌ر چێكريه‌كێ هه‌بيت، وه‌كى پێغه‌مبه‌رى و ملياكه‌تان و ئه‌سمانى و ب باب و باپيران و ب ژيان و گيان و جان و سه‌رى و نيعمه‌تێت حاكمى و ئاخا بێڤانى و ب ئه‌مانه‌تى، و يێ سويندێ بخۆت دڤێت سويندێ ب خودێ و ناڤێت وى و ب سالۆخه‌تێت وى ب تنێ بخۆت، و هه‌ركه‌سێ سويندێ ب تشته‌كێ دى بخۆت پێغه‌مبه‌ر بيت، ملياكه‌ت بيت، گۆرێ بێڤاني بيت، ب سه‌رێ خۆ بيت، ب سه‌رێ ده‌يبابان بيت، ب سه‌رێ هه‌ركه‌سێ هه‌بيت، ب گيان و جانێ فلانى و بێڤانى بيت، نه‌دورسته و حه‌رامه، و دڤێت ل خۆ بزڤريت و تۆبه بكه‌ت. پێغه‌مبه‌ر (سلاڤێت خودێ لێ بن) هه‌روه‌كى بوخارى و موسلم ژ ئبن عومه‌رى ڤه‌دگوهێزن، دبێژيت: (إِنَّ اللَّه تَعالى ينْهَاكُمْ أَنْ تَحْلِفُوا بابائِكُمْ، فَمَنْ كَانَ حَالِفاً، فلْيحْلِفْ بِاللَّهِ، أَوْ لِيصْمُتْ) ب راستى خودايێ مه‌زن نه‌هيا هه‌وه دكه‌ت هوين ب بابێت خۆ سويند بخۆن، هه‌ركه‌سێ سويند خوار بلا ب خودێ سويند بخۆت يان خۆ بێ ده‌نگ بكه‌ت. و د ريوايه‌ته‌كا ديدا يا د سه‌حيحێدا دبێژيت: (فمنْ كَانَ حَالِفاً، فَلا يحْلِفْ إِلاَّ بِاللَّهِ، أَوْ لِيسْكُتْ) هه‌ركه‌سێ سويند خوار بلا ب خودێ پێڤه‌تر سويند نه‌خۆت يان خۆ بێ ده‌نگ بكه‌ت. ديسا پێغه‌مبه‌رێ خودێ (سلاڤێت خودێ لێ بن) د ڤه‌گێرا موسلميدا ژ ئبن سه‌موره دبێژيت: (لا تحْلِفوا بِالطواغِي، ولا بابائِكُمْ) نه ب بوتان (سه‌نه‌مان) نه ب بابێت خۆ سويند نه‌خۆن. و ژ ئبن عومه‌رى، خودێ ژ هه‌ردوويان رازى بيت، وى گول زه‌لامه‌كى بوو دگۆت: نه ئه‌ز ب كه‌عبێ كه‌مه ئبن عومه‌رى گۆتێ: ب غه‌يرى خودێ سويند نه‌خۆ، ب راستى من گول پێغه‌مبه‌رێ خودێ بوو (سلاڤێت خودێ لێ بن) گۆت: (منْ حلفَ بِغَيْرِ اللَّهِ، فَقدْ كَفَر أَوْ أَشرْكَ) هه‌ركه‌سێ سويند ب ژبلى خودێ خوار ئه‌و گاور بوو يان هه‌ڤپشك چێكر. زانا دبێژن: گاور بوو يان هه‌ڤپشك چێكر، بۆ دياركرنا مه‌زناتيا گونه‌هێيه هه‌روه‌كى پێغه‌مبه‌رێ خودێ (سلاڤێت خودێ لێ بن) گۆتى: رويمه‌تى شيركه. و هه‌كه ب خه‌له‌تيڤه ئێكى ب غه‌يرى خودآ سويند خوار دێ چ كه‌ت، دڤێت بێژيت: لا إله إلا الله وحده لا شريك له، له الملك وله الحمد وهو على كل شيء قدير و سه‌ر ملێ خۆ يێ چه‌پێ سێ جاران تفكه‌ت و بێژيت: اعوذ بالله من الشيطان الرجيم.
و يێ ڤێ سويندێ بخۆت و پاشى پێگريێ نه‌كه‌ت و ئاخفتنا خۆ بشكێنيت كه‌فاره‌تا سويندێ ناده‌ت چونكى ئه‌و ئاخفتنا ژێ ده‌ركه‌فتى: ب سه‌رێ بابێ خۆ، ب كه‌عبێ، ب هه‌رتشتكێ دى.. نه ناڤ و نه سالۆخه‌تێ خودێ يه، سويند ناهێته هه‌ژمارتن، و هه‌رگاڤا ئاخفتنا خۆ شكاند كه‌فاره‌تێ ناده‌ت و د هه‌مى كراساندا يێ ڤێ سويندێ بخۆت يێ گونه‌هكاره بشكێنيت يان نه‌شكێنيت، و خودێ چێتر دزانيت.
