ب / زانا هه‌مى ئێكن كه‌فاره‌ت ل سه‌ر مرۆڤى ناكه‌ڤيت و واجب نابيت هه‌تا سويند نه‌هێته شكاندن و يێت ژێك جودابووين كا دورسته به‌رى سويند شكاندنێ بێته‌دان.
ل ده‌ف جمهورێ زانايان دورسته كه‌فاره‌ت به‌رى سويند شكاندنێ بێته دان و پشتى وێ ژى، به‌لگه ل سه‌ر دورستيا پێشئێخستنا كه‌فاره‌تێ ل سه‌ر سويندێ پێغه‌مبه‌ر (سلاڤێت خودێ لێ بن) هه‌روه‌كى موسلم ژ ئه‌بى هوره‌يره (خودێ ژێ رازى بيت) ڤه‌دگێريت، دبێژيت: (منْ حلَف عَلَى يمِينٍ فَرأَى غَيْرَهَا خَيْراً مِنْهَا، فَلْيُكَفِّرْ عَنْ ێمِينِهِ، ولْيفْعَلْ الَّذي هُوَ خَيْرٌ) هه‌ركه‌سێ سويند ل سه‌ر تشته‌كى خوار، و ئێكا دى ديت چێتره، بلا كه‌فاره‌تا سويندا خۆ بده‌ت، و بلا يا ب خێر و چێتر بكه‌ت. و ديسا پێغه‌مبه‌ر ب خۆ ژى يێ هۆسابى، بوخارى و موسلم ژ ئه‌بى مووسايێ ئه‌شعه‌رى (خودێ ژێ رازى بيت) ڤه‌دگێرن پێغه‌مبه‌رى (سلاڤێت خودێ لێ بن) گۆت: (إِنِّي واللَّهِ إِنْ شَاءَ اللَّه لاَ أَحلِفُ عَلَى يمِينٍ، ثمَّ أَرَى خَيْراً مِنهَا إِلاَّ كَفَّرْتُ عَنْ يمِيني، وأَتيْتُ الَّذي هُوَ خَيرٌ) ئه‌ز ب خودێكه‌م هه‌كه خودێ حه‌زكه‌ت، ئه‌ز سوينده‌كێ ل سه‌ر تشته‌كى ناخۆم پاشى ئه‌ز باشتر ژێ ببينم هه‌كه ئه‌ز كه‌فاره‌تا سويندا خۆ نه‌ده‌م و وێ نه‌كه‌م يا باشتر.
و به‌لگه ل سه‌ر دورستيا پاشئێخستنا كه‌فاره‌تێ، پێغه‌مبه‌ر (سلاڤێت خودێ لێ بن) هه‌روه‌كى بوخارى و موسلم ژ عه‌بدولره‌حمانێ كورێ سه‌موره‌ى (خودێ ژێ رازى بيت) ڤه‌دگێرن، دبێژيت: (وَإِذا حَلَفْتَ علَى يمِينٍ، فَرَأَيْت غَيْرَها خَيْراً مِنهَا، فأْتِ الَّذي هُوَ خَيْرٌ، وكفِّرْ عن يمِينك) و هه‌كه ته سويند ل سه‌ر تشته‌كى خوار و ته ديت، ئێكا دى چێتره، وه‌ره وێ يا ب خێر و چێتر و كه‌فاره‌تا سويندا خۆ بده.
هه‌رچه‌نده ئه‌بو حه‌نيفه (خودێ ژێ رازى بيت) دبێژيت: كه‌فاره‌ت نه‌يا دورسته هه‌تا سويند نه‌هێته خوارن به‌لێ بۆچۆنا جمهورآ ب هێزتر و دورستتره، و خودێ چێتر دزانيت.
