ب / نه‌زر د بنياتدا دڤێت ب وى تشتى بيت يێ نێزيكبوونا خودێ تێدا، وه‌كى تو بێژى ل سه‌ر من نه‌زر بيت ئه‌ز فلان تشتى بكه‌مه خێر يان بچمه حه‌جێ يان رۆژيا بگرم و هۆسا، به‌لێ هه‌كه تشته‌كێ ئاسايى ل سه‌ر خۆ كره نه‌در وه‌كى ئه‌ڤێت د پسيارێدا هاتين كا دبيته نه‌زر و دڤێت پێگرى پێ بێته‌كرن و بێته ب جهئينان؟ جهێ نه‌لێكيێيه د ناڤبه‌را زاناياندا، جمهورێ زانايان دبێژن وى تشته‌كێ موباح ل سه‌ر خۆ كره نه‌زر و ئه‌و يێ ب كه‌يفا خۆيه ڤيا بلا ب جه بينيت و ڤيا بلا ب جه نه‌ئينيت و ئه‌ڤه نابيته نه‌زر، چونكى ئه‌و تشتێ نێزيكبوونا خودێ تێدا ل سه‌ر خۆ نه‌زر نه‌كريه و هه‌كه ب جه نه‌ئينا چو كه‌فاره‌ت ل سه‌ر نينه، به‌لگه يێ جمهورى حه‌ديسا بوخاريه ژ ئبن عه‌باسى ڤه‌دگێريت خودآ ژ هه‌ردوويان رازى بيت دبێژيت: (بيْنما النَّبِيُّ صَلّى اللهُ عَلَيْهِ وسَلَّم يخْطبُ إِذا هُوَ بِرجُلٍ قَائِمٍ، فسأَلَ عَنْهُ فَقَالُوا: أَبُو إِسْرائيلَ نَذر أَنْ يقُومَ فِي الشَّمْس وَلا يقْعُدَ، ولا يستَظلَّ ولا يتَكَلَّمَ، ويصومَ، فَقالَ النَّبِيُّ صَلّى اللهُ عَلَيْهِ وسَلَّم: « مُرُوهُ فَلْيتَكَلَّمْ ولْيستَظلَّ ولْيُتِمَّ صوْمَهُ) پێغه‌مبه‌رى (سلاڤێت خودێ لێ بن) خوتبه دخواند زه‌لامه‌ك ديت يێ شپياڤه، پسيارا وى كر، گۆتن: ئه‌و ئه‌بو ئيسرائيله، يێ نه‌زركرى ل به‌ر رۆژێ راوه‌ستيت، و نه‌روينيته خوارێ، و نه‌چيته بن سيبه‌رێ، و نه‌ئاخڤيت و يێ ب رۆژى بيت، پێغه‌مبه‌رى (سلاڤێت خودێ لێ بن) گۆت: ئه‌مرێ وى بكه‌ن بلا باخڤيت، و بچيته به‌ر سيبه‌رێ و رۆژيا خۆ ببه‌ته سه‌رى. و د ڤه‌گێرا ئه‌يمام ئه‌حمه‌ديدا هاتيه ژ عه‌مرێ كورێ شوعه‌يبى ژ بابێ خۆ ژ باپيرێ خۆ (أَنَّ رَسُولَ اللَّهِ (سلاڤێت خودێ لێ بن) نَظرَ إلى أعرابي قَائِماً في الشَّمْسِ وهو يخْطبُ فقال ما شَأْنُكَ قال نَذرْتُ يا رَسُولَ اللَّهِ ان لاَ أَزَالَ في الشَّمْسِ حتى تَفْرُغَ فقال رسول اللَّهِ (سلاڤێت خودێ لێ بن) ليس هذا نَذراً إنما النَّذرُ ما ابْتُغِى بِهِ وَجْهُ اللَّهِ عز وجل) پێغه‌مبه‌رێ خودێ (سلاڤێت خودێ لێ بن) به‌رێ خۆ دا كۆچه‌ره عه‌ره‌به‌كى شپياڤه يێ راوه‌ستياي بوو و وى خوتبه دخواند، پێغه‌مبه‌رى (سلاڤێت خودێ لێ بن) گۆتێ ته خێره؟ گۆت: يا پێغه‌مبه‌رێ خودێ من يا نه‌زركرى ئه‌ز به‌ر رۆژێ يێ راوه‌ستايبم هه‌تا تو خوتبێ ب دويماهى دئينى، ئينا پێغه‌مبه‌رى (سلاڤێت خودێ لێ بن) گۆت: ئه‌ڤه نه‌نه‌زره.. نه‌زر به‌س ئه‌وه رازيبوونا خودێ پێ بێته خواستن. و ل ده‌ف ئيمام ئه‌حمه‌د (خودێ ژێ رازى بيت) ئه‌ڤ ره‌نگه ل سه‌ر خۆ ئێخستنه نه‌زره و دڤێت پێگريێ پێ بكه‌ت و هه‌كه نه‌كر دڤێت كه‌فاره‌تێ بده‌ت، و به‌لگه‌يێ وى ژى ڤه‌گێرا ئبن حه‌بانه ژ عه‌بدوللايێ كورێ بوريده‌ى (خودێ ژێ رازى بيت) ڤه‌گێراى دبێژيت: ژنه‌كێ ـ پشتى پێغه‌مبه‌ر (سلاڤێت خودێ لێ بن) ژ غه‌زوه‌كا خۆ زڤري ـ گۆته پێغه‌مبه‌رى: يا پێغه‌مبه‌رێ خودێ.. من يا ل سه‌ر خۆ نه‌دركرى هه‌كه خودێ تو ب سلامه‌تى ڤه‌گێراندى ئه‌ز ده‌فێ ل هنداڤ سه‌رێ ته لێ بده‌م، پێغه‌مبه‌رى (سلاڤێت خودێ لێ بن) گۆتآ هه‌كه ته نه‌در كربيت بكه و هه‌كه نه.. نه، گۆت: ب راستى من يا نه‌دركرى، ئينا پێغه‌مبه‌ر (سلاڤێت خودێ لێ بن) روينشته خوارێ وێ ده‌ف لێدا و پێغه‌مبه‌رى (سلاڤێت خودێ لێ بن) نه‌گۆتێ پێدڤى ناكه‌ت، چونكى تشته‌كێ موباح ل سه‌ر خۆ نه‌زركريه، به‌لێ ئه‌م دشێين بێژين هه‌كه موباح ئنيه‌تا نێزيكبوونا خودێ چۆ تێدا هنگى دێ بيته نێزيكبوون تو ده‌فێ لێ ب ده‌ى بۆ زه‌وق تشته‌كه و ژبه‌ر سه‌ركه‌فتنا موسلمانان و ڤه‌گه‌ريانا پێغه‌مبه‌رێ خودێ ب سلامه‌تى و سه‌ركه‌فتى تشته‌كێ ديه. ژبه‌ر هندێ ئه‌ز دبينم بۆچۆنا جمهورى بهێزتره، و خودێ چێتر دزانيت.
