ب / نه‌زرا دورست ئه‌وه يا بێ مه‌رج و هه‌ر ژ ده‌ستپێكێ كاره‌كێ خودێ پێخۆش و پێ رازى و نێزيكبوونا وى تێدا ل سه‌ر خۆ بێخيت، وه‌كى بێژيت: سه‌ره‌ك ل سه‌ر من خێر بيت، ختمه‌كا قورئانێ ل سه‌ر من خێر بيت، گرتنا هنده رۆژيان ل سه‌ر من خێر بيت و هۆسا.. ڤى ره‌نگێ نه‌زرێ دڤێت پێگريێ پێ بكه‌ت و ب جه بينيت، و ئه‌ڤه ئه‌وه يا پێغه‌مبه‌رى (سلاڤێت خودێ لێ بن) د ده‌رهه‌قيدا گۆتى هه‌روه‌كى ژ ده‌ف بوخارى هاتى: ((مَنْ نَذرَ أن يُطيع اللَّه فَلْيُطعْهُ))، به‌لێ هه‌كه ب مه‌رجه‌كيڤه گرێدا وه‌كى بێژيت: هه‌كه ته سلامه‌تى دا بچويكێت من سه‌ره‌ك ل سه‌ر من نه‌زر بيت ڤى ره‌نگآ نه‌زرێ هه‌كه هات وه‌كى وى مه‌رجكرى هنگى دڤێت نه‌زرێ ب جهبينيت و هه‌كه نه نه‌زر ل سه‌ر نينه به‌لێ ئه‌ڤ نه‌زره نه‌هيا ژێ هاتيه‌كرن و باراپتر ژ زانايان دبێژن: ئه‌ڤ ره‌نگه نه‌زره يێ مه‌كروهه و دگه‌ل هندێ ژى هه‌كه وه‌كى وى ڤيايي چآ بوو دڤێت نه‌زرا خۆ ب جه بنيت. بۆچى يێ مه‌كروهه؟! چونكى پێغه‌مبه‌ر (سلاڤێت خودێ لێ بن) د راستا ڤى نه‌زريدا هه‌روه‌كى موسلم ژ ئبن عومه‌رى (خودێ ژێ رازى بيت) ڤه‌دگێريت، دبێژيت: (أَنَّهُ نهى عن النَّذرِ وقال إنه لا يأتِي بِخَيْرٍ وَإِنَّمَا يُسْتَخْرَجُ بِهِ من الْبَخِيلِ) پێغه‌مبه‌رى (سلاڤێت خودێ لێ بن) نه‌هيا ژ نه‌زرى كرى ـ هه‌لبه‌ت يێ مه‌رجكرى ـ و گۆت: نه‌زر چو خێرێ نائينيت به‌س پێ ژ به‌خيلى ده‌ردكه‌ڤيت. ئانكو ژبه‌ر وێ نه‌زرێ ئه‌ڤ ماله ژ به‌خيلى ده‌ركه‌فت هه‌كه ئه‌و نه‌زر نه‌با ئه‌و مال ژى ژێ نه‌ده‌ردكه‌فت.
و ئه‌گه‌رێ مه‌كروهيا ڤى ره‌نگێ نه‌زرێ دزڤريته دوو ئه‌گه‌ران:
ئێك: كرنا كريارا رازيبوونا خودێ تێدا ب مفايێ كه‌سايه‌تيڤه د هێته گرێدان، و كرنا وى كارى ل سه‌ر هندێ دراوه‌ستينيت هه‌كه تشتێ ڤيايى و خواستى چێ بوو دێ نه‌زرێ خۆ ده‌ت، و هه‌كه تشتێ خواستى نه‌چێ بوو ناكه‌ت، ئه‌ڤه ره‌وشتێ چوريك و قه‌لس و به‌خيليه هه‌روه‌كى زمانحالێ وى دبێژيت: يا خودێ ئه‌ز تشتێ رازيبوون و نێزيكبوون تێدا ناكه‌م هه‌تا تو بۆ من ڤى كارى نه‌كه‌ى و هه‌كه ئه‌ز ته‌نگاڤ و مه‌جبور و نه‌چار نه‌ببامه هه‌ر د بنيرِا من ئه‌ڤ كاره نه‌دكر، ئه‌رێ ئه‌ڤه يا جوانه ئه‌م دگه‌ل خودێ بكه‌ين؟!
دوو: دا هنده نه‌زان وێ هزرێ نه‌كه‌ن ئه‌ڤ كاره ب نه‌زرێ بۆ چێ بوو و هه‌كه نه‌زر نه‌كربا نه‌چێ دبوو يان هزر بكه‌ت خودێ نه‌ساخێ وى يان داخوازا وى بۆ ب جه نائينيت هه‌تا ئه‌و تشتێ به‌رامبه‌ر ب خودێ نه‌بێژيت، چونكى پێغه‌مبه‌ر (سلاڤێت خودێ لێ بن) دبێژيت: ((نه‌زر قه‌ده‌رێ ناده‌ته پاش)) موسلم ژ ئه‌بو هوره‌يره (خودێ ژێ رازى بيت) ڤه‌دگێريت، دبێژيت: پێغه‌مبه‌رى (سلاڤێت خودێ لێ بن) نه‌هيا ژ نه‌زرێ كرى، و گۆت: ب راستى ئه‌و چو ژ قه‌ده‌رێ ناده‌ته پاش (أَنَّهُ نهى عن النَّذرِ وقال إنه لا يرُدُّ من الْقَدَرِ).
و ئه‌ڤ هه‌ردوو هزره ئێك ژ ئێكێ خه‌له‌تتره، و ئبن حه‌جه‌ر (خودێ ژێ رازى بيت) د فه‌تحێدا دبێژيت: هزرا ئێكێ يا خه‌له‌ته و يا دووێ نێزيكى گاوريێيه، و قورتبى د ته‌فسيرا خۆدا دبێژيت: هه‌كه نه‌زركرنا مه‌رجكرى ب ڤێ هزرێ بيت يا حه‌رامه و هه‌كه ب ڤێ هزرێ نه‌بيت يا مه‌كروهه، و خودێ چێتر دزانيت.
