ب : به‌ری ئه‌م پسیارا چاوانیا قوربان به‌لاڤكرنێ بكه‌ین فه‌ره ئه‌م رامانا سه‌ره‌كی ژ قوربانی بزاینن، رامانا سه‌ره‌كی ژێ ساخكرنا بیرئینانا ئیبراهیم پێغه‌مبه‌ر و كورێ وییه سلاڤێت خودێ ل سه‌ر هه‌ردویان بیت، ده‌مێ خودایێ مه‌زن فه‌رمانا وی كری كورێ خۆ سه‌ر ژێكه‌ت، و وی و كوری خۆ راده‌ستی فه‌رمانا خودایێ خۆ كرین و پێگری پێ كری، ڤێجا قوربان دڤێت ڤێ رامانێ ل ده‌ف مه په‌یداكه‌ت، به‌ر فه‌رمانا خودایێ مه‌زن راوه‌ستیایی بین وب جھ بینین و خۆ راده‌ستی هه‌می فه‌رمانێت خودێ بكه‌ین، یێ هوسا بیت ئه‌و رامانا قوربانی تێگه‌هشت، و یێ هوسا نه‌بیت بلا سه‌د قوربانان بده‌ت ئه‌و راما قوربان دانێ تێنه‌گه‌هشت، و ئارمانجا سه‌ره‌كێ ژ قوربان دانێ ب جھ نه‌ئینا، و ئارمانجا نه‌سه‌ره‌كی ژ قوربان دانێ هاریكاریكرنا هه‌ژارانه و به‌لاڤكرنا كوژتییه ل سه‌ر ده‌ست كورت و هه‌ژاران، و به‌لاڤكرنا وی ب ڤی ره‌نگییه گه‌له‌ك زانا و ژوان حه‌نه‌فی و حه‌نبه‌لی باش ددانن قوربان ببیته سێ پشك خودانێ قوربانی و مالا وی پشكه‌كێ بۆ خۆ راكه‌ت و پشكه‌كه‌كێ بكه‌ته خێر و ب ده‌ته ده‌ستكورت و هه‌ژاران، و پشكه‌كێ ب كه‌ته دیاری بۆ هه‌ڤال و كه‌س و كار و جیرانان، بلا د زه‌نگین ژی بن، به‌لێ ل ده‌ف شافعیان باشتر ئه‌وه هه‌می قوربانێ خۆ بكه‌ته خێر و كێمه‌ك نه‌بیت بۆ خۆ راكه‌تو بخوت ئانكو پشكه‌كا كێم، و ل ده‌ف مالكیان نه‌هاتیه ده‌ستنیشانكرن كا چه‌ندێ بخوت و چه‌ندێ بكه‌ته خێر و سه‌ده‌قه و چه‌ندێ ب كه‌ته دیاری ئه‌و یێ بكه‌یفا خۆ یه و به‌لگه‌یێ وی ژی گۆتنا خودێیه ده‌مێ دبێژیت: (فَكُلُواْ مِنْهَا وَأَطْعِمُواْ الْبَآئِسَ الْفَقِيرَ) ھوین ژێ [ژ قوربانان] بخۆن، و ژێ بدەنە ژارێ دەست تەنگ و پێغمبه‌ر سلاڤێت خودێ ل سه‌ربن دبێژیت : (فكلوا وادِّخِروا وتصدَّقوا) ژ قوربانی بخۆن و راكه‌ن و بكه‌نه خێر، و پتریا زانایان ل سه‌ر هندێینه یا باش ئه‌وه خودانێ قوربانێ تشته‌كێ ژێ بخوت و هه‌كه ژێ نه‌خوار و هه‌می كره خێر دورسته، و بوچانا ب هێزتر ئه‌وه باشه قوربان ببیته سێ بشك بشكه‌ك بۆ دیاریان و پشكه‌ك بۆ خێران و پشكه‌ك بۆ خودانێ قوربانی و مالا وی، و ئه‌ڤه بوچونا ئبن عه‌باس و ئبن عومه‌ر و ئبن مه‌سعودییه خودێ ژ هه‌میان رازی بیت و هه‌روه‌كی د موغنییدا هاتێ بوچونا جودا بۆ وان ژ صه‌حابان نه‌هاتیه زانین و خودێ چیتر دزانیت.
