ب : هه‌می زانا ئێكن شه‌ڤا عه‌ید نه ده‌مێ ڤه‌كوژتنا قوربانییه و ده‌مێ ڤه‌كوژتنا قوربانی پشتی كرنا نڤێژا جه‌ژنێ ده‌ستپێدكه‌ت و دل دویف بوچونا ب هێزتر دكێشیت هه‌تا رۆژا چارێ ژ جه‌ژنێ، رۆژا سێیێ ژ رۆژێت ته‌شریقێ، هه‌تا رۆژ ئاڤا بوونێ، و پشتی رۆژ ئاڤا دبیت ده‌مێ وێ ب دویماهیك دهێت، به‌لێ كا د شه‌ڤێت ڤان رۆژاندا دورسته قوربان بێته ڤه‌كوژتن یان نه ئه‌ڤ دناڤبه‌را زانایاندا جهێ نه لێكیێیه، ل ده‌ف مالكیان و د ڤه‌گێره‌كێدا ژ حه‌نبه‌لیان شه‌ڤ نه‌ده‌مێ قوربان ڤه‌كوژتنێیه و هه‌ركه‌سێ ب شه‌ڤ ڤه‌كوژیت قوربان بۆ ناهێته حسێبكرن، و ل ده‌ف شافعیان و د ڤه‌گێرا دورستردا ژ حه‌نبه‌لیان و ئیسحاق و ئه‌بو سه‌ور مه‌كروهه و هه‌كه ب شه‌ڤ هاته ڤه‌كوژتن نه‌باشی هاته‌كرن به‌لێ قوربان حسێبه، و ل ده‌ف شافعیان ژ مه‌كروهی ناهێته هه‌ژمارتن هه‌كه هه‌وجه‌یێ ب خازیته گیروكرنا ڤه‌كوژتنا شه‌ڤێ وه‌كی نه‌گه‌هیت یان فه‌قیر و ژار ب شه‌ڤ پتر یێت مه‌وجود بن و بوچونا دویێ ب هێزتره چونكی به‌لگه‌یێ تیما ئێكێ حه‌دیسه‌كه طه‌به‌رانی ژ ئبن عه‌باس خودێ ژێ رازی بیت ڤه‌گێرایه دبێژیت پێغه‌مبه‌ر سلاڤێت خودێ ل سه‌ربن دبێژیت: (أَنَّهُ صَلَّى اللَّهُ عَلَيْهِ وَسَلَّمَ نَهَى عَنْ الذَّبْحِ لَيْلا) ئه‌ڤه دا ئاخفتنێ ئێك لاكه‌ت هه‌كه یا دورستبا به‌لێ یا له‌وازه و پشت پێ ناهێته به‌ستن ژ به‌ر هندێ باشتر ئه‌وه ب رۆژ بێته ڤه‌كۆژتن و هه‌كه ب شه‌ڤ ژی هاته ڤه‌كوژتن دورسته و هه‌كه هه‌وجه‌یێ هه‌بیت بۆ شه‌ڤێ گیروببیت مه‌كروهیه‌ت ژی نا مینیته تێدا و خودێ چێتر دزانیت.
