ب / پێدڤيه ئه‌م بزانين دڤێت مرۆڤ چو جاران ژ ره‌حم و دلۆڤانيا خودێ بێ هيڤى نه‌بيت، پێغه‌مبه‌رێ خۆشتڤى (سلاڤێت خودێ لێ بن) دبێژيت: هه‌كه مرۆڤێ گاور و بێ باوه‌ر زانيبا دلۆڤانيا خودێ چه‌نده ئه‌و چو جاران ژێ بێ هيڤى نه‌دبوو، به‌لێ به‌رامبه‌ر دڤێت ئه‌م گه‌له‌ك ژ ئيزا و كه‌ربا خودێ ژى پشتراست نه‌بين.
ديسا پێغه‌مبه‌رێ خودێ (سلاڤێت خودێ لێ بن) دبێژيت: هه‌كه مرۆڤێ موسلمان و باوه‌ردار زانيبا كا ئيزا و كه‌ربا خودێ چه‌نده چو جار ژێ پشتراست نه‌دبوو، ڤێجا دڤێت موسلمان د ناڤبه‌را پشتراستبوون و بێ هيڤيێدا بيت، نه‌يێ پشتراست بيت و نه‌يێ بێ هيڤى بيت، نه‌پشتراستى دا وێ دۆمێ نه‌ده‌ته كارێ خه‌له‌ت و زوى بزڤريت و نه‌بێ هيڤياتى دا به‌رده‌وام ده‌رگه‌هێ تۆبا و زڤرينێ بقوتيت هه‌رگاڤا خه‌له‌ت بوو و هه‌لنگفت، هه‌رگونه‌هكا هه‌بيت به‌س مرۆڤ د تۆبا خۆدا يێ راست بيت خودێ دێ ژێبه‌ت و ل مرۆڤى ناگريت به‌لێ هه‌كه تۆبه ياراست و دورست بيت و دره‌و تێدا نه‌بيت و تۆبه‌كا وێنه‌يى و شه‌كلى نه‌بيت، خودآ مه‌زن دبێژيت: ((قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ))هه‌ى به‌نده‌يێت من، هه‌ى ئه‌وێت هه‌وه زێده گونه‌ه كرين و هه‌وه د كرنا گونه‌هاندا، دايه سه‌ر هه‌مى تخويبان، ژ دلۆڤانيا خودێ بێ هيڤى نه‌بن، ب راستى خودێ ل هه‌مى گونه‌هان دبۆريت، و هه‌مى گونه‌هان ژێ دبه‌ت، ب راستى ئه‌وه گونه‌هـ ژێبه‌ر و دلۆڤانه. و خودێ مه‌زن هه‌روه‌كى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((خودێ مه‌زن ده‌ستێ خۆ ب شه‌ڤ ڤه‌دكه‌ت، دا گونه‌هكارێ رۆژێ (بۆ خۆ تێدا) تۆبه بكه‌ت، و ب رۆژ ده‌ستێ خۆ ڤه‌دكه‌ت، دا گونه‌هكارێ شه‌ڤێ (بۆ خۆ تێدا) تۆبه بكه‌ت. ئانكو يێ ب شه‌ڤ تۆبه بكه‌ت يان ب رۆژ تۆبه بكه‌ت خودێ دێ تۆبا وى قه‌بويلكه‌ت. و ده‌رگه‌هێ تۆبێ يێ ڤه‌كريه و ناهێته‌گرتن هه‌تا مرۆڤ نه‌كه‌ڤيته د سه‌كه‌راتيدا يان رۆژا قيامه‌تێ بهێت يان رۆژ ل جهێ ئاڤابوونێ بهه‌لێت. د ڤان راماناندا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((هه‌ركه‌سێ به‌رى رۆژ ژ رۆژهه‌لاتێ بهه‌لێت تۆبه بكه‌ت، خودێ تۆبا وى قه‌بويل كر)). ديسا دبێژيت: خودايێ هه‌ر ب هێز و مه‌زن، تۆبا به‌نده‌ى قه‌بويل دكت هندى نه‌كه‌ڤيته د سه‌كه‌راتێدا. و د حه‌ديسه‌كا قودسيدا پێغه‌مبه‌ر (سلاڤێت خودێ لێ بن) ژ خودێ خۆ دبێژيت: ((خودايێ بلند گۆت: يا كورێ ئاده‌مى ب راستى هندى تو دوعا ژ من بكه‌ى و هيڤيا ژ من بكه‌ى دێ گونه‌هێت ته بۆ ته ژێ به‌م دگه‌ل وێ يا ل ده‌ف ته (ئانكو دگه‌ل وان گونه‌هێت تو دكه‌ى) و من خه‌م پێ نينه (و ل ده‌ف من ئه‌ڤه يا مه‌زن نينه)، يا كورێ ئاده‌مى هه‌كه گونه‌هێت ته بگه‌هنه هندى چاڤێت ته قه‌تره بكه‌ن ژ ئه‌سمانى، پاشى تو داخوازا گونه‌هـ ژێبرنێ ژ من بكه‌ى، دێ بۆ ته ژێ به‌م، يا كورێ ئاده‌مى هه‌كه تو نێزيكى تژى ئه‌ردى ب گونه‌هان بێيه ده‌ف من، پاشى بگه‌هيه من و تو چو تشتان بۆ من نه‌كه‌يه هه‌ڤپشك، ئه‌ز دێ نێزيكى تژى ئه‌ردى گونه‌ه ژێبرنێ ده‌مه ته.
و ل دۆر بێهيڤى و پشتراستبوونێ زانايێ ناڤدا نه‌وه‌وى (خودێ ژێ رازى بيت) دبێژيت: بزانه يا باشتر بۆ به‌نده‌ى د كراسێ سلامه‌تيێدا، يێ ب ترس و ب هيڤى بيت، و ترس و هيڤيێت وى هندى ئێك بن، و د كراسێ نه‌ساخيێدا به‌س يێ ب هيڤى بيت، و شه‌نگستێت شه‌رعى ژ ده‌قێت قورئانێ و حه‌ديسێ و غه‌يرى وان ژى هاريكارن ل سه‌ر ڤێ چه‌ندێ. خودآ مه‌زن دبێژيت: ((فَلَا يَأْمَنُ مَكْرَ اللَّهِ إِلَّا الْقَوْمُ الْخَاسِرُونَ)). و كه‌س ژ ته‌كبيرا خودێ ئێمن نابيت، ئه‌و نه‌بن يێت خوساره‌ت. و ديسا دبێژيت: ((إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ)) و ژ ره‌حما خودێ بێ هيڤى نه‌بن، و ب راستى ژبلى گاوران كه‌سێ دى ژ ره‌حما خودێ بێ هيڤى نابيت. و دبێژيت: ((يَوْمَ تَبْيَضُّ وُجُوهٌ وَتَسْوَدُّ وُجُوهٌ))، رۆژا هنده‌ك روى ب گوهداريێ و په‌رستنا خودێ سپى دبن، و هنده‌ك ژى ب گاوريێ و گونه‌هان ره‌ش دبن، و دبێژيت: (( إِنَّ رَبَّكَ لَسَرِيعُ الْعِقَابِ وَإِنَّهُ لَغَفُورٌ رَّحِيمٌ)) و ب راستى خودايێ ته جزا ب له‌زه ئانكو: جزاكرنا وى يا ب له‌زه، و خودايێ ته ب راستى گونه‌ه ژێبه‌ر و دلۆڤانه. و دبێژيت: ((إِنَّ الْأَبْرَارَ لَفِي نَعِيمٍ))(( وَإِنَّ الْفُجَّارَ لَفِي جَحِيمٍ)). هندى چاك و خودێ ناسن، دێ د خۆشى و به‌هه‌شتێدا بن. و هندى گونه‌هكار و خرابى خوازن، دێ د ئاگرێ دۆژه‌هێدا بن. و دبێژيت: ((فَأَمَّا مَن ثَقُلَتْ مَوَازِينُهُ))(( فَهُوَ فِي عِيشَةٍ رَّاضِيَةٍ))(( وَأَمَّا مَنْ خَفَّتْ مَوَازِينُهُ))(( فَأُمُّهُ هَاوِيَةٌ )) (ڤێجا ئه‌و كه‌سێ ترازيا وى ب كار و كريارێت قه‌نج گران بوو، ئه‌و دێ د ژيانه‌كا خۆشدا بيت. و ئه‌وێ بارێ ترازيا وى ب كار و كريارێت قه‌نج سڤك بيت، جهێ وى دۆژه‌ه و ئاگره. و ئايه‌ت ب ڤێ رامانێ گه‌له‌كن، ترس و هيڤى د دوو ئايه‌تێت پێكڤه‌دا كۆم دبن يان د چه‌ند ئايه‌تێت پێكڤه‌دا يان د ئايه‌ته‌كێ ب تنێدا.
داپێكڤه به‌رێ خۆ بده‌ينه هنده ئايه‌تێت سۆره‌تا ئاليعومران كا ته‌قوادارێت هه‌ژى به‌حه‌شتا خودێ كينه! ئه‌ون يێت چو جاران گونه‌ه نه‌كرين، يان ئه‌و ژى ژ وان دهێنه هه‌ژمارتن يێت گونه‌هـ كرين و ب دورستى تۆبه‌كرين و په‌شێمان بووين و گونه‌ه هێلاين و بۆ خودآ هێلاين، خودێ مه‌زن دبێژيت: ((وَسَارِعُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ))(( الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ ))(( وَالَّذِينَ إِذَا فَعَلُوا فَاحِشَةً أَوْ ظَلَمُوا أَنفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَن يَغْفِرُ الذُّنُوبَ إِلَّا اللَّهُ وَلَمْ يُصِرُّوا عَلَىٰ مَا فَعَلُوا وَهُمْ يَعْلَمُونَ))(( أُولَٰئِكَ جَزَاؤُهُم مَّغْفِرَةٌ مِّن رَّبِّهِمْ وَجَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا وَنِعْمَ أَجْرُ الْعَامِلِينَ)) گه‌لى خودان باوه‌ران له‌ز ل ژێبرنا گونه‌هان ژ به‌رێ خودايێ خۆڤه و ل به‌حه‌شتا فره‌هيا وێ فره‌هيا عه‌رد و ئه‌سمانان بكه‌ن، ئه‌و به‌حه‌شتا بۆ پارێزكاران هاتيه به‌رهه‌ڤكرن. ئه‌و پارێزكارێت د به‌رفره‌هى و ته‌نگاڤيێدا د ده‌وله‌مه‌نديێ و ده‌ستكورتيێدا مالێ خۆ دمه‌زێخن، و كه‌ربا خۆ دادعويرن و ڤه‌دشێرن ژ كه‌رباندا سته‌مێ ل كه‌سێ ناكه‌ن و د راستا خۆدا خه‌لكى ئازا دكه‌ن، و خودێ ژى حه‌ژ قه‌نجيكاران دكه‌ت. و ئه‌وێت (پارێزكارێت) ئه‌گه‌ر گونه‌هه‌كێ دكه‌ن يان ژى سته‌مێ ل خۆ دكه‌ن، ناڤێ خودايێ خۆ دئينن و خودێ دئيننه بيرا خۆ، و داخوازا گونه‌ه ژێبرنێ ژ خودێ دخوازن، ما كى ژبلى خودێ گونه‌هان ژێ دبه‌ت، و ركمانێ ل سه‌ر گونه‌ها كرين ناكه‌ن (هه‌ر ناميننه ل سه‌ر و دهێلن و ئنيه‌تا لێ نه‌زڤرِينێ دكه‌نه دلێ خۆ). و ئه‌و دزانن وان خه‌له‌تى كر و نابيت هه‌ر ل سه‌ر بمينن، و دڤێت تۆبه بكه‌ن، و دزانن كه‌س ژ خودێ پێڤه گونه‌هێت وان ژێ نابه‌ت. ئه‌ڤان خه‌لاتێ وان ژێبرنا گونه‌هانه ژ به‌رێ خودايێ وانڤه و به‌حه‌شتێت رويبار دبنرِا دهه‌رِكن و دچن، و هه‌روهه‌ر دێ تێدا بن، و به‌حه‌شت چ خۆش خه‌لاته بۆ كرياركه‌رێت قه‌نج.
ڤێجا خويشكا هێژا ئه‌و هزرا بۆ ته چێدبيت خۆ بكوژى ژبه‌ر گونه‌هێت خۆ هزره‌كا خه‌له‌ته و ژبه‌رێ شه‌يتانيڤه‌يه، چونكى ترسا گونه‌هان دڤێت مه پالده‌ن بۆ تۆبا و كرن و زێده‌كرنا خێران و چه‌ند گونه‌هـ بێته بيرا من هند ئه‌ز بۆ خێرا گه‌رم ببم و خێران ل خۆ زێده‌كه‌م، نه هزره‌كا شه‌يتانى من بگريت ئه‌ز هزرا كوشتنێ بكه‌م و هه‌كه ئه‌م د تۆبا خۆدا د راست بين خودێ دێ مه پارێزيت، و مه شه‌رمزار ناكه‌ت، و په‌ردآ ل سه‌ر مه ناراكه‌ت، نه ل دنيايێ و نه ل ئاخره‌تێ، چونكى هه‌روه‌كى ئبن عه‌باس (خودێ ژێ رازى بيت) ژ پێغه‌مبه‌رێ خودێ ڤه‌دگوهێزيت: خودێ حه‌ژ ستاره‌كرنێ دكه‌ت، دێ تۆبه‌داران ستاره‌كه‌ت و شه‌رمزار ناكه‌ت، ڤێجا بلا نه‌ترسن به‌س هه‌كه د تۆبا خۆدا د راست و دورست بن، و خودێ چێتر دزانيت.
