ب / پێدڤيه مرۆڤێ گونه‌هكار چو جاران ژ دلۆڤاني و ره‌حما خودێ بێ هيڤى نه‌بيت، گونه‌هێت وى چه‌ند مه‌زن بن، دلۆڤانى و ره‌حما خودێ مه‌زنتره، له‌وا خودێ مه‌زن د حه‌يسه‌كا قودسيدا دبێژيت: ((يا كورێ ئاده‌مى.. ب راستى هندى تو دوعا ژ من بكه‌ى و هيڤيا ژ من بكه‌ى دێ گونه‌هێت ته بۆ ته ژێ به‌م، دگه‌ل وێ يا ل ده‌ف ته (ئانكو دگه‌ل وان گونه‌هێت تو دكه‌ى) و من خه‌م نينه (و ل ده‌ف من ئه‌ڤه يا مه‌زن نينه)، يا كورێ ئاده‌مى.. هه‌كه گونه‌هێت ته بگه‌هنه هندى چاڤێت ته قه‌تره بكه‌ن ژ عه‌سمانى، پاشى تو داخوازا گونه‌ه ژێبرنێ ژ من بكه‌ى، دێ بۆ ته ژێ به‌م، يا كورێ ئاده‌مى.. هه‌كه تو نێزيكى تژى عه‌ردى ب گونه‌هان بێيه ده‌ف من، پاشى بگه‌هيه من و تو چو تشتان بۆ من نه‌كه‌يه هه‌ڤپشك، ئه‌ز دێ نێزيكى تژى عه‌ردى گونه‌هـ ژێبرنێ ده‌مه ته)).
ديسا خودێ مه‌زن دبێژيت: ((وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَٰلِكَ يَلْقَ أَثَامًا))(( يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا ))(( إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا))(( وَمَن تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا )) و ئه‌وێت ژبلى خودێ، دوعايان ژ كه‌سێ دى نه‌كه‌ن و ژبلى خودێ كه‌سێ نه‌په‌رێسن و ئه‌و مرۆڤێ خودێ كوشتنا وى دورست نه‌كرى، و ب هه‌قى نه‌بيت كو به‌رانبه‌ر ئێكێ دى بێته كوشتن ناكوژن، و زنايێ و ده‌همه‌نپيسيێ ناكه‌ن، و هه‌ركه‌سێ ڤان بكه‌ت، دێ گونه‌ه ل سه‌ر ستوير بن، و دێ پێ ئێته جزاكرن. رۆژا قيامه‌تێ ئيزا دێ ل سه‌ر بيته دوقات، و هه‌روهه‌ر دێ ره‌زيل و شه‌رمزار تێدا مينيت چونكى گونه‌هـ ژى دا دگه‌ل گاوريێ. ژبلى وى يێ تۆبه‌كرى و باوه‌رى ئينايى و كار و كريارێت راست و قه‌نج كرين، ئه‌ڤێت هۆسا، خودێ دێ گونه‌هێت وان كه‌ته خێر، ئانكو: دێ گونه‌هێت وان ژێبه‌ت، و خێران دێ ل جهێ وان دانيت، و خودێ ب خۆ گونه‌ه ژێبه‌ر و دلۆڤانه. و ئه‌وێ تۆبه بكه‌ت و پاشى كاره‌كێ راست و باش بكه‌ت، ب راستى ئه‌و زڤرِينه‌كا دورست ب بال خودێڤه زڤرى.
ڤێجا دگه‌ل من باش هزرا خۆ د ڤێ ئايه‌تێدا بكه دێ هه‌لويستێ دورست بۆ ته دياربيت و فه‌رمان و حوكمێ ره‌وش و كراسێ تو تێدا دێ باش و باش ئاشكرا بيت، به‌رێ خۆ بدێ هه‌ركه‌سێ گونه‌هێت مه‌زن بكه‌ت و تۆبه نه‌كه‌ت دێ گونه‌هـ ل سه‌ر ستوير بن، و دێ پێ ئێته جزاكرن. رۆژا قيامه‌تێ ئيزا دێ ل سه‌ر بيته دوقات، و هه‌روهه‌ر دێ ره‌زيل و شه‌رمزار تێدا مينيت، به‌لێ يێ ئه‌ڤ گونه‌هه كرين و تۆبه‌كرى و په‌شێمان بووي ((إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا)) ژبلى وى يێ تۆبه‌كرى و باوه‌رى ئينايى و كار و كريارێت راست و قه‌نج كرين، ئه‌ڤێت هۆسا، خودێ دێ گونه‌هێت وان كه‌ته خێر، ئانكو: دێ گونه‌هێت وان ژێبه‌ت، و خێران دێ ل جهێ وان دانيت، و خودێ ب خۆ گونه‌هـ ژێبه‌ر و دلۆڤانه. به‌لێ دڤێت پشتى تۆبێ كار و كريارێت راست و دورست و چاك بكه‌ت، ئه‌ڤێت هۆسا نه‌به‌س دێ گونه‌هێت وان هێنه ژێبرن به‌لكى دێ ژێبه‌ت و خێران ل شوينێ دانيت، ئانكو: گونه‌هان دێ ب خێران گوهۆريت. پاشى ئايه‌تا دويفدا خودێ تۆبا راست و دورست ديار دكه‌ت دبێژيت: ((وَمَن تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا )) و ئه‌وێ تۆبه بكه‌ت و پاشى كاره‌كێ راست و باش بكه‌ت، ب راستى ئه‌و زڤرينه‌كا دورست ب بال خودێڤه زڤرى.
ڤێجا برايێ خۆشتڤى ژ دلۆڤاني و ره‌حما خودێ بێ هيڤى نه‌به، به‌لێ وان رێكا بگره يێت تو بشێيه خۆ و نه‌زڤريه‌ڤه گونه‌هێ، ئێك ژ وان رێكا: هه‌ڤال و دۆستێت خراب بهێله و ئه‌و ژينگه‌ها تو تێدا بگوهۆره و هه‌ڤالينيا چاكان بكه، و دگه‌ل وان دۆستانى و هه‌ڤالينيێ بكه، و دگه‌ل وان وه‌ره و هه‌ره و هاتن و چۆن و گه‌ريان و روينشتنێ بكه، وه‌سا دياره ئه‌و ژينگه‌ها تو تێدا و ئه‌و هه‌ڤالێت ته هه‌ين نه د هاريكارن له‌وا تو نه‌شێيه خۆ هه‌كه هێزا شه‌يتانى نه‌هندا مه‌زنه هه‌تا موسلمانێ دورست نه‌شێتێ ((فَقَاتِلُوا أَوْلِيَاءَ الشَّيْطَانِ إِنَّ كَيْدَ الشَّيْطَانِ كَانَ ضَعِيفًا )) گه‌لى خودان باوه‌ران.. هوين شه‌رِێ دۆست و يارێت شه‌يتانى بكه‌ن، ب راستى كارێ شه‌يتانى به‌رانبه‌ر يێ خودێ يێ بێ هێز بوو، و خودێ چێتر دزانيت.
