ب / راسته زنا ژ گونه‌هێت مه‌زنه، و ژ كه‌بائيرانه، و گه‌له‌كا كرێت و مه‌زنه، له‌وا خودێ مه‌زن د قورئانا خۆ يا پيرۆزدا فه‌رمانا مه دكه‌ت ئه‌م نێزيكى زنايێ ژى نه‌بين.. نه به‌س زنايێ ب تنێ نه‌كه‌ين، هندى هند يا كرێت و مه‌زنه، دڤێت نێزيك ژى نه‌بين و خۆ ژ وان رێك و ئه‌گه‌رێت رێخۆشكه‌ر بۆ زنايێ دوير بێخين، وه‌كى شڤانى دۆرماندۆر په‌وانى بچه‌رينيت، زوى دێ كه‌ڤيت د په‌وانيدا، ڤێجا هه‌كه مه ژى ئه‌و رێك نه‌هێلان يێت مه نێزيكى زنايێ دكه‌ن بلا گه‌له‌ك ژ خۆ پشت راست نه‌بين، خودێ مه‌زن دبێژيت: ((وَلَا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلًا)) و نێزيكى زنايێ و ده‌همه‌ن پيسيێ نه‌بن، ب راستى ئه‌و كاره‌كێ زێده كرێته و رێكا وێ پيسه رێكه. به‌رێ خۆ بدێ كا چاوا خودێ مه‌زن ڤآ گونه‌هێ دده‌ته نياسين ژبه‌ر هندێ يا فه‌ره نه‌به‌س ئه‌م ڤێ گونه‌هێ نه‌كه‌ين به‌لكى دڤێت نێزيك ژي نه‌بين، و ل سه‌فير و قاسد و هنارتى و نوينه‌رێت ڤێ گونه‌هێ د هشياربين، ئه‌و ژى ده‌ست و ئه‌زمان و چاڤن، پێغه‌مبه‌رێ خۆشتڤى (سلاڤێت خودێ لێ بن) هه‌روه‌كى بوخارى و موسلم ژ ئه‌بى هوريره (خودێ ژێ رازى بيت) ڤه‌دگێرن، دبێژيت: (كُتِبَ على ابْنِ آدم نَصِيبُهُ مِنَ الزِّنَا مُدْرِكٌ ذلكَ لا محالَه: الْعَيْنَانِ زِنَاهُمَا النَّظرُ، والأُذنَانِ زِنَاهُما الاستِماعُ، واللِّسَانُ زِنَاهُ الْكَلامُ، وَالْيدُ زِنَاهَا الْبَطشُ، والرَّجْلُ زِنَاهَا الخُطا، والْقَلْب يهْوَى وَيتَمنَّى، ويُصَدِّقُ ذلكَ الْفرْجُ أوْ يُكَذبُهُ) بارا مرۆڤى ژ زنايێ يا ل سه‌ر هاتيه نڤێسين چاره نينه هه‌ر دێ گه‌هيتێ، (ئانكو مرۆڤ نينه تشته‌كى ژ رێخۆشكه‌رێت زنايێ نه‌كه‌ت چ به‌رێخۆدانا حه‌رام بيت چ هه‌ر تشته‌كێ دى يێ حه‌رام بيت): چاڤان زنا وان به‌رێخۆدانه، و گوهان زنا وان گوهدانه، و ئه‌زمان زنا وى ئاخفتنه، و ده‌ست زنا وى گرتن و دستكرنه، و پێ زنا وى پێنگاڤ هاڤێتنه، و دل زنا وى حه‌ز دكه‌ت و دخوازيت، و شه‌رمينگه‌ه مه‌خسه‌د ژ وان كاران يان راست ده‌ردئێخيت يان دره‌و ده‌ردئێخيت. پشتى ڤێ بزانه چو گونه‌هـ نينن تۆبه بۆ نه‌بيت، خودێ مه‌زن ب شه‌ڤ ده‌ستێ خۆ بۆ گونه‌هكارێ رۆژێ ڤه‌دكه‌ت دا بۆ خۆ تۆبه بكه‌ت، و ب رۆژ ده‌ستێ خۆ بۆ گونه‌هكارێ شه‌ڤێ ڤه‌دكه‌ت دا بۆ خۆ تۆبه بكه‌ت، و ده‌رگه‌هێ تۆبێ ناهێته گرتن و به‌رده‌وام يێ ڤه‌كريه د دوو كراساندا نه‌بيت، ئێك: پشتى سه‌كه‌راتێ تۆبه نينه، دوو: هه‌كه نيشانێت مه‌زن يێت رۆژا قيامه‌تێ هاتن و ئاشكرابوون ژ وان رۆژ ل جهێ ئاڤابوونێ بهه‌لێت هه‌كه وه‌كى دى ده‌رگه‌هێ تۆبێ يێ ڤه‌كريه و بۆ هه‌ر گونه‌هه‌كا هه‌بيت، خودێ مه‌زن دبێژيت: ((إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِن قَرِيبٍ فَأُولَٰئِكَ يَتُوبُ اللَّهُ عَلَيْهِمْ وَكَانَ اللَّهُ عَلِيمًا حَكِيمًا))(( وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّىٰ إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الْآنَ وَلَا الَّذِينَ يَمُوتُونَ وَهُمْ كُفَّارٌ أُولَٰئِكَ أَعْتَدْنَا لَهُمْ عَذَابًا أَلِيمًا )) ب راستى تۆبه‌يا وى ب تنێ دئێته وه‌رگرتن و قه‌بويلكرن ئه‌وێت ژ نه‌زانين گونه‌هێ دكه‌ن، پاشى ژ نێزيك و زوى ژ وێ كرنێ په‌شێمان دبن ل خۆ دزڤرِن و تۆبه دكه‌ن، ڤێجا خودێ تۆبه‌يا ڤان قه‌بويل دكه‌ت و تۆبه‌يێ دده‌ته سه‌ر و خودێ زانا و كاربنه‌جهه. و تۆبه بۆ وان نينه، ئه‌وێت كار و كريارێت خراب و گونه‌هان دكه‌ن دميننه د گونه‌هێدا، و ل خۆ نازڤرِن هه‌تا ئێك ژ وان دكه‌ڤيته به‌ر مرنێ ژ نوى بێژيت: ئه‌ها ژ نوى من تۆبه‌يه و ئه‌ز په‌شێمانم، و تۆبه بۆ وان ژى نينه يێت دمرن، و ئه‌و گاور، ئيزايه‌كا ب ده‌رد و دژوار مه بۆ ڤان به‌رهه‌ڤكريه. ڤێجا گونه‌هـ نينه تۆبه بۆ نه‌بيت به‌لێ پێدڤيه ئه‌م مه‌رجێت تۆبێ بزانين، ئێك ژ وان: دڤێت ئه‌ز گونه‌هێ بهێلم و په‌شێمان ببم و رێك و ئه‌گه‌رێت گونه‌هێ ژى بهێلم، وه‌كى وى مرۆڤێ سه‌د كوشتين و ڤيايى تۆبه بكه‌ت زانايێ تێگه‌هشتى و كارزان گۆتێ تۆبه بۆ ته يا هه‌ى به‌لێ ب مه‌رجه‌كى ئه‌و جهێ تو لێ وى جهى بهێلى چونكى ئه‌و جه يێ خرابه و هندى تو د ناف وان مرۆڤاندا بى و هندى تو ل وێ ژينگه‌هێ بى دێ هه‌ر كوشتنێ كه‌ى وى جهى بهێله و به‌رێ خۆ بده جهێ باشان.
ڤێجا تو ژى هه‌ڤالێت خراب و جهێ خراب و وێ ژينگه‌ها تو تێدا بهێله و تۆبه بكه خودێ دێ تۆبا ته قه‌بويلكه‌ت و زێده‌ى ڤێ هه‌كه تو د تۆبا خۆدا يێ راست بى دێ گونه‌هان ل ته ب باشيان گوهۆريت، خودێ مه‌زن دبێژيت: ((وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَن يَفْعَلْ ذَٰلِكَ يَلْقَ أَثَامًا))(( يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا))(( إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا ))(( وَمَن تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا)) و ئه‌وێت دوعايان ژ كه‌سێ دى نه‌كه‌ن ژبلى خودێ و كه‌سێ نه‌په‌رێسن و ئه‌و مرۆڤێ خودێ كوشتنا وى دورست نه‌كرى، و ب هه‌قى نه‌بيت كو به‌رانبه‌ر ئێكێ دى بێته كوشتن ناكوژن، و زنايێ و ده‌همه‌نپيسيێ ناكه‌ن، و هه‌ركه‌سێ ڤان بكه‌ت، دێ گونه‌هـ ل سه‌ر ستوير بن، و دێ پێ ئێته جزاكرن. رۆژا قيامه‌تێ ئيزا دێ ل سه‌ر بيته دوقات، و هه‌روهه‌ر دێ ره‌زيل و شه‌رمزار تێدا مينيت چونكى گونه‌هـ ژى دا دگه‌ل گاوريێ. ژبلى وى يێ تۆبه‌كرى و باوه‌رى ئينايى و كار و كريارێت راست و قه‌نج كرين، ئه‌ڤێت هۆسا، خودێ دێ گونه‌هێت وان كه‌ته خێر، ئانكو: دێ گونه‌هێت وان ژێبه‌ت، و خێران دێ ل جهێ وان دانيت، و خودێ ب خۆ گونه‌ه ژێبه‌ر و دلۆڤانه، و خودێ چێتر دزانيت.
