ب / عه‌يال ئه‌مانه‌تن د ستۆيێ ده‌يباباندا و ئه‌و به‌رپرسن ژ وان و دڤێت چاڤێت وان ل عه‌يالێ وان بيت كا چاوا ژ ئاگرێ جه‌هنه‌مێ دپارێزن دڤێت هۆسا يێت د ستۆيێ واندا ژى كو عه‌يالن بپارێزن، خودآ مه‌زن دبێژيت: ((يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَّا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ)) گه‌لى خودان باوه‌ران خۆ و مالێت خۆ ژ ئاگره‌كى بپارێزن، داردوويێ وى مرۆڤ و به‌رن، هنده‌ك ملياكه‌تێت دلره‌ق و دژوار و ب هێز يێت ل سه‌ر، و ئه‌و ملياكه‌ت نه‌گوهداريا خودێ ناكه‌ن ل سه‌ر وى تشتێ ئه‌مرێ وان پێ هاتيه‌كرن، و وێ دكه‌ن يا ئه‌مرێ وان پێ دئێته‌كرن. و پێغه‌مبه‌ر (سلاڤێت خودێ لێ بن) دبێژيت: هوين هه‌مى چاڤدێر و پارێزه‌رن، و هوين هه‌مى به‌رپرسن ژ يێت ژێر چاڤدێريا خۆ، مير و سه‌رۆك چاڤدێر و پارێزه‌ره، و زه‌لام ل سه‌ر خه‌لكێ مالا خۆ چاڤدێر و پارێزه‌ره، ژن د مالا زه‌لامێ خۆ و بچوكێت ويدا چاڤدێر و پارێزه‌ره، ڤێجا هوين هه‌مى چاڤدێر و پارێزه‌رن، و هوين هه‌مى به‌رپرسن ژ يێت ژێر چاڤدێرييا خۆ.
و پشكه‌ك ژ ڤێ به‌رپرساتيێ نه‌هێليت خه‌له‌ت ببن و سنج و ئه‌خلاقێ وان خراب ببيت، و سه‌ردابچن، و بكه‌ڤنه د حه‌راميێدا، و بكه‌ڤنه د ده‌همه‌نپيسيێدا، و هه‌كه بالغ بوون و هاتنه ژنێ و شويا. دڤێت خه‌ما وان بخۆن، به‌رى بكه‌ڤنه د خه‌له‌تيه‌كا وه‌سادا، ده‌ركه‌فتن ژێ يا ب زه‌حمه‌ت بيت، نه‌خاسمه كچێ، و ل ده‌ف حه‌نبه‌ليان و هنده‌ك ژ شافعيان و زانايێ له‌خمى ژ مالكيان و (ابن عثيمين) و ئبن جبرين ژ هه‌ڤچه‌رخان هه‌كه بابێ شيان هه‌بن ژنێ بۆ كورێ خۆ يێ پێدڤى بينيت و كورێ شيان نه‌بن، و يێ هه‌وجه بيت، باب يێ گونه‌هكاره هه‌كه ژنێ بۆ نه‌ئينيت و ل سه‌ر واجبه ئه‌و ژنێ بۆ كورێ خۆ بينيت، و ب راستى ئه‌ز ڤێ بۆچۆنێ دورستتر ددانم و پتر دگه‌ل روح و جانێ شه‌ريعه‌تێ ئيسلامێ دگونجيت، چونكى هه‌كه ل سه‌ر بابێ واجب بيت وى خودانكه‌ت هه‌كه كور يێ فه‌قير بيت و باب يێ زه‌نگين بيت پا ئه‌ڤه هه‌ژيتره ل سه‌ر واجب ببيت ژنێ بۆ بينيت، هه‌كه يێ پێدڤى بيت، و كورى پێ چێ نه‌بيت، به‌لێ شويكرنا كچێ و خه‌مخوارنا شويكرنا وێ ئه‌ز دبينم ل سه‌ر بابێ واجبه و دڤێت خه‌مێ ژ كچا خۆ بخۆت بده‌ته شوى، و هه‌كه سستى د ڤى واجبيدا كر هنگى يێ گونه‌هكاره و يێ به‌رپرسياره، و خودێ چێتر دزانيت.
