ب / ئه‌ڤێت هۆسا هێژ نه‌بووينه ده‌يباب، هه‌كه ئه‌و ده‌يباب بانه، و عه‌يالێ خۆ ديتبا، وان نه‌به‌س ئه‌ڤه نه‌دگۆت؛ به‌لكى ئێكجار نه‌دئينا سه‌ر هزرا خۆ ژى، چونكى ئه‌و چ بكه‌ن نه‌شێن حه‌قێ ده‌يبابێت خۆ ل سه‌ر خۆ راكه‌ن، شه‌ڤ و رۆژان د خزمه‌ت و خزمه‌تكاريا واندا بن، هه‌ر نه‌شێن مافێ وا ل سه‌ر خۆ راكه‌ن، قه‌نجيا وان بۆ بزڤرينن، نه‌خاسمه ده‌يك، ئه‌وا خودێ مه‌زن د راستا وێدا دبێژيت: ((وَوَصَّيْنَا الْإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَىٰ وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ)) و مه ئه‌مرێ مرۆڤى كر دگه‌ل ده‌يبابێت خۆ يێ باش بيت نه‌خاسمه دگه‌ل ده‌يكێ، نه‌خۆشى و بێ تاقه‌تى ل دويف نه‌خۆشى و بێ تاقه‌تيێ پێ برن ده‌مێ د زكيدا، و دوو سالان ل سه‌رێك شير دايێ ژ نوى ژ شيرڤه‌كر، و مه گۆتێ: شوكرا من بكه من تو دايى، و شوكرا ده‌يبابێت خۆ بكه تو خودانكرى. ديسا دبێژيت: ((وَوَصَّيْنَا الْإِنسَانَ بِوَالِدَيْهِ إِحْسَانًا حَمَلَتْهُ أُمُّهُ كُرْهًا وَوَضَعَتْهُ كُرْهًا وَحَمْلُهُ وَفِصَالُهُ ثَلَاثُونَ شَهْرًا)) و مه ئه‌مرێ مرۆڤى يێ كرى، قه‌نجى و باشيێ دگه‌ل ده‌يبابێت خۆ بكه‌ت، ده‌يكا وى ئه‌و ب نه‌خۆشى و زه‌حمه‌ت د زكێ خۆدا يێ هه‌لگرتى، و ب زه‌حمه‌ت و نه‌خۆشى يێ بوويى، و هه‌لگرتنا وى هه‌تا شيرڤه‌كرنا وى سيه هه‌يڤن ڤى وه‌ختى هه‌ميێ ده‌يك زه‌حمه‌تێ پێڤه دبه‌ت و نه‌خۆشيان ل سه‌ر دبينيت.
جاره‌كێ زه‌لامه‌كى ده‌يكا خۆ كربوو پشتا خۆ و ته‌واف پێ دكر ئينا ئبن عومه‌ر (خودێ ژێ رازى بيت) ديت گۆتێ: يا ئبن عومه‌ر ما من حه‌قێ وێ سه‌ر خۆ نه‌راكر، ئبن عومه‌رى (خودێ ژێ رازى بيت) گۆتێ: نه‌خێر.. حه‌قێ ژانه‌كێ ژى ژ ژانێت بچويكبوونێ، ڤێجا بلا كه‌س ل وێ هزرێ نه‌بيت هندى بۆ ده‌يبابێت خۆ يێ باش بيت ئه‌و دێ شێت مافێ وان سه‌ر خۆ راكه‌ت نه‌خاسمه يێ ده‌يكێ.
پێغه‌مبه‌ر (سلاڤێت خودێ لێ بن) هه‌روه‌كى ل ده‌ف موسلمى هاتى، دبێژيت: (لا يجْزِي وَلَدٌ وَالِدَهُ إِلا أَنْ يجِدَهُ مَمْلُوكًا فَيشْتَرِيهُ فَيعْتِقَهُ) ئانكو چو كور حه‌قێ بابێ خۆ سه‌ر خۆ ناراكه‌ن ژبلى هندێ كور بابێ خۆ ببينيت كۆله و به‌نده‌يه ڤێجا بكريت و ئازاكه‌ت.. هه‌كه ب ڤێ حه‌قێ بابێ ل سه‌ر راببيت هه‌كه حه‌قێ ده‌يبابان ب چو ره‌نگان سه‌ر عه‌يالى نارابيت، ڤێجا بلا به‌رده‌وام د خزمه‌تا واندا بن نه‌خاسمه ده‌مێ ب لايه‌كى دكه‌ڤن و پێدڤى خزمه‌تكرنێ دبن و پير دبن، پێغه‌مبه‌رێ خۆشتڤى (سلاڤێت خودێ لێ بن) دبێژيت: ((دفنا وى ب ئاخێ بكه‌ڤيت (بشكێت و ره‌زيل ببيت) پاشى دفنا وى ب ئاخێ بكه‌ڤيت، پاشى دفنا وى ب ئاخێ بكه‌ڤيت، يێ بگه‌هيته ده‌يبابێت خۆ و د پير يان ئێك ژ وان، و ب وان نه‌چيته به‌حه‌شتێ))، و خودێ چێتر دزانيت.
