ب / پێدڤيه ئه‌م به‌رده‌وام رێز و حورمه‌تان بده‌ينه ده‌يبابان و به‌رز و بلند راگرين، چونكى خودێ مه‌زن پتر ژ جهه‌كى ئه‌مرێ مه كريه ئه‌م دگه‌ل ده‌يبابان د قه‌نج و باش بين، دبێژيت: ((وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا)) و خودايێ ته فه‌رمانا داى هوين په‌رستنا وى ب تنێ بكه‌ن، و دگه‌ل ده‌يبابان د قه‌نج بن. ديسا خودێ مه‌زن دبێژيت: ((وَقُل لَّهُمَا قَوْلًا كَرِيمًا)) ئانكو: ئاخفتنه‌كا نه‌رم و جوان دگه‌ل وان بكه. ئه‌رێ كه‌نگى رێز و حورمه‌ته يان ئاخفتنا نه‌رم و جوانه تو ب ناڤێ وان گازيكه‌يێ! له‌وا تابعيێ مه‌زن تاووس دبێژيت: ژ ره‌قياتيێيه مرۆڤ ب ناڤێ ده‌يبابان گازى وان بكه‌ت.
جاره‌كێ ئه‌بو هوره‌يره (خودێ ژێ رازى بيت) دوو زه‌لام پێكڤه ديتن گۆته ئێك ژ وان: ئه‌ڤه چيێ ته‌يه؟ گۆت: بابێ منه، ئينا ئه‌بو هوره‌يره (خودێ ژێ رازى بيت) گۆتێ: (لا تمش أمام أبيك ولا تجلس قبله ولا تدعوه باسمه ولا تستسب له) به‌راهيا بابێ خۆ نه‌چه، و به‌رى وى نه‌روينه و ب ناڤێ وى گازينه‌كه و چو كاران نه‌كه خه‌به‌ر بێنێ. ڤێجا ئه‌م ته شيره‌ت دكه‌ين تو وى عه‌ده‌تى بهێلى و گوهێ خۆ نه‌ده‌يه شه‌يتانى و ب ناڤێ ده‌يبابێت خۆ گازى وان نه‌كه‌ى، و خودێ چێتر دزانيت.
