ب / به‌لێ.. حه‌قێ وان يێ به‌رده‌وامه سه‌ر مرۆڤى، و دڤێت ئه‌م نه‌بينه ئه‌گه‌رێ برينا خێر و خێراتێت وان، و ئه‌م ئه‌گه‌رێ به‌رده‌وامبوونا خێرێت وان بين، چونكى پێغه‌مبه‌رێ خۆشتڤى (سلاڤێت خودێ لێ بن) دبێژيت: (إذا مَاتَ الإنسَانُ انقطعَ عمَلُهُ إلاَّ مِنْ ثلاث: صَدقَه جارية، أوْ عِلم يُنْتَفَعُ بِهِ، أَوْ وَلَدٍ صَالحٍ يدعُو له). سه‌ده‌قه‌كا به‌رده‌وام يان زانينه‌كا مفادار يان كوره‌كێ باش دوعا بۆ بكه‌ت. ڤێجا حه‌قێ وان ل سه‌ر مه ئه‌م د چاك و قه‌نج و سالح بين، و به‌رده‌وام دوعايان بۆ بكه‌ين، و خێر و خێراتان بۆ بكه‌ين؛ دا كارێ وان ژ خێرا نه‌هێته برِين، و خودێ مه‌زن ئه‌مرێ مه دكه‌ت ئه‌م دوعا دلۆڤانى و ره‌حمێ بۆ بكه‌ين، دبێژيت: ((وَقُل رَّبِّ ارْحَمْهُمَا كَمَا رَبَّيَانِي صَغِيرًا )) و بێژه: يا خودێ دلۆڤانيێ ب وان ببه هه‌روه‌كى وان ب بچويكاتى دلۆڤانى ب من برى، و ئه‌ز مه‌زنكريم. ديسا حه‌قێ وان ل سه‌ر مه ئه‌م كه‌س و كار و دۆستێت وان و مرۆڤێت وان پشتى وان ژبير نه‌كه‌ين و باشيێ بگه‌هينينه وان. پێغه‌مبه‌ر (سلاڤێت خودێ لێ بن) دبێژيت: (إِن أَبرَّ البرِّ أَنْ يصِلَ الرَّجُلُ وُدَّ أَبِيهِ) باشترين باشى ئه‌وه مرۆڤ دگه‌ل وى جهێ حه‌ژێكرنا بابێ خۆ يێ باش بيت (ئانكو دگه‌ل وى يێ باش بيت يێ بابێ مرۆڤى حه‌ژێ دكر).
عه‌بدوللايێ كورێ دينارى (خودێ ژێ رازى بيت) دبێژيت: عه‌بدوللايێ كورێ عومه‌رى، خودێ ژ هه‌ردوويان رازى بيت، زه‌لامه‌ك ژ كۆچه‌ره عه‌ره‌بان د رێكا مه‌كه‌هێدا ديت، عه‌بدوللايێ كورێ عومه‌رى سلاڤكرێ و ل كه‌ره‌كى سوياركر ئه‌و يێ لێ سويار بوو، و شاشكه‌ك دايێ ل سه‌ر سه‌رێ وى بوو، ئبن دينارى گۆت: من گۆتێ: خودێ ژێ رازى.. ئه‌و ژ كۆچه‌ره عه‌ره‌بانه و ئه‌و ب كێمێ رازى دبن، عه‌بدوللايێ كورێ عومه‌رى گۆت: ب راستى ئه‌ڤه هه‌ڤالێ عومه‌رێ كورێ خه‌تابى بوو (خودێ ژێ رازى بيت)، و من يا گول پێغه‌مبه‌رێ خودێ بووى (سلاڤێت خودێ لێ بن) دگۆت: ((باشترين باشى ئه‌وه مرۆڤ دگه‌ل وى يێ خودانێ حه‌ژێكرنا بابێ خۆ پشتى مرى يێ باش بيت)). و د ريوايه‌ته‌كا ديدا ژ ئبن دينارى ژ ئبن عومه‌رى، وه‌ختێ دچۆ مه‌كه‌هێ وى كه‌ره‌ك هه‌بوو لێ سويار دبوو هه‌كه ل سه‌ر حێشترێ شلببا، و شاشكه‌ك هه‌بوو ل سه‌رێ خۆ دشداند، رۆژه‌كێ ل سه‌ر پشتا وى كه‌رى بوو كۆچه‌ره عه‌ره‌به‌ك د به‌را بۆرى گۆت: تو نه بێڤانێ كورێ بێڤانى؟ گۆت: به‌لێ، ئينا كه‌ر دايێ.. گۆتێ: لێ سوياربه، و شاشكه‌ك ژى دايێ و گۆت: ل سه‌رێ خۆ بشدينه، هنده هه‌ڤالێت وى گۆتنێ: خودێ گونه‌هێت ته پويچكه‌ت، ته كه‌ره‌ك دا ڤى كۆچه‌ره عه‌ره‌بى تو پێ دهاتى و دچۆى، و شاشكه‌ك ته سه‌رێ خۆ پێ دشداند؟ گۆت: من يا گول پێغه‌مبه‌رێ خودێ بووى (سلاڤێت خودێ لێ بن) دگۆت: ((باشترين باشى ئه‌وه مرۆڤ دگه‌ل وى يێ خودانێ حه‌ژێكرنا بابێ خۆ پشتى مرى يێ باش بيت)). ئه‌بى ئوسه‌يدآ مالكێ كورێ ره‌بيعه‌يێ ساعدى (خودێ ژێ رازى بيت)، گۆت: ئه‌م ل ده‌ف پێغه‌مبه‌رێ خودێ (سلاڤێت خودێ لێ بن) د روينشتى بووين وه‌ختێ زه‌لامه‌ك ژ به‌نى سه‌له‌مه هاتيه ده‌ف، گۆت: يا پێغه‌مبه‌رێ خودێ.. ما تشه‌ك ژ حه‌قێ ده‌يبابێت من پشتى مرنا وان مايه ئه‌ز پێ راببم؟ گۆت: ((به‌لێ: دوعاكرنه بۆ وان و داخوازا گونه‌ه ژێ برنێيه بۆ وان و جهئينانا وه‌سيه‌تا وانه و باشيگه‌هاندنه دگه‌ل كه‌س و كاران ل سه‌ر خاترا وان و قه‌درگرتنا هه‌ڤالێت وانه))، و خودێ چێتر دزانيت.
