ب / هندى عه‌يالى پێ چێببيت گوهداريا ده‌يبابيت خۆ بكه‌ن، و حه‌زكرنا وان ب جه بينن جهێ سه‌رفه‌رازيا وانه، نه‌خاسمه هه‌كه ده‌يباب د تێگه‌هشتى بن، و خێرا عه‌يالێ خۆ ژ بۆچۆنا خۆ دڤێت، و مه‌خسه‌دا وان نه به‌رژه‌وه‌ندى و هه‌وجه‌ييا وانه، ئه‌ڤه باشتره و دێ خێر تێدا بيت، به‌لێ ل سه‌ر وان نه‌واجبه ئه‌و گوهێ خۆ بده‌نه ده‌يبابێت خۆ، و ئه‌ڤه نابيته دلمان بۆ وان، و نه‌گونه‌هكارن نه‌خاسمه هه‌كه ئه‌گه‌ره‌كێ شه‌رعى هه‌بيت، به‌لێ هه‌كه وان چو ئه‌گه‌رێت شه‌رعى نه‌بن و ده‌يبابێت وان د ديندار بن و ل سه‌ر بنياتێ دينى بۆ وان هه‌لدبژێرن دڤێت ئه‌و گوهداريا وان بكه‌ن؛ چونكى ئه‌ڤ ئاراسته و وه‌سيه‌ت و رێنمايى و شيره‌تێت پێغه‌مبه‌رينه (سلاڤێت خودێ لێ بن) و يێ گوهێ خۆ نه‌ده‌ته شيره‌تێت پێغه‌مبه‌رى (سلاڤێت خودێ لێ بن) ئه‌و خێرێ نابينيت.
پێغه‌مبه‌ر (سلاڤێت خودێ لێ بن) دبێژته كوران هه‌روه‌كى د بوخارى و موسلمێدا هاتى: (تُنْكَحُ المَرْأَة لأَرْبعٍ: لِمالِهَا، وَلِحَسَبِهَا، وَلِجَمَالِهَا، ولِدِينِهَا، فَاڤفَرْ بِذاتِ الدِّينِ تَرِبَتْ يدَاك) ئانكو: ژن بۆ چار تشتان دئێته ماره‌كرن: بۆ مالێ وێ، بۆ مالباتا وێ، بۆ جوانيا وێ، بۆ دينێ وێ، بگه‌هه يا خودان دين (هه‌كه ته وه‌نه‌كر و ل سه‌ر ڤى بنياتى ژن نه‌هه‌لبژارت) ده‌ستێت ته ب ئاخێ بكه‌ڤن و هه‌ژار ببى. ڤێجا هه‌كه ده‌يبابێت ته يا خودان دين بۆ ته بڤێت و تو ره‌فز بكه‌ى هنگى نه ته بێئه‌مريا ده‌يبابان كر به‌لكى ته گوهآ خۆ نه‌دا شيره‌ت و رێنمايێت پێغه‌مبه‌رى (سلاڤێت خودێ لێ بن)، و حه‌ديس ديار دكه‌ت خه‌لك بارا پتر ژنێ ژبه‌ر ڤان هه‌رچار خاسله‌تان هه‌لدبژێرن، ڤێجا تو ل سه‌ر يا خودان دين رژدبه و وێ بگه‌هينه خۆ و ل سه‌ر هه‌ڤالينيا وێ يێ رژدبه. و (سلاڤێت خودێ لێ بن) دبێژيته كچان: (إذا أتاكم من ترضون دينه وخلقه فأنكحوه إلا تفعلوه تكن فتنه في الأرض وفساد عريض) ئه‌گه‌ر ئه‌و هات كچا هه‌وه خواست يێ هوين ژ دين و ئه‌خلاقێ وى رازى بده‌نێ و هه‌كه هوين وه‌نه‌كه‌ن دێ به‌لا و خرابيه‌كا مه‌زن د ئه‌رديدا چێبيت.
ڤێجا هه‌كه ده‌يبابان ل سه‌ر ڤى بناخى كور بۆ كچا خۆ هه‌لبژارت فه‌ره كچ گوهداريا ده‌يبابێت خۆ بكه‌ت، هه‌كه هۆسا نه‌بيت دڤێت ئه‌م بزانين ئيسلامێ رێك نه‌دايه كه‌سه‌كى بلا باب ژى بيت خورتيێ ل كچێ بكه‌ت و پێ ل حه‌زكرنا وێ بدانيت و پشت گوهێت خۆڤه باڤێت، به‌لگه ژى ئه‌ڤه‌يه كچه‌ك هاته ده‌ف پێغه‌مبه‌رآ خۆشتڤى (سلاڤێت خودێ لێ بن) به‌لێ نه‌ديت ئينا چيرۆكا خۆ بۆ ده‌يكا مه موسلمانان عائيشايێ (خودێ ژێ رازى بيت) ڤه‌گێرا گۆت: بابآ من ئه‌ز يا دايمه برازايێ خۆ و ب دلێ من نينه و دڤێت ب من بێ بهاييا خۆ راكه‌ت. عائيشايێ گۆتێ: روينه‌خوارێ هه‌تا پێغه‌مبه‌ر (سلاڤێت خودێ لێ بن) دهێت و بێژێ، پێغه‌مبه‌ر (سلاڤێت خودێ لێ بن) هات و گۆتێ، ئينا پێغه‌مبه‌رى (سلاڤێت خودێ لێ بن) فرێكره دويف بابێ وێرا و گۆته كچێ: ((ڤێ گاڤێ تو يا ب كه‌يفا خۆيى ته دڤێت لێڤه ببه و ته دڤێت رازى ببه))، ئينا كچێ گۆت: ئه‌ز يا رازيمه ب وى تشتێ بابێ من بۆ من دڤێت، به‌لێ من دڤيا ئه‌ز نيشا كچ و ژنێت موسلمانان بده‌م و وان ئاگه‌هدار بكه‌م كو كه‌سێ حه‌ق نينه خورتيێ ل وان بكه‌ت، و خودێ چێتر دزانيت.
