ب / زانيايێت مه دبێژن: تو خه‌له‌تيێ بزاني به‌س نينه، دڤێت تو بزانى كا دێ چاوا وێ خه‌له‌تيێ چاره‌سه‌ركه‌ى، ئانكو: دڤێت ته دوو زانين هه‌بن.
ئێك: بزاني خه‌له‌تى خه‌له‌تيه، و ئه‌ڤه ب تنێ به‌س نينه.
دوو: زانينا چاره‌سه‌ركرنا خه‌له‌تيا ته هه‌بيت و دڤێت تو گه‌له‌كێ شاره‌زا و حه‌كيم بي، و بزانى دێ چاوا خه‌له‌تيێ چاره‌سه‌ركه‌ى و گوهۆرى.
و دڤێت ئه‌ڤ ده‌يكه ژ خودێ بترسيت و باش بزانيت، خێرا زارۆكێت وێ د چدانه، و يا زێره‌ڤان بيت، نه‌هێليت زارۆكێت وێ فێرى خرابيێ ببن، و به‌رێ خۆ بده‌نه تشتێت خه‌له‌ت و نه‌دورست، چونكى هه‌كه وێ وه‌نه‌كر و زارۆك خراب بوون، هنگى ئه‌و يا گونه‌هكاره و يا به‌رپرسه، و بلا بزانيت عه‌يال ئه‌مانه‌تن د ستۆيێ ده‌يباباندا، و ئه‌و به‌رپرسن ژ وان، و دڤێت چاڤێت وان ل عه‌يالێ وان بيت، كا چاوا خۆ ژ ئاگرێ جه‌هنه‌مێ دپارێزن، دڤێت هۆسا يێت د ستۆيێ واندا ژى كو عه‌يالن بپارێزن، خودآ مه‌زن دبێژيت: ((يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَّا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ )) گه‌لى خودان باوه‌ران خۆ و مالێت خۆ ژ ئاگره‌كى بپارێزن، داردوويێ وى مرۆڤ و به‌رن، هنده‌ك ملياكه‌تێت دلره‌ق و دژوار و ب هێز يێت ل سه‌ر، و ئه‌و ملياكه‌ت نه‌گوهداريا خودێ ناكه‌ن ل سه‌ر وى تشتێ ئه‌مرێ وان پێ هاتيه‌كرن، و وێ دكه‌ن يا ئه‌مرێ وان پێ دئێته‌كرن. و پێغه‌مبه‌ر (سلاڤێت خودێ لێ بن) هه‌روه‌كى بوخارى و موسلم ژ ئبن عومه‌رى (خودێ ژێ رازى بيت) ڤه‌دگێرن، دبێژيت: (كلُّكُمْ راعٍ، وكُلُّكُمْ مسئولٌ عنْ رعِيتِهِ، والأَمِيرُ رَاعٍ، والرَّجُلُ راعٍ علَى أَهْلِ بَيْتِهِ، والمرْأَه راعِيه على بيْتِ زَوْجِها وولَدِهِ، فَكُلُّكُمْ راعٍ، وكُلُّكُمْ مسئولٌ عنْ رعِيتِهِ) هوين هه‌مى چاڤدێر و پارێزه‌رن، و هوين هه‌مى به‌رپرسن ژ يێت ژێر چاڤدێريا خۆ، مير و سه‌رۆك چاڤدێر و پارێزه‌ره، و زه‌لام ل سه‌ر خه‌لكێ مالا خۆ چاڤدێر و پارێزه‌ره، ژن د مالا زه‌لامێ خۆ و بچويكێت ويدا چاڤدێر و پارێزه‌ره، ڤێجا هوين هه‌مى چاڤدێر و پارێزه‌رن، و هوين هه‌مى به‌رپرسن ژ يێت ژێر چاڤدێريا خۆ. ڤێجا بلا ئه‌ڤ ده‌يكه و يێت وه‌كى وێ ژ خودێ بترسن و بزانن چ ل سه‌ر وان پێدڤيه و پشتى ئه‌و دمرن كورێ سالح و چاك و باش و ديندار و خودان ئه‌خلاق و ب ته‌قوا تنێ دێ فايدێ وان كه‌ت، عه‌يالێ وان يێ دى هندى هه‌بن هه‌كه خرابيێ نه‌گه‌هيننه وان باشيێ ناگه‌هيننێ. پێغه‌مبه‌رێ خۆشتڤى (سلاڤێت خودێ لێ بن) هه‌روه‌كى موسلم (خودێ ژێ رازى بيت) ژ ئبن عومه‌رى (خودێ ژێ رازى بيت) ڤه‌دگێريت، دبێژيت: (إذا مَاتَ الإنسَانُ انقطعَ عمَلُهُ إلاَّ مِنْ ثلاث: صَدقَه جارية، أوْ عِلم يُنْتَفَعُ بِهِ، أَوْ وَلَدٍ صَالحٍ يدعُو له). هه‌كه مرۆڤ مر كار و كريارێت وى دهێنه برين سێ تێ نه‌بن: سه‌ده‌قه‌كا به‌رده‌وام يان زانينه‌كا مفادار يان كوره‌كێ باش دوعا بۆ بكه‌ت. ڤێجا بلا ده‌يباب بۆ ڤێ رۆژێ كاربكه‌ن و چاڤێ وان ل ڤێ رۆژێ بيت، و زارۆكێت خۆ بۆ ڤێ رۆژێ په‌روه‌رده‌كه‌ن، و عێجزيا وێ ل سه‌ر كارێ خه‌له‌ت چو گونه‌هێ ناگه‌هينيته ته، چونكى وێ ماف نينه خۆ عێجزكه‌ت، و دوعا گونه‌هـ تێدا خودێ قه‌بويل ناكه‌ت. پێغه‌مبه‌رێ خۆشتڤى (سلاڤێت خودێ لێ بن) دبێژيت: ((نينه موسلمانه‌ك دوعايه‌كێ ژ خودێ مه‌زن بكه‌ت گونه‌هـ و برينا مرۆڤانيێ تێدا نه‌بيت، هه‌كه خودێ ئێك ژ سێ تشتان به‌رانبه‌ر نه‌ده‌تێ: يان دێ له‌زێ ل دوعايا وى كه‌ت وه‌كى وى خواستى ده‌تێ، يان دێ بۆ هێليت بۆ رۆژا قيامه‌تێ، يان دێ پێ نه‌خۆشيه‌كا وه‌كى وێ ژێ ده‌ته پاش)) ـ ئينا سه‌حابيان گۆت ـ پا ئه‌م دێ گه‌له‌ك دوعايان كه‌ين؟ ئينا پێغه‌مبه‌رى (سلاڤێت خودێ لێ بن) گۆت: ((خودێ دێ پتر ده‌ته هه‌وه)). ئيمام ئه‌حمه‌د و ترمزى ڤه‌گێرايه.
و دوعايا ده‌يكا ته ل ته كرى نه‌يا دورسته و ناهێته قه‌بويلكرن هه‌روه‌كى ئه‌ڤه ب ئاشكه‌رايى د حه‌ديسێدا هاتى. دگه‌ل هندێ ژى دڤێت هه‌ر تو نه‌رم و ره‌حه‌ت و ته‌نا دگه‌ل ده‌يكا خۆ باخڤى نه‌خاسمه ل ده‌ف خويشك و برايێت خۆ؛ دا ئه‌و ژى چاڤ ل ته بكه‌ن، و هه‌كه ده‌يكا ته ما ب تنێ هه‌ره ده‌ف و ده‌ستێ وێ و چاڤێ وێ ماچيكه، و بێژێ: من بۆ خێرا وانه و دڤێت تو ژى يا هاريكاربى و پشتا وان نه‌گرى؛ چونكى ئه‌ڤه ئه‌ركێ ته‌يه، و خودێ چێتر دزانيت.
