ب / يا دورست و پێدڤى ئه‌وه چو جاران ده‌يبابێت مرۆڤى ژ بيرا مرۆڤى نه‌چن، و به‌رده‌وام دوعا بۆ بكه‌ين، و ئنيه‌تا مه د هه‌مى كارێت خێرێدا يا ئاماده بيت؛ دا به‌رده‌وام پشكدارێت خێرا مه بن، كورێ باش نه ئه‌وه ده‌يباب ژ بيرا وى بچن، و خێر و خێرات و دوعيان بۆ نه‌كه‌ت هه‌تا چه‌ند جاركى نه‌هێنه خه‌ونا وى، نه‌خێر.. ئه‌ڤه نه كورێ باشه و ئه‌ڤه نه نيشانا باشيێيه ده‌يباب نه‌هێنه بيرا مه هه‌تا ئه‌م د خه‌وناندا نه‌بينين، و بلا باش ئه‌م بزانين مافێ ده‌يبابان هندێ مه‌زنه هه‌كه ئه‌م د دنيايێدا هه‌ميێ د خزمه‌تا واندا بين ئه‌م مافێ وان سه‌ر خۆ ناراكه‌ين نه‌خاسمه ده‌يكێ ئه‌وا خودێ مه‌زن د راستا وێدا دبێژيت: ((وَوَصَّيْنَا الْإِنسَانَ بِوَالِدَيْهِ إِحْسَانًا حَمَلَتْهُ أُمُّهُ كُرْهًا وَوَضَعَتْهُ كُرْهًا وَحَمْلُهُ وَفِصَالُهُ ثَلَاثُونَ شَهْرًا )) و مه ئه‌مرێ مرۆڤى يێ كرى، قه‌نجى و باشيێ دگه‌ل ده‌يبابێت خۆ بكه‌ت، ده‌يكا وى ئه‌و ب نه‌خۆشى و زه‌حمه‌ت د زكێ خۆدا يێ هه‌لگرتى، و ب زه‌حمه‌ت و نه‌خۆشى يێ بوويى، و هه‌لگرتنا وى هه‌تا شيرڤه‌كرنا وى سيه هه‌يڤن ڤى وه‌ختى هه‌ميێ ده‌يك زه‌حمه‌تێ پێڤه دبه‌ت و نه‌خۆشيان ل سه‌ر دبينيت. ديسا د ئايه‌ته‌كا دى يا پيرۆزدا دبێژيت: ((وَوَصَّيْنَا الْإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَىٰ وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ)) و مه ئه‌مرێ مرۆڤان كر دگه‌ل ده‌يبابێت خۆ د باش بن نه‌خاسمه دگه‌ل ده‌يكێ، نه‌خۆشى و بێ تاقه‌تى ل دويف نه‌خۆشى و بێ تاقه‌تيێ پێ برن ده‌مێ د زكيدا، و دوو سالان ل سه‌رێك شير دايێ ژ نوى ژ شيرڤه‌كر، و مه گۆتێ: شوكرا من بكه من تو دايى، و شوكرا ده‌يبابێت خۆ بكه تو خودانكرى، و خودێ چێتر دزانيت.
