ب / ده‌يباب چه‌ندێت خراب بن، نابيت عه‌يال به‌رامبه‌ر خرابيێ شوينێ بدانن، و دڤێت هه‌ر زارۆك دگه‌ل ده‌يبابێت خۆ د باش بن، ده‌نگێ خۆ ل سه‌ر وان بلند نه‌كه‌ن، و ئيبراهيم پێغه‌مبه‌رى (سلاڤێت خودێ لێ بن) بۆ خۆ بكه‌نه پێشه‌وا و چاڤلێكرى بابێ وى چه‌ندێ خراب بوو بۆ وى، دگه‌ل هندێ ژى هه‌ر ئه‌و يێ باش بوو، و ب جوانى ناڤێ بابێ خۆ دئينا، و هه‌ر نه‌رم و ب رێز و حورمه‌ت دگه‌ل بابێ خۆ دئاخفت. ئها دڤێت مرۆڤ يێ هۆسابيت، و ئيبراهيم پێغه‌مبه‌ر (سلاڤێت خودێ لێ بن) نموونه‌يا مه يا بلند و بالا بيت، به‌لێ دڤێت ده‌يباب ژى ته‌قوا خودێ بكه‌ن و ژ خودێ بترسن و بزانن كا چاوا وان ماف هه‌يه و داخوازا مافێ خۆ دكه‌ن، هۆسا ئه‌رك و واجب ژى ل سه‌ر وان يێ هه‌ى، كا چاوا ل سه‌ر مافێت خۆ د رژد و هشيارن، دڤێت هۆسا ل ئه‌رك و واجبێت خۆ ژى د هشيار بن، چونكى ئه‌و ماف به‌رامبه‌ر وان ئه‌ركانه، هه‌كه ئه‌رك ب جه نه‌ئينان بلا پسيارا مافان نه‌كه‌ن، و بلا بزانن پێغه‌مبه‌رآ مه (سلاڤێت خودێ لێ بن) د مالا خۆدا يآ چاوا بوو، دڤێت ئه‌و ژى دوه‌سا بن. پێغه‌مبه‌ر (سلاڤێت خودێ لێ بن) دبێژيت: باشترينێ هه‌وه يێ باشتر بيت بۆ مالا خۆ، و ئه‌ز ژ هه‌وه باشترم. و عائيشا ده‌يكا مه موسلمانان (خودێ ژێ رازى بيت) دبێژيت: ژيانا خۆ هه‌ميێ پێغه‌مبه‌رى (سلاڤێت خودێ لێ بن) ده‌ستێ خۆ بلند نه‌كره چو هه‌ڤژينێت خۆ، و چو ئاخفتنێت نه‌جوان ژى نه‌گۆتينه كه‌سێ. و بابێ ماف نينه خه‌به‌را بێژيته كه‌سێ خه‌لكێ مالا خۆ، نه زارۆكێت خۆ و نه هه‌ڤژينا خۆ. پێغه‌مبه‌ر (سلاڤێت خودێ لێ بن) د حه‌ديسا بوخارى و موسلميدا ژ ئبن مه‌سعودى دبێژيت: (سِباب المُسْلِمِ فُسوقٌ) خه‌به‌رگۆتنا موسلمانى ژ رێ ده‌ركه‌فتنه. و د حه‌ديسه‌كا ديدا دبێژيت: هه‌ردوو خه‌به‌ربێژ گونه‌ها خه‌به‌رێ وان ل سه‌ر يێ ئێكێ خه‌به‌ر گۆتين هندى يێ سته‌ملێكرى زێده نه‌كه‌ت. و دڤێت موسلمان يێ ئه‌زمان پاقژ بيت دگه‌ل هه‌مى كه‌سان، نه‌خاسمه دگه‌ل مالا خۆ، و يێ هۆسا نه‌بيت يێ گونه‌هكاره، چونكى پێغه‌مبه‌ر (سلاڤێت خودێ لێ بن) سنجێ موسلمانى ديار دكه‌ت دبێژيت: (لَيْس المُؤمِنُ بالطعَّانِ، وَلا اللَّعَّانِ، وَلا الْفَاحِشِ، وَلا الْبَذيء) خودان باوه‌رێ دورست نه‌يێ تان هاڤێژه و نه‌يێ ئاخفتن و كار و كريار كه‌شه‌فرێته و نه‌يێ ئه‌زمان ره‌ش و پيسه. و ديسا تۆره‌بوون نه سنجێ موسلمانيه، نه‌خاسمه دگه‌ل مالا خۆ. ئه‌بو هوره‌يره، (خودێ ژێ رازى بيت) دبێژيت: زه‌لامه‌كى گۆته پێغه‌مبه‌رى (سلاڤێت خودێ لێ بن) من شيره‌ت بكه و ئه‌مرى ل من بكه. گۆت: ((كه‌ربێت خۆ نه‌ڤه‌كه)) چه‌ند جاران ڤه‌گێرا، گۆت: كه‌ربێت خۆ نه‌ڤه‌كه. و پێغه‌مبه‌ر (سلاڤێت خودێ لێ بن) ديار دكه‌ت تۆرِه‌بوون ژ شه‌يتانيه، و مه‌زنترين ده‌رفه‌ت بۆ شه‌يتانى ئه‌وه مرۆڤى تێدا سه‌رداببه‌ت ده‌مێ تۆره دبيت، ڤێجا دڤێت مرۆڤى ئاگه‌ه ژ خۆ هه‌بيت نه‌كه‌ڤيته تۆرا شه‌يتانى و نه‌بيته نێچيرا وى و رێ نه‌ده‌تێ مه تۆره بكه‌ت، و خودێ چێتر دزانيت.
