فه‌ره عه‌يال د هشيار بن، و ده‌يبابێت خۆ تۆرِه نه‌كه‌ن، و دلێ وان نه‌هێلن، و نه‌چارنه‌كه‌نه هندێ نفرينا بكه‌ن، ئه‌وێ ده‌يبابێت خۆ نه‌چاره‌كه‌ته هندێ، بلا ژ خۆ بترست، خودێ نه‌خۆشيه‌كێ ب سه‌رێ وان بينيت بێى ده‌يباب نفرينا ل وان بكه‌ن، چونكى خودێ مه‌زن ژ عه‌سمانێ خۆ يێ بلند ئه‌مرێ مه دكه‌ت ئه‌م جوان و نه‌رم دگه‌ل وان باخڤين و وان تۆره نه‌كه‌ين و ئاخفتنا ژ هه‌ميان كێمتر چيه نه‌بێژينه وان ئه‌و پێ عێجز و نه‌خۆش ببن. خودێ مه‌زن دبێژيت: ((وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا))(( وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا )) و خودايێ ته فه‌رمانا داى هوين په‌رستنا وى ب تنێ بكه‌ن، و دگه‌ل ده‌يبابان د قه‌نج بن، و ئه‌گه‌ر ئێك ژ وان يان هه‌ردوو ل ده‌ف ته پير بوون، تو د خزمه‌تكرنا واندا نه‌بێژه وان ((ئۆف)) ژى كو تو وه‌ستيان و بێزاريا خۆ ژ وان دياركه‌ى، و ل وان نه‌خورِه و وان پاشڤه نه‌به و شوينا ((ئۆف ئۆفێ)) ئاخفتنه‌كا نه‌رم و جوان دگه‌ل وان بكه. و خۆ زێده بۆ وان بشكێنه و زێده دلۆڤانيێ د راستا واندا بكه زێده خۆ بۆ وان نه‌رم بكه و خۆ بشكێنه، و وان بينه ده‌ف خۆ و خودان بكه، هه‌روه‌كى وان ب بچويكاتى تو ب به‌ر خۆڤه ئينايى و خودانكرى و بێژه: خودێ وۆ.. دلۆڤانيێ ب وان ببه هه‌روه‌كى وان ب بچويكاتى دلۆڤانى ب من برى، و ئه‌ز مه‌زنكريم. پاشى دگه‌ل من هزرا خۆ د ئاخفتنا خودێدا بكه: ((فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا)) ڤێجا كه‌نگى يا دورسته ئه‌م هند تۆره بكه‌ين هه‌تا نفرينان ل جه‌گه‌را خۆ بكه‌ت، و بلا عه‌يال ژ نفرينێت وان بترسن هه‌كه ل سه‌ر هه‌قيآ نفرينان بكه‌ن. پێغه‌مبه‌ر (سلاڤێت خودێ لێ بن) دبێژيت: (ثلاث دَعَوَاتٍ مُسْتجَابَاتٌ لا شَكَّ فِيهنَّ: دَعْوَه المَظلومِ، وَدَعْوَه المسَافِرِ، وَدَعْوَه الوَالِدِ عَلى وَلدِهِ ) سێ دوعا بێ گۆمان د قه‌بويلن: دوعايا سته‌ملێكرى و دوعايا رێڤنگى و دوعايا بابێ ل عه‌يالێ خۆ. ژبه‌ر هندآ پێغه‌مبه‌ر (سلاڤێت خودێ لێ بن) ده‌يبابان دترسينيت ژ نفرينكرنێ و دبێژيته وان و مه هه‌ميان هه‌روه‌كى موسلمى ژ جابرێ كورێ عه‌بدوللاى ڤه‌گێراى: (لا تَدعُوا عَلى أَنْفُسِكُم، وَلا تدْعُوا عَلى أَولادِكُم، ولا تَدْعُوا على أَمْوَالِكُم، لا تُوافِقُوا مِنَ اللَّهِ ساعه يُسأَلُ فِيهَا عَطاءً، فيسْتَجيبَ لَكُم ) نفرينان ل خۆ نه‌كه‌ن و نفرينان ل زارۆكێت خۆ ژى نه‌كه‌ن و نفرينان ل مالێ خۆ ژى نه‌كه‌ن، نه‌كو بكه‌ڤنه د ويدا يێ خودێ دوعا تێدا قه‌بويل دكه‌ت و نفرينا هه‌وه بێته قه‌بويلكرن. و ده‌ف بوخارى و موسلمى هاتيه ئه‌بو هوره‌يره (خودێ ژێ رازى بيت) گۆت: پێغه‌مبه‌رێ خودێ (سلاڤێت خودێ لێ بن) گۆت: كه‌س د لاندكێدا نه‌ئاخفتيه سێ نه‌بن: عيسايێ كورێ مه‌ريه‌مێ و هه‌ڤالێ جوره‌يجى، و جوره‌يج مرۆڤه‌كێ عيباده‌تكه‌ر بوو، سه‌ومه‌عه‌ك بۆ عيباده‌تى بۆ خۆ گرتبوو، ده‌يكا وى هاته ده‌ف، و وى نڤێژ دكر گازيكرێ: يا جوره‌يج، گۆت: يا خودێ ده‌يكا منه و نڤێژا منه و ما ب نڤێژا خۆڤه، و ده‌يكا وى چۆ، و ده‌مێ بوويه رۆژا پاشتر ده‌يكا وى هاته ده‌ف، وى نڤێژ دكر گۆت: يا جوره‌يج، گۆت: يا خودێ ده‌يكا منه و نڤێژا منه و ما ب نڤێژا خۆڤه، و ده‌يكا وى چۆ، و ده‌مێ بوويه رۆژا پاشتر ده‌يكا وى هاته ده‌ف، وى نڤێژ دكر گۆت: يا جوره‌يج، گۆت: يا خودێ ده‌يكا منه و نڤێژا منه و ما ب نڤێژا خۆڤه، ده‌يكا وى گۆت: يا خودێ وى نه‌مرينه هه‌تا به‌رێ خۆ بده‌ته سه‌روچاڤێت ده‌همه‌ن پيسان، ئيسرائيليان به‌حسێ جوره‌يجى و عيباده‌تێ وى كرن، و ژنه‌كا ده‌همه‌ن پيس هه‌بوو مه‌ته‌ل و نموونه ب جوانيا وێ دهاته گۆتن، گۆت: هه‌كه هه‌وه بڤێت دێ سه‌ردابه‌م، خۆ نيشا دا، به‌لێ پويته پێ نه‌كر و به‌رێ خۆ نه‌دايێ، هاته ده‌ف شڤانه‌كى و خۆ ب ده‌ستڤه به‌ردا، ئه‌و ژى چۆ ده‌ف، ب حال كه‌فت، وه‌ختێ بچويك بووى گۆت: ئه‌ڤه يێ جوره‌يجيه، هاتنێ و ئينانه خوارێ، و سه‌ومه‌عا وى هه‌رِفاند، و ده‌ستهاڤێتنێ قوتان، گۆت: هه‌وه خێره؟ گۆتن: ته زنا يا دگه‌ل ڤێ ده‌همه‌ن پيسێ كرى، بچويكه‌ك يێ ژ ته بووى، گۆت: كا بچويك؟ بچويك ئينان، گۆت: من بهێلن حه‌تا ئه‌ز نڤێژێ بكه‌م، نڤێژ كر، وه‌ختێ خلاسكرى هاته ده‌ف بچويكى و ده‌ستێ خۆ ل زكێ ويدا و گۆت: بچويكۆ.. بابێ ته كيه؟ بچويك ئاخف و گۆت: بێڤانێ شڤانه، ئينا به‌رێ خۆ دانه جوره‌يجى ماچيكرن و خۆ تێرا حسين، و گۆتن: دێ سه‌ومه‌عا ته بۆ ته ب زێرى ئاڤاكه‌ين، گۆت: نه ، ب ته‌قنێ وه‌كى به‌رێ كا يا چاوا بى بزڤرينن، وه‌كرن. وه‌خته‌كى بچويكه‌كى شيرێ ده‌يكا خۆ دخوار، زه‌لامه‌كى سه‌ر و سيما جوان و ماقويل و ل ده‌واره‌كێ خورت و لاو سويار بۆرى، ده‌يكا وى گۆت: يا خودێ كورێ من وه‌كى ڤى لێ بكه، بچويكى چچك به‌ردا و زڤرى به‌رێ خۆ دايێ و گۆت: يا خودێ من وه‌كى وى لێنه‌كه، و زڤرى چچكيڤه و شير خوار، هه‌روه‌كى ئه‌ز يێ به‌رێ خۆ دده‌مه پێغه‌مبه‌رێ خودێ (سلاڤێت خودێ لێ بن) و ئه‌و يێ به‌حسێ شيرخوارنا وى ب تلا خۆ يا شه‌هدێ دكه‌ت و دكه‌ته د ده‌ڤێ خۆدا و دمێژيت. گۆت: د به‌ر جاريه‌كێرا بۆرين، هنده‌كان دقوتا و دگۆتن: ته زنا يا كرى و ته دزى يا كرى، و وێ گۆت: خودێ به‌سى منه و ئه‌و باشترين پشته‌ڤان و پارێزكاره. ده‌يكا وى گۆت: يا خودێ كورێ من وه‌كى ڤێ لێ نه‌كه‌ى، شيرخوارن هێلا و به‌رێ خۆ دايێ و گۆت: يا خودێ تو من وه‌كى ڤێ لێ بكه‌ى (ئانكو من ژى بێ گونه‌هكه وه‌كى ئه‌ڤه يا بێ گونه‌ه). ل ڤێرێ دگه‌ل ئێكدوو ئاخفتن: ده‌يكێ گۆت: زه‌لامه‌كێ سه‌روبه‌ر جوان بۆرى من گۆت: يا خودێ كورێ من وه‌كى ڤى لێ بكه، ته گۆت: يا خودێ من وه‌كى وى لێ نه‌كه، و ئه‌م د به‌ر ڤێ جاريێرِا بۆرين و هنده‌كان دقوتا و دگۆتنێ: ته زنا يا كرى، ته دزى يا كرى، من گۆت: يا خودێ كورێ من وه‌كى ڤێ لێ نه‌كه، ته گۆت: يا خودێ من وه‌كى ڤێ لێ بكه؟ گۆت ب راستى ئه‌ڤ زه‌لامه دژمنێ حه‌قيێ و زۆردار بوو، من گۆت: يا خودێ من وه‌كى وى لێ نه‌كه، و ئه‌ڤێ دبێژنێ ته زنا يا كرى و زنا نه‌كريه، و ته دزى يا كرى و دزى نه‌كريه، من گۆت: يا خودێ من وه‌كى ڤێ لێ بكه.
به‌لێ ئه‌و نفرينا ژ نه‌هه‌ق دهێته‌كرن و ل سه‌ر تشته‌كێ نه‌هه‌ق خودێ قه‌بويل ناكه‌ت و دادپه‌روه‌ريا خودێ ژ هندآ مه‌زنتره ئه‌و نفرينا نه‌هه‌ق قه‌بويل به‌كه‌ت و ده‌يبابێت ب دورستى ب رۆلێ خۆ رادبن نفرينا ناكه‌ن، و نه‌هاتيه زانين پێشايێت مه نفرين ل عه‌يالێ خۆ كربن، له‌وا پێدڤيه ئه‌م چاڤ ل وان بكه‌ين و دوعا چاكى و باشيێ بۆ بكه‌ين نه نفرينا ل وان بكه‌ين، چونكى نفرين جارێ نه‌سنجه‌كێ جوانه و شوينوارێت خراب پاش خۆ دهێليت و نه‌رێكه‌كا دورسته بۆ په‌روه‌رده‌كرنێ، و خودێ چێتر دزانيت.
