ب / هه‌كه ژ بێخيره‌تى نڤێژان نه‌كه‌ت، دويف بۆچۆنا دورستتر ژ گۆتنێت زانايان نابيته كافر، و ژ ئيسلامێ نا ده‌ركه‌ڤيت، به‌لێ ترسا د ڤێرێدا هه‌كه ژ بآ باوه‌رى نڤێژان نه‌كه‌ت، هنگى ئه‌و ژ موسلمانان ناهێته هه‌ژمارتن، و هه‌كه وى چو ده‌ستويريێت شه‌رعى نه‌بن يێت رۆژى خوارنێ نابيت هوين خوارنێ بۆ چێكه‌ن و بده‌نێ، دڤێت ئه‌و ب رۆژ خزمه‌تا خۆ بكه‌ت و خوارنێ بۆ خۆ دورستكه‌ت، به‌لێ خرابيا بابێ بۆ هه‌وه دورست ناكه‌ت هوين دگه‌ل خراب ببن، يان زڤر دگه‌ل باخڤن، يان هزرا ده‌رێخستنا وى بكه‌ن، خودێ مه‌زن دبێژيت: ((وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا وَصَاحِبْهُمَا فِي الدُّنْيَا مَعْرُوفًا)) و ئه‌گه‌ر ده‌يبابێت ته مانه ب ته‌ڤه، ته د به‌ر هندێرا بكه‌ن تو تشته‌كى بۆ من بكه‌يه هه‌ڤپشك تو چو ژێ نه‌زانى، گوهێ خۆ نه‌ده وان، و د دنيايێدا ب قه‌نجى و باشى دگه‌ل وان ببۆرينه، خۆ ژ وان دوير نه‌ئێخه، و يێ باشبه دگه‌ل وان، به‌س گوهداريا وان د شركێدا نه‌كه. باشه هه‌كه نه‌دورست بيت ئه‌م دگه‌ل ده‌يبابان خراب بين و ئه‌و موشرك و د سه‌ر موشركيا خۆرا ژى بميننه ب ته‌ڤه و ب هه‌مى شيانا خۆڤه ته ژى د به‌ر شركێرا ببه‌ن، پا چاوا دورسته ئه‌م وان ده‌ربێخين! ئه‌ز هه‌وه شيره‌ت دكه‌م هوين زێده د خزمه‌تا ڤى بابيدا بن، به‌لكى بشێن دلێ وى نه‌رمكه‌ن، و رزگاركه‌ن بۆ خۆ تۆبه بكه‌ت به‌رى بمريت، و ئه‌و يآ هۆسا پتر خه‌مێ ژێ بخۆن، و خه‌ما وى بهه‌لگرن، و دوعا بۆ بكه‌ن خودێ وى چێكه‌ت و بزڤرينيت، و بلا پێشه‌وا و چاڤلێكريێ هه‌وه ئيبراهيم پێغه‌مبه‌ر بيت (سلاڤێت خودێ لێ بن)، بابێ وى چه‌ندێ خراب بوو دگه‌ل و ئه‌و به‌رامبه‌ر يێ چاوا بوو. خودێ مه‌زن د سۆره‌تا مه‌ريه‌مدا دياردكه‌ت بابێ وى هندى كه‌رب ژێ راكر ب ناڤ گازيكرێ و نه‌گۆت كورێ من.. و گه‌ف لێ كرن هه‌كه ئه‌و رێكا وى بهێليت دێ به‌ربارانكه‌ت و ژێ خواست ژ مالا وى ده‌ركه‌ڤيت و وى بهێليت، به‌لێ ئه‌و هه‌ر يێ نه‌رم و حه‌ليم بوو دگه‌ل بابێ خۆ ،و ڤى هه‌لويستێ بێ ره‌حم و دلۆڤانى، ئه‌و ژ كراسآ دلۆڤانيێ و ره‌حمێ نه‌ده‌رێخست، هه‌ر دگۆت يا ئه‌به‌تى.. يا ئه‌به‌تى ئانكو: بابێ من.. بابێ من، خودێ دبێژيت: ((قَالَ أَرَاغِبٌ أَنتَ عَنْ آلِهَتِي يَا إِبْرَاهِيمُ لَئِن لَّمْ تَنتَهِ لَأَرْجُمَنَّكَ وَاهْجُرْنِي مَلِيًّا ))(( قَالَ سَلَامٌ عَلَيْكَ سَأَسْتَغْفِرُ لَكَ رَبِّي إِنَّهُ كَانَ بِي حَفِيًّا)) بابێ وى گۆتێ: هه‌ى ئيبراهيم ئه‌رێ تو به‌رێ خۆ ژ په‌رستيێت من وه‌ردگێرِى؟ ئه‌گه‌ر ئه‌ڤا تو دبێژى تو نه‌هێلى، ئه‌ز دێ ته ب به‌ران كوژم، و وه‌خته‌كێ درێژ ژى من بهێله. ئيبراهيم پێغه‌مبه‌رى (سلاڤێت خودێ لێ بن) گۆت: سلاڤ ل سه‌ر ته بن ب خاترا ته، ئه‌ز دێ داخوازا لێنه‌گرتنێ بۆ ته ژ خودايێ خۆ كه‌م، خودايێ من زێده خێر و كه‌ره‌م، يێت دگه‌ل من كرين، و زێده چاڤدێريا من يا كرى، و خودێ چێتر دزانيت.
