ب / ده‌ستپێكێ دڤێت ئه‌م گوهداريا هه‌ردووكان بكه‌ين، و نه‌گوهداريا وان نه‌كه‌ين، و باش بين بۆ وان و د خراب نه‌بين دگه‌ل وان، و دلێ وان نه‌هێلين هندى فه‌رمانا وان بآ ئه‌مريا خودآ تێدا نه‌بيت، يان مافێ وان يێ شه‌رعى نه‌بيت، و هه‌كه هه‌ردووكان فه‌رمانه‌ك كر و تو نه‌شێى د ئێك ده‌مدا هه‌ردوويان رازيكه‌ى چونكى هه‌ڤدژن و گوهداريا ڤى نه‌گوهداريه بۆ ڤآ، و گوهداريا ڤێ نه‌گوهداريه بۆ ڤى، هنگى دڤێت ئه‌م به‌رێ خۆ بده‌ينه فه‌رمانا وان كا يا كێ رازيبوونا خودێ تێدايه، و يا كێ نه‌رازيبوون تێدايه، هه‌كه فه‌رمانا هه‌ردووكان نه‌دگه‌ل فه‌رمانا خودێ و پێغه‌مبه‌رى بيت هنگى نابيت مرۆڤ گوهێ خۆ بده‌ته چو ژ وان، و گوهداريا وان بكه‌ت، و گوهداريا وان گونه‌هكارى و بآ ئه‌مريا خودێيه، چونكى پێغه‌مبه‌ر (سلاڤێت خودێ لێ بن) دبێژيت: ((لا طاعَة لِبَشَرٍ فِي مَعْصِية اللَّهِ))، و نابيت گوهداريا كه‌سێ بێته‌كرن د بێ ئه‌مريا خودێدا، ئه‌ڤه هه‌كه فه‌رمانا هه‌ردووكان نه‌گوهداريا خودێ تێدا بيت، و هه‌كه وه‌سا نه‌بوو به‌رێ خۆ بدێ كا يا كێ ژ وان د گوهداريا خودێ دايه و يا كێ د نه‌گوهداريا خودآ دايه، گوهێ خۆ بده وى يآ فه‌رمانا وى د گوهداريا خودێدا چ باب بيت چ ده‌يك، و هه‌كه فه‌رمانا هه‌ردووكان بآ ئه‌مرى تێدا نه‌بيت هنگى به‌رێ خۆ بدێ يا كێ پتر د رازيبوونا خودێدايه گوهێ خۆ بده وى ده‌يك بيت يان باب، و هه‌كه هه‌ردوو وه‌كى ئێك بن و تو نه‌شێى د ئێك ده‌مدا گوهداريا هه‌ردووكان بكه‌ى و هه‌ردووكان رازيكه‌ي هنگى هه‌لسه‌نگينه گوهدارى و نه‌گوهداريا كێ دێ بيته ئه‌گه‌رێ خرابيه‌كا پتر هنگى خرابيا پتر بده پاش و پێ نه‌كه، و هه‌كه تو ڤێ نه‌شياى و فه‌رمانا هه‌ردووكان د ترازيێدا وه‌كى ئێكه.. ئها د ڤى كراسيدا زانا نه‌ئێكن كا گوهداريا كآ پێشكه‌فتيتره ل سه‌ر يێ دى، جمهورێ زانايان هه‌روه‌كى خودانێ (سبل السلام)ێ ڤه‌دگوهێزيت دگه‌ل هندێنه مافێ ده‌يكێ پێشكه‌فتيتره ل سه‌ر يێ بابێ و دڤێت گوهداريا ده‌يكێ بێته‌كرن ژبه‌ر ڤه‌گێرا بوخارى و موسلمي ژ ئه‌بو هوره‌يره (خودێ ژێ رازى بيت) دبێژيت: (جَاءَ رَجُلٌ إلى رسول اللَّه صَلّى اللهُ عَلَيْهِ وسَلَّم فقال: يا رسول اللَّه مَنْ أَحَقُّ النَّاسِ بحُسنِ صَحَابَتي؟ قال: أُمُّك قال: ثمَّ منْ؟ قال: أُمُّكَ قال: ثمَّ مَنْ؟ قال: أُمُّكَ قال: ثمَّ مَنْ؟ قال: أَبُوكَ) زه‌لامه‌ك هاته ده‌ف پێغه‌مبه‌رێ خودێ (سلاڤێت خودێ لێ بن) و گۆت: يا پێغه‌مبه‌رێ خودێ.. كى ژ مرۆڤان پتر هه‌ژى هه‌ڤال باشيا منه؟ گۆت: ده‌يكا ته، گۆت: پاشى كى؟ گۆت: ده‌يكا ته، گۆت: پاشى كى؟ گۆت: ده‌يكا ته، گۆت: پاشى كى؟ گۆت: بابێ ته.
و ل ده‌ف هنده زانايێت دى دێ گوهێ خۆ ده‌ته بابێ خۆ ،و گوهداريا بابێ پێشكێشتره، چونكى هه‌كه فه‌رمانا وان هه‌ردووكان وه‌كى ئێك بيت هنگى دڤێت ده‌يك گوهێ خۆ بده‌ته زه‌لامێ خۆ و فه‌رمانه‌كێ نه‌كه‌ت دژاتيا فه‌رمانا زه‌لامێ وێ تێدابيت، چونكى گوهداريا ژنێ بۆ زه‌لامى ئه‌ركه ل سه‌ر ژنێ. زه‌لامه‌ك هاته ده‌ف ئيمام مالك ل مه‌دينێ، گۆتێ: بابێ من يێ ل سودانێ و دڤێت ئه‌ز بچمه ده‌ف و ده‌يكا من ناهێليت، ئه‌ز چ بكه‌م و گوهێ خۆ بده‌مه كێ؟ ئيمام مالك گۆت گوهداريا بابێ خۆ بكه و دلێ ده‌يكا خۆ نه‌هێله ئان ب هه‌ر ره‌نگه‌كێ هه‌بيت ده‌يكا خۆ رازيكه و د به‌را بكه و بێژه هه‌تا تو رازي دكه‌ى خۆ هه‌كه تو وێ ژى دگه‌ل خۆ ببه‌ى، و خودێ چێتر دزانيت.
