ب / يێ گوهداريا ڤه‌كرى بۆ دهێته‌كرن خودێ و پێغه‌مبه‌رن به‌س، و گوهداري ژبلى وان يا گرێدايه ب هندێڤه بێ ئه‌مريا خودێ تێدا نه‌بيت و زيان تێدا نه‌بيت و ده‌يبابان ماف نينه خورتيێ ل كچ و كورێت خۆ بكه‌ن به‌لێ مافێ وانه و وان شيره‌ت و ئاراسته‌كه‌ن و كارێ خێرێ بۆ وان بێژن و ب نه‌رمى د به‌ر وانرا بكه‌ن و بێژن و رازى بكه‌ن و بۆ وان ـ ب ئاخفتنا شرين و نه‌رم ـ دياركه‌ن خێرا وان يا د بۆچۆنا ده‌يباباندا و يا ئه‌و دبينن، و هه‌كه شيان وان ل به‌ر بينن باشه و هه‌كه نه، بۆ وان نينه ئه‌و خورتيێ ل وان بكه‌ن، چونكى شويكرن يان ژنئينان نه‌برياره‌كا ئاساييه به‌لكى برياره‌كا چاره‌نڤێسه، و دڤێت كچ و كوران ديتن و بۆچۆنا خۆ هه‌بيت، و هه‌كه كور و كچ ژى د ژير بن دێ باش هزرا خۆ د حه‌زكرنا ده‌يبابێت خۆدا كه‌ن، و هندى شيان هه‌بن دلێ وان ناهێلن، و هه‌كه وان بۆچۆنه‌كا جودا ژى هه‌بيت دێ ب نه‌رمى و ب خۆشى و بێ دلمان بۆ ده‌يبابێت خۆ دياركه‌ن خێرا وان نه د بريارا واندايه، و هه‌كه بۆ وان ئاشكرا بوو بريارا وان نه د خێرا كچ و كورێت واندايه ده‌ف وان گه‌له‌كا ب ساناهيه ركمانێ نه‌كه‌ن، چونكى به‌راهي و دويماهيا وان چو مه‌خسه‌د و مه‌به‌ست ب وێ فه‌رمانێ نينن خێرا وان نه‌بيت، و به‌لگه ل سه‌ر هندێ ده‌يبابان ماف نينه خورتيێ ل كچێ بكه‌ن و پێ ل حه‌زكرنا وێ بدانن و پشت گوهێت خۆڤه باڤێن، به‌لگه ژى ئه‌ڤه‌يه:
كچه‌ك هاته ده‌ف پێغه‌مبه‌رێ خۆشتڤى (سلاڤێت خودێ لێ بن) به‌لێ نه‌ديت ئينا چێرۆكا خۆ بۆ ده‌يكا مه موسلمانان عائيشايێ (خودێ ژێ رازى بيت) ڤه‌گێرا، گۆت: بابێ من ئه‌ز يا دايمه برازايێ خۆ و ب دلێ من نينه و دڤێت ب من بێ بهاييا خۆ راكه‌ت، عائيشايێ (خودێ ژێ رازى بيت) گۆتێ: روينه خوارێ هه‌تا پێغه‌مبه‌ر (سلاڤێت خودێ لێ بن) دهێت و بێژێ، پێغه‌مبه‌ر (سلاڤێت خودێ لێ بن) هات و گۆتێ، ئينا پێغه‌مبه‌رى (سلاڤێت خودێ لێ بن) فرێكره دويف بابێ وێرا و گۆته كچێ: ((ڤێ گاڤێ تو يا ب كه‌يفا خۆيى ته دڤێت لێڤه ببه و ته دڤێت رازى ببه))، ئينا كچێ گۆت: ئه‌ز يا رازيمه ب وى تشتێ بابێ من بۆ من دڤێت به‌لێ من دڤيا ئه‌ز نيشا كچ و ژنێت موسلمانان بده‌م و وان ئاگه‌هداركه‌م كو كه‌سآ حه‌ق نينه خورتيێ ل وان بكه‌ت، و خودێ چێتر دزانيت.
