ب: دڤێت مرۆڤ گه‌له‌كێ هشیاری گوهداریا دایبابێت خۆ بیت؛ چونكی خودایێ مه‌زن د پتر دئایه‌ته‌كێدا به‌لكی دگه‌‌له‌ك ئایه‌تاندا ئه‌مر ب گوهداریا خۆ و باشیكرنا گه‌ل دایبابان دویڤكرا ئینایه و پێكڤه گرێداینه، ڤێجا هندی تو بشێی گوهداریا بابێ خۆ بكه‌ی بكه، هندی داخوازیا وی زیانێ نه گه‌هینیته ته و گونه‌ھ تێدا نه‌بیت؛ چونكی پیغه‌مبه‌ر سلاڤێت خودێ ل سه‌ربن دڤه‌گێره‌كا دورستدا دبێژیت: (إنما الطاعة بالمعروف) و دڤێت ئه‌مر و فه‌رمان و داخوازیێت دایبابان ژ مه‌عروفی ده‌رنه‌كه‌ڤن و مه‌عروف كارێ دورسته، و گه‌ل شه‌ریعه‌تی بهێن، و نابیت زیانا عه‌یالی ژی تیدا بیت؛ چونكی پێغه‌مبه‌ر سلاڤێت خودێ ل سه‌ربن دبیژیت: (لا ضرر ولا ضرار) و فه‌رمان و داخوازیا دایبابان ئێك ژ ڤان سێیانه ئێك: فه‌رمان و داخوازیا وان مفای ب گه‌هینیته وان و زیانێ نه‌گه‌هیته كوری، هنگی دڤێت گوهداریا وان بكه‌ت، دوو: فه‌رمان و داخوازیا وان مفای دگه‌هینیته وان و زیانێ دگه‌هینیته عه‌یالی، هنگی ل سه‌ر واجب نینه گوهداریا وان بكه‌ت، سێ: فه‌رمان و داخوازیا وان چ مفایێ وان نا ده‌ت واجب نینه گوهداریا وان بێته‌كرن، پشتی ڤێ هه‌كه چونا ته مفایێ وان تێدابیت و زیانا ته تێدا نه‌بیت، گوهێ خۆ بده بابێ خۆ و هه‌ره گوندی، و هندی ته پێ چێببیت دلێ بابێ خۆ نه‌هێله، جه‌حێله‌ك هاته ده‌ف ئیمام مالك ل مه‌ده‌ینه‌یێ، گۆتێ: بابێ من یێ چویه سودان، و دبێژته من وه‌ره ده‌ف من، و دایكا من حه‌ز ناكه‌ت، ئه‌ز چ بكه‌م؟ گۆت: گوهێ خۆ ب ده بابێ خۆ و دلێ دایكا خۆ ژی نه هێله، ئانكو رازیكه، تو ژی هه‌كه ته نه‌ڤیا بچی و زیانا ته تێدابیت بابێ خۆ قانعكه و رازیكه، ب هه‌ر رێكه‌كا هه‌بیت، خو هه‌كه تۆ ئێكێ ب حه‌كه‌م دناڤبه‌را خۆ ویدا بدانی، و ئه‌ڤه نه گۆنه‌هه، دڤه‌گێرا بوخاریدا هاتیه مەعەنێ کورێ یەزیدی ، خودێ ژ وان رازی بیت، گۆت: بابێ من ھندە دینار دەرێخستن بکەتە خێر، ئینا دانانە دەف مرۆڤەکی ل مزگەفتێ، ئەز ھاتم من ھەلگرتن و ئینان، ئینا گۆت: ب خودێ مەخسەدا من تو نەبووی، ئینا من دەعوە ل دەف پێغەمبەری لێ کر، سلاڤێت خودێ ل سەر بن ئینا گۆت: تە چ ئنیەت ئینایە یا یەزید ئەو بۆ تەیە و تە چ ھەلگرتییە یا مەعەن ئەو بۆ تەیە.
ئبن حه‌جه‌ر خودێ ژێ رازی بیت دبێژیت: نه ژ دلهێلانا دایبابانه مرۆڤ داخوازا حه‌كمداریێ بكه‌ت، هه‌كه فه‌رمانه‌ك كر زیانا عه‌یالی تێدا بیت؛ چونكی گه‌له‌ك صه‌حابان ئه‌ڤه یا كری، و كارێ دایبابێت خۆ یێ گه‌هاندییه پێغه‌مبه‌ری سلاڤێت خودێ ل سه‌ربن. و خودێ چێتر دزانیت.
