ب / تێگه‌هشتنه‌كا نه‌يا دورست بۆ ڤێ ئايه‌تێ يا هه‌ى ده‌مێ خودێ مه‌زن دبێژيت: ((سَابِقُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ذَٰلِكَ فَضْلُ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ )) گه‌لى خودان باوه‌ران له‌زێ ل ژێبرنا گونه‌هان ژ به‌رێ خودايێ خۆڤه بكه‌ن، و له‌زێ ل وێ به‌حه‌شتێ بكه‌ن ئه‌وا فره‌هيا وێ هندى فره‌هيا عه‌رد و عه‌سمانى، ئه‌و به‌حه‌شتا بۆ وان هاتيه به‌رهه‌ڤكرن ئه‌وێت باوه‌رى ب خودێ و پێغه‌مبه‌رێت وى ئينايين، ئه‌ڤه كه‌ره‌ما خودێيه دده‌ته وى يێ وى بڤێت، و خودێ خودانێ كه‌ره‌ما مه‌زنه.
هه‌ژيه بێژين گه‌له‌ك هزر دكه‌ن به‌حه‌شت يا د ناڤبه‌را عه‌ردوو عه‌سماناندا و ئه‌و ب خۆ وه‌سا نينه، قورئان به‌حسێ به‌رفره‌هيا به‌حه‌شتێ دكه‌ت و ئاشكرا دكه‌ت به‌رفره‌هيا وێ هندى به‌رفره‌هيا عه‌رد و عه‌سمانانه، و وه‌كى دى چێكريه‌كا جودايه گرێدان ب عه‌رد و عه‌سمانانڤه نينه هه‌تا ئه‌م بێژين باشه هه‌كه ئه‌و د ناڤبه‌را عه‌رد و عه‌سماناندا بيت پا جه‌هنه‌م ل كيرێيه. و به‌حه‌شت دكه‌ڤيته بن عه‌رشێ خودێ مه‌زنڤه هه‌روه‌كى حه‌ديسێت دورست ڤێ چه‌ندێ دياردكه‌ن و من چو ئه‌سه‌رێت دورست نه‌ديتينه گۆمانبر بن كا جهێ جه‌هنه‌مێ ل كيرێيه. ئه‌سه‌رێت هاتين عه‌ليێ كورێ ئه‌بو تالبى (خودێ ژێ رازى بيت) گۆته كه‌عبێ ئه‌حبار: جه‌هنه‌م ل كيرێيه؟ گۆت: يا ل بنێ ده‌رياى، ئينا گۆت: ئه‌ز دبينم راست دبێژيت، پاشى ئه‌ڤ ئايه‌ته خواند: ((وَالْبَحْرِ الْمَسْجُورِ )) و ((وَإِذَا الْبِحَارُ سُجِّرَتْ عِ )) و د حه‌ديسا ئيسرا و ميعراجێدا ده‌مێ پێغه‌مبه‌رێ خۆشتڤى (سلاڤێت خودێ لێ بن) چۆيه عه‌سمانان خودێ ديمه‌نێت جه‌هنه‌مێ نيشا دان و خودێ ب دورستى دزانيت كا ل كيرێيه، و خودێ چێتر دزانيت.
