ب / مه باوه‌رى يا هه‌ى ئه‌وێت باوه‌رى ئينايين و خۆ سپارتينه ئه‌مرێ خودێ. خودێ دێ بێژيته وان هه‌رِنه د به‌حه‌شتێدا هوين و هه‌ڤسه‌رێت خۆ، دێ خۆشيان تێدا بينن ب ره‌نگه‌كێ وه‌سا كو ئه‌و خۆشى ل سه‌روچاڤێت هه‌وه ديار ببيت. و ئامانێت زێرى يێت خوارنێ و په‌رداغێت ڤه‌خوارنا پاقژ ل به‌ر وان دئێنه گێران، و دل چ بخوازيت و چاڤ بچنه چ بۆ وان ئه‌و د به‌حه‌شتێدا يێ هه‌ى، و هه‌روهه‌ر دێ تێدا مينن. و ژبلى خوارن و ڤه‌خوارنێ گه‌له فێقى و ژ هه‌مى ره‌نگان ژى بۆ وان يێت هه‌ين و ژێ دخۆن و د پالداينه ل سه‌ر ته‌ختێت نه‌رم و خۆش و چارچه‌ڤكرى د به‌حه‌شتێدا، نه گه‌رمێ دبينن نه سه‌رمايێ. و سيبه‌را داروبارێ به‌حه‌شتێ نێزيكى وانه، و فێقى و به‌رێ وان داروباران يێ به‌رده‌سته و خزمه‌تكار، ئامانێت زيڤى و شويشه و په‌رداغێت ته‌نك و زه‌لال، ل به‌ر وان دگێرِن؛ شويشه ژ زيڤينه و به‌س تێرا وان تێ هه‌يه. و ئه‌ڤ خودان باوه‌ره د به‌حه‌شتێدا ژ په‌رداغه‌كي ڤه‌دخۆن، تێكه‌لى زنجه‌بيلێ. ژ كانيه‌كێ ڤه‌دخۆن دبێژنێ سه‌لسه‌بيل ئانكو: خۆش و نه‌رم و شرين و سڤك و هنده‌ك خزمه‌تكارێت بچويك ل به‌ر خزمه‌تا وان دگه‌رن، هه‌روهه‌ر تێدانه، و هه‌روه‌كى خۆ دمينن، ئه‌گه‌ر تو ببينى دێ بێژي لۆلۆ و مراريێت به‌لاڤن و ئه‌گه‌ر تو خۆشيێت به‌حه‌شتێ ببينى، دێ بينى ملكه‌كێ به‌رفره‌هه، و بێ حسێب خۆشينه. و جلكێت ب خه‌مل و كه‌سك ل به‌ر وانن، ژ ئارمويشێ ته‌نك و ستوير، و بازنێت زێرى دكه‌نه ده‌ستێت خۆ، و خودايێ وان ڤه‌خوارنه‌كا زه‌لال و پاقژ دێ ده‌ته وان. خودێ مه‌زن دێ بێژيته وان: ئها ئه‌ڤه خه‌لاتێ بزاڤا هه‌وه‌يه، مه بزاڤا هه‌وه قه‌بوول كر و مه خه‌لات كر.
ڤێجا دلێ وان چ بخوازيت و چاڤێت وان بچيته چ، خودێ دێ ده‌ته وان، و ژ وان نيعمه‌تان خودێ دێ عه‌يالێ وان هه‌رچه‌نده هند تاعه‌ت و عيباده‌تێ وه‌سا نه‌كريه ژى به‌لێ خودێ ل سه‌ر خاترا وان و ژبه‌ر قه‌درگرتنا وان دێ دوينده‌ها وان گه‌هينيته وان. خودێ مه‌زن دبێژيت: ((وَالَّذِينَ آمَنُوا وَاتَّبَعَتْهُمْ ذُرِّيَّتُهُم بِإِيمَانٍ أَلْحَقْنَا بِهِمْ ذُرِّيَّتَهُمْ وَمَا أَلَتْنَاهُم مِّنْ عَمَلِهِم مِّن شَيْءٍ كُلُّ امْرِئٍ بِمَا كَسَبَ رَهِينٌ)) و ئه‌وێت باوه‌رى ئينايين و دوينده‌ها وان ژى ل سه‌ر باوه‌ريێ رێكا وان گرتى، مه دوينده‌ها وان گه‌هانده وان د به‌حه‌شتێدا، دا چاڤێت وان ب دوينده‌ها وان رۆن ببن و كه‌يفا وان بێت، و مه چو ژ كار و كريارێت وان كێم نه‌كر، هه‌ر ئێك ب كار و كريارێت خۆڤه يێ گرێدايه.
و دويف به‌لگه و ده‌ليلێت به‌رده‌ستێ مه، عه‌يال بوون د به‌حه‌شتێدا نينه، چونكى هه‌لگرتن و دانانا عه‌يالى، ده‌يك نه‌خۆشى ل سه‌ر نه‌خۆشيێ دبه‌ت، و د به‌حه‌شتێدا نه‌خۆشى نينن، و عه‌يال دبيت مرۆڤ حه‌ژێ دكه‌ت ژبه‌ر هه‌وجه‌يێ و د به‌حه‌شتێدا هه‌وجه‌يى نينه، كا چ دڤێت يێ به‌رده‌سته به‌لێ دگه‌ل هندێ ژى دا مرۆڤ تێر ببيت و چاڤێ مرۆڤى نه‌مينيته ب بچويكانڤه خودێ دێ هنده خزمه‌تكارێت بچويك و جوان و ئێك ده‌ست د به‌حه‌شتێدا په‌يداكه‌ت ل دۆر به‌حه‌شتيان بزڤرن و به‌ر بزڤرن و ئاڤێ ل به‌ر بگێرينن دێ بێژى لۆلۆنه هندى هند د جوانن. خودێ دبێژيت: ((وَيَطُوفُ عَلَيْهِمْ وِلْدَانٌ مُّخَلَّدُونَ إِذَا رَأَيْتَهُمْ حَسِبْتَهُمْ لُؤْلُؤًا مَّنثُورًا )) و هنده‌ك خزمه‌تكارێت بچويك ل به‌ر خزمه‌تا وان دگه‌رن، هه‌روهه‌ر تێدانه، و هه‌روه‌كى خۆ دمينن، ئه‌گه‌ر تو ببينى دێ بێژێ لۆلۆ و مراريێت به‌لاڤن. ئه‌ڤ بچويكه چاڤێت مرۆڤى تێر دكه‌ن و حه‌زا بچويكان پرِ دكه‌ن، و خودێ چێتر دزانيت.
