ب / هه‌ركه‌سێ رێكێت دورست يێت ده‌رمانكرن و نوژداريێ بگريت چ يێت زانستى بن، يان يێت پێغه‌مبه‌راتيێ بن، دورسته و چو تێدا نينه، و مرۆڤێ خودێ نياس و ژ خودێ ترس بۆ مرۆڤى دوعايان بكه‌ت، يان ب مرۆڤيڤه بخوينيت ـ پێڤه‌خواندنه‌كا دورست و شه‌رعى ـ دورسته و چو تێدا نينه، ئه‌ڤه پێغه‌مبه‌رێ خودێ (سلاڤێت خودێ لێ بن) دگه‌ل كو پێغه‌مبه‌رێ خودێ بوو، گۆته عومه‌رێ كورێ خه‌تابى (خودێ ژێ رازى بيت): (لا تنسانا من دعائك يا اخي) من ژ دوعايێت خۆ ژبيرنه‌كه يا برايێ من. ديسا پێغه‌مبه‌رى (سلاڤێت خودێ لێ بن) گۆته عومه‌رێ كورێ خه‌تابى (خودێ ژێ رازى بيت): ((دێ ئێكێ خه‌لكێ يه‌مه‌نێ هێته مه‌دينێ ناڤێ وى ئووه‌يسه هه‌كه ته ديت يا عومه‌ر ژێ بخوازه دوعا بۆ ته بكه‌ت)) عومه‌رێ كورێ خه‌تابى (خودێ ژێ رازى بيت) ب سالا خۆ ل هيڤيا ڤى مرۆڤى گرت و دويفچۆنه‌كا باش و درێژ بۆ كر هه‌تا ب سه‌ر هه‌لبووى دا ژێ بخوازيت دوعا بۆ بكه‌ت. ڤێجا ئێك ب دينى و ته‌قوايێ يێ به‌رنياس بيت مرۆڤ ژێ بخوازيت دوعا بۆ مرۆڤى بكه‌ت. به‌لێ بۆ مه ژ شه‌ريعه‌تى نه‌هاتيه ئێك پێغه‌مبه‌رى (سلاڤێت خودێ لێ بن) د خه‌ونا خۆدا ببينيت و ده‌ستێ وى ببيته ده‌ستێ سلامه‌تيێ بۆ هه‌مى ئێشان ئه‌ڤێ چو بنيات و چو راستى بۆ نينه و نه‌باشه مرۆڤ بچيته ده‌ف ڤان ره‌نگه مرۆڤان، به‌لێ هه‌كه يێ ديندار بيت يان يا ديندار بيت دورسته مرۆڤ ژێ بخوازيت دوعايان بۆ مرۆڤى بكه‌ت و دورسته مرۆڤ ژێ بخوازيت ب مرۆڤيڤه بخوينيت هه‌كه مرۆڤ بزانيت پێڤه خواندنێت دورست دخوينيت نه‌يێت كه‌س تێنه‌گه‌هيت و سێربه‌نديێ، و دگه‌ل هندێ ژى پێغه‌مبه‌رى (سلاڤێت خودێ لێ بن) به‌رێ مه يێ دايه ده‌رمان وه‌رگرتنآ و رێكا نوژدارێ بسپۆر بگرين، دبێژيت: (تداووا عباد الله فان الله تعالى ما وضع داء الا ووضع له دواء) خۆ ده‌رمانكه‌ن گه‌لى به‌نده‌يێت خودێ، ب راستى خودێ چو ده‌رد نه‌داينه هه‌كه ده‌رمان بۆ نه‌دانابيت، و خودێ چێتر دزانيت.
