ب / پێڤه‌خواندنا مرۆڤێت خودێ، و پارێزكار، و خودێ ترس، و موسلمان، و چاك، و دوعاكرن بۆ نه‌ساخي تشته‌كێ دورسته، و چو تێدا نينه، ب مه‌رجه‌كى ئه‌و پێڤه‌خواندن يا دورست بيت، و يا ئاشكرا بيت، هيڤيه خودێ دوعايێت چاكان قه‌بويل بكه‌ت، به‌لێ ته‌سليما ئێشێ هه‌روه‌كى ميراته‌ك ژ بابێ گه‌هشتيێ، كا چاوا هه‌ر ماله‌كێ هه‌بيت دگه‌هيتێ، چو بنياتێت دورست بۆ ڤێ چه‌ندێ نينن، نه‌يێ شه‌رعى و نه‌يێ زانستى، و هه‌كه وه‌با، دا كور و كچێت دوختۆر و نوژداران هه‌مى بنه دوختۆر و حه‌كيم و نوژدار، و دا ته‌سليما ئێشان ژ بابێت خۆ يێت دوختۆر وه‌رگرن، ئه‌وێت چاره‌سه‌ريا خه‌لكى دكرن، و ئه‌وێت ده‌ستێت وان د پيرۆز، و يا فه‌ره سه‌ر موسلمانى رێكێت دورست و زانستى بگريت بۆ چاره‌سه‌ريا ئێش و نه‌خۆشيێت خۆ، و دورسته ژ چاكان بخوازيت دوعا بۆ بكه‌ت يان پێڤه بخوينيت، به‌لێ دڤێت گه‌ل هندێ ژى رێكا دوختۆران بگريت، چونكى پێغه‌مبه‌رآ خۆشتڤى (سلاڤێت خودێ لێ بن) دبێژيت: (تداووا عباد الله فان الله تعالى ما وضع داء الا ووضع له دواء) خۆ ده‌رمانكه‌ن گه‌لى به‌نده‌يێت خودێ، ب راستى خودێ چو ده‌رد نه‌داينه هه‌كه ده‌رمان بۆ نه‌دانابيت، و خودێ چێتر دزانيت.
