ب / پێڤه‌خواندنا مرۆڤێت زانا، و پارێزكار و خودێ ترس، و موسلمان و، چاك، و ديندار، تشته‌كێ دورسته، و چو تێدا نينه، ب مه‌رجه‌كى ئه‌و پێڤه‌خواندن يا دورست بيت و يا ئاشكرا بيت، ديسا دوعاكرن تشته‌كێ باش و دورسته و هيڤيه خودێ دوعايێت چاكان قه‌بويل بكه‌ت، به‌لێ دڤێت ب دورستى ئه‌و مرۆڤ يێ زانا بيت، و چو تشتێت خه‌له‌ت نه‌كه‌ت و نه‌بێژيت، و چو تشتێت نه‌دگه‌ل شه‌ريعه‌تى نه‌كه‌ت و ده‌عوا زانينا غه‌يبێ و تشتێ ڤه‌شارتى نه‌كه‌ت و ده‌عوا هندێ نه‌كه‌ت دشێت فه‌رمانان ل جناوه‌ران بكه‌ت و چاوا بڤێت ب كار بينيت، هه‌كه وه‌كر هنگى بزانه ئه‌و نه‌زانايه و زانين يا ژ وى دويره، و ئه‌و يێ ژ زانينا شه‌رعى شويشتيه؛ چونكى ژبلى خودێ كه‌س زانينا ڤه‌شارتى و نه‌ديار نوزانيت. به‌رآ خۆ بدێ كا پێغه‌مبه‌رێ خودێ (سلاڤێت خودێ لێ بن) چ دبێژيت و ئه‌و ب خۆ ب وه‌حيێڤه يێ گرێداى بوو دگه‌ل هندێ ژى دبێژيت: ((ئه‌ز چو ژ غه‌يبێ نوزانم)) ڤێجا چاوا ئه‌ڤ مرۆڤه دێ زانن و دزيكه‌را دياركه‌ن چه‌ند د پارێزكار و دينداربن، خودێ مه‌زن دبێژيته پێغه‌مبه‌رێ خۆ (سلاڤێت خودێ لێ بن) بێژه: ((قُلْ لَا أَقُولُ لَكُمْ عِنْدِي خَزَائِنُ اللَّهِ وَلَا أَعْلَمُ الْغَيْبَ وَلَا أَقُولُ لَكُمْ إِنِّي مَلَكٌ إِنْ أَتَّبِعُ إِلَّا مَا يُوحَى إِلَيَّ قُلْ هَلْ يَسْتَوِي الْأَعْمَى وَالْبَصِيرُ أَفَلَا تَتَفَكَّرُونَ)) بێژه: ئه‌ز نابێژمه هه‌وه من خزينه و گه‌نجينه‌يێت خودێ يێت هه‌ين، و ئه‌ز غه‌يبێ (ڤه‌شارتيان) نوزانم، و ئه‌ز نابێژمه هه‌وه ژى ئه‌ز ملياكه‌تم، ژ وه‌حيا بۆ من هاتى پێڤه‌تر، ل دويف چو يێ دى ناچم، بێژه وان: ئه‌رێ يێ كۆره و يێ ب چاڤ وه‌كى ئێكن؟! ما هوين هزرا خۆ ناكه‌ن. و خودێ مه‌زن دبێژيت: ((وَعِنْدَهُ مَفَاتِحُ الْغَيْبِ لَا يَعْلَمُهَا إِلَّا هُوَ وَيَعْلَمُ مَا فِي الْبَرِّ وَالْبَحْرِ وَمَا تَسْقُطُ مِنْ وَرَقَةٍ إِلَّا يَعْلَمُهَا وَلَا حَبَّةٍ فِي ظُلُمَاتِ الْأَرْضِ وَلَا رَطْبٍ وَلَا يَابِسٍ إِلَّا فِي كِتَابٍ مُبِينٍ)) و كليلێت (خزينه‌يێت) غه‌يبێ (نه‌په‌نى و ڤه‌شارتيان) ل ده‌ف وينه و ژ وى پێڤه‌تر (ژ خودێ پێڤه‌تر) كه‌س پێ نوزانيت و خودێ تشتێ ل سه‌ر عه‌ردى و د ئاڤێدا هه‌ى دزانيت، و به‌لگه‌ك ژ جهێ خۆ ناكه‌ڤيت ئه‌گه‌ر پێ نه‌زانيت، و چو دندك د ناف ئه‌رديدا نينن، و چو ته‌ر و هشك نينن ئه‌گه‌ر ئه‌و نه‌زانيت، و د ده‌پێ پارستيدا يێ نڤێسى نه‌بيت. ڤێجا د شاره‌زا بن و بزانن دێ به‌رێ خۆ ده‌نه كێ؟ و دێ قه‌ستا كێ كه‌ن؟ هه‌كه يێ زانا بيت و ژ خودێ بترست دورسته بچنه ده‌ف و دوعا ژێ بخوازن، يان ب هه‌وه‌ڤه بخوينيت، چونكى زانينا وى يا دورست ناهێليت ئه‌و تشته‌كێ نه دگه‌ل شه‌رعي بكه‌ت، به‌لێ هه‌كه نه‌يێ هۆسا بيت هشياربن نه بچنه ده‌ف و نه باوه‌ريآ ب ئاخفتنێت وى بينن، و خودێ چێتر دزانيت.
