ب/ نڤيژا مرى ژ فه‌رزێت كيفائيه، ئانكو: ژ وان فه‌رزايه هه‌كه هنده‌ك پێ رابوون به‌سه، و ل سه‌ر يێت دى رادبيت، و هه‌كه كه‌س پێ نه‌رابوو، هنگى خه‌لكێ وێ ده‌ڤه‌رێ هه‌مى د گونه‌هكارن، و ب ڤى ره‌نگى دهێته كرن:
دێ جه‌نازه ل به‌رسينگێ ته بيت، و دێ ل نيڤا ته‌رمێ وى راوستى هه‌كه زه‌لام بيت، و هه‌كه ژن بيت دێ راستا ملێت وێ راوستى، و ئنيه‌تا خۆ ئينى كو نڤێژا جه‌نازه‌يه، و جهێ ئنيه‌تێ ژى دله، مه‌رج نينه ب ئه‌زمانێ خۆ بينى، و دێ چار ته‌كبيراتان ده‌ى و سه‌رپيان، ئانكو: ژپيانڤه. پشتى ته‌كبيرا ئێكێ دێ فاتحێ خوينى، و دگه‌ل هه‌ر ته‌كبيره‌كێ دێ ده‌ستێت خۆ بلندكه‌ى، و هه‌كه نه‌بلندكه‌ى ژى دورسته، ته‌كبيرا دووێ: دێ سه‌له‌واتان ده‌يه سه‌ر پێغه‌مبه‌رێ خۆشتڤى (سلاڤێت خودێ لێ بن)، و يا ژ هه‌ميان دورستتر ئه‌ڤه‌يه:
((اللَّهمَّ صَلِّ على مُحمَّدٍ، وَعَلى آلِ مُحمَّد، كَمَا صَلَّيْتَ عَلى إبْرَاهِيمَ و عَلى آلِ إبْرَاهِيمَ، إنَّكَ حمِيدٌ مجيدٌ. اللهُمَّ بارِكْ عَلى مُحَمَّد، وَعَلى آلِ مُحَمَّد، كَما بَاركْتَ على إبْراهِيم، وعلى آلِ إبْراهِيمَ إنَّكَ حميدٌ مجيد)). ئانكو: يا خودێ سه‌له‌واتان بده سه‌ر موحه‌ممه‌دى و سه‌ر مالا موحه‌ممه‌دى، هه‌روه‌كى ته سه‌له‌وات داينه سه‌ر ئيبراهيمى و سه‌ر مالا ئيبراهيمى، ب راستى تو هێژاى شوكرێيى و يێ پايه‌بلندى، و موحه‌ممه‌دى پيرۆز و پاك بكه، و مالا موحه‌ممه‌دى پيرۆز و پاك بكه، هه‌روه‌كى ته ئيبراهيم پيرۆز و پاك كرى، و مالا ئيبراهيمى پيرۆز و پاك كرى، ب راستى تو هێژاى شوكرێيى و يێ پايه‌بلندى. و پاشى دێ ته‌كبيرا سيێ كه‌ى، و دێ دوعا بۆ مرى كه‌ى ـ هه‌كه بزانى ب عه‌ره‌بى و هه‌كه نه‌زانى ب كوردي ژى دورسته، و هه‌كه ئه‌و دوعا ئه‌و بن يێت ژ پێغه‌مبه‌رى (سلاڤێت خودێ لێ بن) پاشتره و هه‌كه وان نه‌زانى هه‌ر دوعايه‌كا هه‌بيت دورسته ـ، و ته‌كبيرا چارێ: دێ بێژى: (اللهُمَّ لا تَفْتِنّا بَعْدَهُ وَلا تَحْرِمْنا أَجْرَهُ وَاغْفِرْ لَنا وَلَهُ). ئانكو: يا خودێ مه پشتى وى سه‌ردا نه‌به، و مه ژ خێرا وى بێ بار نه‌كه، و گونه‌هێت مه و يێت وى ژێ ببه. و پاشى هه‌ر ژپياڤه سلاڤا ملان ڤه‌ده، و نڤێژا مرى چو ركوع و سجود تێدا نينن.
ئه‌ڤ نڤێژه كا ل سه‌ر كێ دهێته‌كرن؟ ل سه‌ر هه‌ركه‌سه‌كێ ساخ ژ ده‌يكا خۆ بووى، خۆ هه‌كه بيسته‌كا زێده كێم ژى يێ ساخ بيت، نڤێژ ل سه‌ر دهێته‌كرن، به‌لێ هه‌كه بچويك بوو و يێ مرى ئان به‌رى ببيت د زكێ ده‌يكێدا يێ مري بوو.. هنگى ل سه‌ر ناهێته‌كرن، ديسا نڤێژ ل سه‌ر شه‌هيدێ دورست ژى ناهێته‌كرن، ئانكو: ئه‌وێ د مه‌يدانا جيهادێدا دهێته شه‌هيدكرن، و خودێ چێتر دزانيت.
