ب / ده‌ستپێكێ دڤێت بزانين بيدعه چيه، و نه‌دورسته ئه‌م گه‌له‌ك بازنێ وێ فره‌كه‌ين ب ره‌نگه‌كێ وه‌سا هه‌مى تشت و پرسێت جهێ جودابوونێ د ناڤبه‌را زاناياندا بكه‌ينه بيدعه، و نابيت ئه‌م گه‌له‌ك به‌رته‌نگ بكه‌ين ژى ب ره‌نگه‌كێ وه‌سا چو تشتان بيدعه نه‌زانين و نه‌بينين، ئه‌ڤ هه‌ردوو بۆچۆن و ديتنه خه‌له‌تن و نه‌دورستن.
دويف پێناسا ب به‌لگه‌يان پشته‌ڤانكرى ژ زانايێت تويژاندنكار.. بيدعه ئه‌و كاره ئه‌وێ نه چو به‌لگه‌يێت شه‌رعى بۆ هه‌بن و نه‌كه‌ڤيته بن چو شه‌نگستێت شه‌رعى، و هه‌كه به‌لگه‌يه‌ك بۆ هه‌بيت يان بكه‌ڤيته بن شه‌نگسته‌كى ژ شه‌نگستێت شه‌رعى نابيت بيدعه بێته زانين، و ئه‌ڤه پيڤه‌رێ ئێكانه و سه‌ره‌كى و راست و دورسته بۆ نياسينا بيدعێ. و يێ بڤێت پتر زانينا د ڤى بواريدا وه‌رگريت بلا بزڤرِيته كتێبا (الاعتصام) يا شاتبى، ب راستى كه‌سێ وه‌كى وى هوير ڤه‌كۆلين ل سه‌ر نه‌كريه، و هه‌كه هۆسا نه‌بيت هه‌مى جوداهيێت د ناڤبه‌را زاناياندا دبيت بكه‌ڤنه د بازنێ بيدعێدا، و ئه‌ڤه تشته‌كێ مه‌ترسيداره.
پشتى ڤێ پێشگۆتنێ ئه‌ز دبێژم: خواندنا قورئانێ ل سه‌ر گۆرِان د ناڤبه‌را زاناياندا جهێ جوداهيێيه، و هه‌رئێكى به‌لگه‌يێت خۆ ل سه‌ر بۆچۆنا خۆ يێت هه‌ين، و ئه‌م دشێن بێژين: بۆچۆنێت وان د ناڤبه‌را ب هێز و ب هێزتر و دورست و دورستتر دهێن و دچن، نه د ناڤبه‌را بيدعه و نه‌بيدعێدايه، بۆچۆنا ب هێزتر ده‌ف حه‌نبه‌ليان خواندنا قورئانێ ل سه‌ر گۆرِان چو تێدا نينه و نه‌مه‌كروهه، و دوو ڤه‌گێر ژ ئيمام ئه‌حمه‌دى هاتينه ڤه‌گوهاستن، د ڤه‌گێره‌كێدا دبێژيت: چو تێدا نينه و نه‌مه‌كروهه، و د ڤه‌گێره‌كا ديدا دبێژيت: بيدعه‌يه، به‌لێ تويژاندنكار وه‌كى خودانێ ئينسافێ و موغنيێ دبێژن: ژ بۆچۆنا بيدعێ لێڤه‌بوويه. خودانێ موغنيێ (خودێ ژێ رازى بيت)، دبێژيت: ئيمام ئه‌حمه‌د(خودێ ژێ رازى بيت)، مرۆڤه‌كێ كۆره ديت قورئان ل سه‌ر گۆرِان دخواند، ئيمام ئه‌حمه‌د نه‌هێلا و گۆتێ: بيدعه‌يه، ئينا موحه‌ممه‌دێ كورێ قودامه‌ى (خودێ ژێ رازى بيت)، گۆتێ: يا بابێ عه‌بدولاى.. تو چ بۆ موبه‌شرێ حه‌له‌بى دبێژى؟ گۆت: باوه‌رپێكريه، ئينا گۆت: موبه‌شرى ژ بابێ خۆ ڤه‌گوهاستيه وى شيره‌تكريه هه‌كه هاته ڤه‌شارتن ده‌ستپێك و دويماهيكا سۆره‌تا به‌قه‌ره ل سه‌ر گۆرِێ وى بخوين، و گۆت: من يا گولێ بووى عه‌بدوللايێ كورێ عومه‌رى شيره‌ت ب هندێ دكر، ئينا ئيمام ئه‌حمه‌د گۆت: بێژنێ بلا بزڤريت قورئانا خۆ بخوينيت، و ل ده‌ف شافعيان و موحه‌ممه‌دآ كورێ حه‌سنى هه‌ڤالێ ئه‌بو حه‌نيفه و قازى عه‌ياز و ئوسولزان قه‌رافى ژ مالكيان: خواندنا قورئانێ ل سه‌ر گۆرِان موسته‌حه‌به و باشه، و به‌لگه‌يێ وان ژى حه‌ديسا ئبن عومه‌ريه ئه‌وا به‌يهه‌قى ب رێكه‌كا باش ڤه‌گوهاستى، و ديسا ڤه‌گێرا بوخارى و موسلميه ئه‌وا بۆ مه ژ ئبن عه‌باس (خودێ ژێ رازى بيت) هاتي دبێژيت: پێغه‌مبه‌رێ خودێ (سلاڤێت خودێ لێ بن) د به‌ر دوو گۆرِانرِا بۆرى و گۆت: ب راستى ئه‌و دهێنه ئيزادان و ئه‌و ل سه‌ر گونه‌هه‌كا مه‌زن ناهێنه ئيزادان دويف هزرا وان، ئه‌ء وه‌سا نينه وه‌كى ئه‌و هزر دكه‌ن، ب راستى ئه‌و گونه‌ه يا مه‌زنه: هنديكه ئێك ژ وانه ئاخفتن ڤه‌گوهێزى دكر، و هنديكه يێ ديه خۆ ژ ميزا خۆ نه‌دپاراست يان خۆ ژ چاڤێت خه‌لكى نه‌دپاراست، پاشى تايه‌كێ دارقه‌سپێ هه‌لگرت و كره دوو چه‌ق، هه‌ر گۆرِه‌كى چقه‌ك ل سه‌ر چكلاند و گۆت: هيڤيه ئه‌ڤه ئيزايا وان سڤك بكه‌ت هندى هشك نه‌بيت.
زانا گه‌له‌ك راڤه‌كرن ل سه‌ر ئه‌گه‌رێ سڤككرنا ئيزا وان يێت هه‌ين، ژ وان: ئه‌ڤ داره هندى يا ته‌رِ بيت دێ ته‌سبيحا كه‌ت، و ئه‌ڤه دێ بيته ئه‌گه‌رێ سڤككرنا ئيزايا وان. ئيمامێ نه‌وه‌وى (خودێ ژێ رازى بيت)، دبێژيت: ئه‌ڤ حه‌ديسه به‌لگه‌يه ل سه‌ر باشيا قورئان خواندنێ ل سه‌ر گۆرِان، و هه‌كه هيڤى بيت ته‌سبيحكرنا دارێ ئيزا وان سڤك بكه‌ت.. پا خواندنا قورئانێ ئه‌ولا و هێژاتره. و ل ده‌ف ئيمام مالك و ئه‌بو حه‌نيفه مه‌كروهه و نه‌بيدعه‌يه، و حوكمێ مه‌كروهى و بيدعێ ژێك جودايه. ل ده‌ف من قورئان ل سه‌ر گۆرِان نه‌هێته خواندن باشتره، و هه‌ركه‌سێ بڤێت خێر بگه‌هنه مريێ وى دشێت هه‌ر جهێ هه‌بيت قورئانێ بخوينيت و دوعا بكه‌ت خودآ خێرا خواندنا وى بگه‌هينيتێ، خودآ يێ مه‌رده و ب ره‌حمه دآ گه‌هينيتێ خۆ ئه‌و ل كيڤه بيت.
هه‌كه خواند دويف بۆچۆنا شافعيان يان يا حه‌نبه‌ليان چو تێدا نينه نابيت بێنه پاشڤه‌برن، چونكى هه‌مى زانا يێت ل سه‌ر هندێ پرسا زانا تێدا ژێك جودا نابيت ئينكار و پاشڤه‌برن ل سه‌ر هه‌بيت، به‌لێ هه‌كه ب رێكه‌كا نه‌رم و جوان و نه‌يا توند و تيژ شيره‌ت بێته‌كرن دا ژ جوداهيێ ده‌ركه‌ڤين باشه و چو نينه، و خودێ چێتر دزانيت.
