ب / زانا د ڤێ پرسێدا د ژێك جودانه، ل ده‌ف شافعيان: حه‌رامه مرى بێته ڤه‌گوهاستن ژ باژێره‌كى بۆ باژێره‌كێ دى ـ ژبلى هه‌كه يێ نێزيكى مه‌كه‌هى و مه‌دينێ بيت، ژبه‌ر پيرۆزيا وان هه‌ردوو جهان ـ و هه‌كه مرى وه‌سيه‌ت ژى كربيت وه‌سيه‌تا وى ب جه ناهێت و دێ ل وى جهى هێته ڤه‌شارتن يێ لێ مرى. و ل ده‌ف حه‌نه‌فيان: مه‌كروهه بێته ڤه‌گوهازتن و نه‌حه‌رامه، و موسته‌حه‌به ل گۆرستانا وى باژێرى بێته ڤه‌شارتن يێ لێ مرى. و ل ده‌ف مالكيان و حه‌نبه‌ليان: دورسته ئه‌گه‌ر هه‌وجه‌يه‌ك بۆ هه‌بيت. و ئه‌ز يێ دگه‌ل بۆچۆنا دويماهيێ.. هه‌كه هه‌وجه‌يى نه‌بيت بلا نه‌هێته ڤه‌گوهاستن، و هه‌كه هه‌وجه‌يى بۆ هه‌بيت دورسته و چو تێدا نينه، و خودێ چێتر دزانيت.
