ب / جهێ روحێ پشتى دهێته كێشان ـ چ روحا باش بيت يان يا خراب، و روحا چاكان بيت يان يا خرابان ـ نه‌ئێك جهه و جهێت وان د ژێك جودانه، و هه‌ر هنده روح يێت ل جهه‌كى. زانايێ ناڤدار سيوتى (خودێ ژێ رازى بيت)، د (شرح الصدور بشرح حال الموتى والقبور)دا دبێژيت: ئبن قه‌يم هه‌مى گۆتنێت زانايان د ڤى بواريدا يێت ئيناين، و پاشى گۆت: يا دورست جهێ روحێت مرۆڤان نه‌ئێكه، و جهێت وان د جودا جودانه، هنده روح جهێ وان بلنديا بلنده وه‌كى روحێت پێغه‌مبه‌ران (سلاڤێت خودێ ل سه‌ر وان بن) هه‌روه‌كى پێغه‌مبه‌رێ خودێ (سلاڤێت خودێ لێ بن) شه‌ڤا ئيسرا و ميعراجێ ديتين، و هنده‌ك يێت د به‌رچێلكا باله‌فرِێت كه‌سكدا ل به‌حه‌شتێ دهێن و دچن، هه‌رجهێ بڤێن وه‌كى روحێت شه‌هيدان، و هنده روح ل به‌ر ده‌رگه‌هێ به‌حه‌شتێ د راگرتينه، و هنده‌ك ل سه‌ر رويباره‌كى ل به‌ر ده‌رگه‌هێ به‌حه‌شتێ د راگرتينه، و هنده‌ك د عه‌رديدا د راگرتينه و بلند نابن، و روحێت هنده‌كان يێت د ته‌نويرێت ئاگريدا، و هنده‌ك يێت د رويباره‌كێ خوينێدا مه‌له‌ڤانيان تێدا دكه‌ن، هۆسا دياره دبيت روحێت باشكاران و خرابكاران نه‌ئێك جه تنێ هه‌يه، هيڤيا مه ئه‌وه روحا مه جهه‌كێ باش هه‌بيت، و خودێ چێتر دزانيت.
