ب / پێدڤيه د هه‌مى كاروبارێ خۆدا ئه‌م بزڤرينه پێغه‌مبه‌رى (سلاڤێت خودێ لێ بن) كا چ كريه، و چ دوعا خوانديه، نه‌خاسمه ل سه‌ر گۆرِستانێ، چونكى پێغه‌مبه‌رێ مه (سلاڤێت خودێ لێ بن) گه‌له‌ك سه‌ره‌دانا گۆرِستانێ دكر، هه‌تا ژ ده‌يكا مه عائيشايێ (خودێ ژێ رازى بيت) هاتيه ڤه‌گوهاستن.. گه‌له‌ك جاران نيڤا شه‌ڤێ ديت يێ ژ سه‌ره‌دانا به‌قيعێ دزڤريت ـ به‌قيع گۆرِستانا خه‌لكێ مه‌دينێ بوو ـ و ژ پێغه‌مبه‌رى (سلاڤێت خودێ لێ بن) هاتيه زانين: ده‌مێ سه‌ره‌دانا گۆرِان دكر، دگۆت: ((السَّلامُ عَلَيكُمْ أَهْل الدِّيارِ مِنَ المُؤمِنِينَ والمُسْلِمِينَ وَإِنَّا إِنْ شَاءَ اللَّهُ بِكُمْ لاَحِقُونَ،[وَيرْحَمُ الله الْمُسْتَقْدِمِينَ مِنَّا وَالْمُسْتَأْخِرِينَ] أَسْأَلُ اللَّه لَنَا وَلَكُمُ العافِيه)). ئانكو: سلاڤ ل سه‌ر هه‌وه بن، يا خه‌لكێ ڤى جهى ژ خودان باوه‌ر و موسلمانان، و ب راستى ئه‌م ـ هه‌كه خودێ حه‌زكه‌ت ـ دێ گه‌هينه هه‌وه (خودێ دلۆڤانيێ ب پێشكه‌فتيێت مه و پاشكه‌فتيێت مه ببه‌ت) ئه‌ز سلامه‌تى و ئێمنيێ بۆ خۆ و بۆ هه‌وه ژ خودێ دخوازم، و خودێ چێتر دزانيت.
