ب / چو بۆ هندێ نينه رۆژه‌كا ده‌ستنيشانكري چاڤێ وان ل سه‌ره‌دانێ بيت، و نه‌يا دورسته ئه‌م رۆژه‌كێ ب تنێ بدانين بۆ سه‌ره‌دانان، هه‌مى رۆژ بۆ سه‌ره‌دانا گۆرستانێ وه‌كى ئێكن، هه‌ر سه‌رێ حه‌فتيێ هه‌تا دويماهيا وێ، و ئارمانج ژ سه‌ره‌دانێ بيرخوازيا رۆژا قيامه‌تێيه، دا بيرا مه بێته رۆژا قيامه‌تێ و دلێ مه نه‌رم ببيت، و بزانين رۆژه‌كێ ئه‌ز ژى دێ كه‌س و كارێت خۆ هێلم مال و سه‌ر و سامانێ خۆ هێلم و گه‌همه ڤێ دويماهيێ، و دێ بمه هه‌ڤالێ كرم و دويپشك و ماران، له‌وا پێغه‌مبه‌رێ خۆشتڤى (سلاڤێت خودێ لێ بن) دبێژيت: (كُنْتُ نَهَيْتُكُمْ عَنْ زِيارَه القُبُورِ فَزُوروها) من نه‌هيا هه‌وه ژ سه‌ره‌دانا گۆران كربوو، هه‌رن سه‌را بده‌ن. و د ريوايه‌ته‌كێدا: هه‌ركه‌سێ بڤێت سه‌ره‌دانا گۆرِان بكه‌ت، بلا سه‌ره‌دانێ بكه‌ت، ب راستى ئه‌و ئاخره‌تێ ل بيرا مه دئينيت. به‌رێ خۆ بدێ ژ ڤێ حه‌ديسآ ب هه‌ردوو ريوايه‌تانڤه دياردبيت كا ئارمانج ژ سه‌ره‌دانا گۆر و گۆرِستنان چيه، ئارمانج ئه‌وه هه‌روه‌كى پێغه‌مبه‌رێ خۆشتڤى (سلاڤێت خودێ لێ بن) گۆتى: ب راستى ئه‌و ئاخره‌تێ ل بيرا مه دئينيت. و خودانێ گۆرِى ژى مفاداره هه‌كه مه دوعا بۆ كرن هۆسا هه‌ردوو د مفادارن ئێك ئاخره‌ت و قيامه‌ت دهێته بيرا وى، و يێ مرى ژى دوعا بۆ دئێنه‌كرن و خێرا دوعايان دگه‌هيتێ، و پسيارا دى وان هايژ سه‌ره‌دانكه‌را هه‌يه يان نه؟ ئه‌ڤه نه‌جهآ ئێك گۆتنا زانايانه، به‌لكى جهێ ئختيلاف و جودابوونێيه، هنده‌ك دبێژن: هاي ژێ هه‌يه، ژ وان ته‌فسيرزان ئبن كه‌سير و عززه‌دين كۆرێ عه‌بدولسه‌لام و حافز ئه‌بو محه‌مه‌دێ ئه‌شبيلى و ئبن قه‌ييم و گه‌له‌كێت دى، و هنده زانايێت دى دبێژن: هاي ژێ نينه، ژ وان: ئبن ته‌يميه (خودێ ژێ رازى بيت)، به‌لێ هه‌روه‌كى زانايێ ناڤدار بن باز (خودێ ژێ رازى بيت) دبێژيت: ئه‌و ئاگه‌ه ژێ هه‌يه يان نه ئه‌ڤه زيانێ ناگه‌هينيته مه و يا فه‌ر ئه‌وه بزانين سه‌ره‌دانا گۆرِستانێ و گۆران ياباشه و سونه‌تا پێغه‌مبه‌رێ مه‌يه (سلاڤێت خودێ لێ بن)، و خودێ چێتر دزانيت.
