ب / ئه‌مرێ مه موسلمان يێ هاتيه‌كرن مه تايبه‌تمه‌نديا خۆ هه‌بيت، و ناسناما مه يا جڤاكى و ئه‌خلاقى و ئابۆرى و هه‌ر لايه‌كێ دى د چو ناسنامێت ديدا حه‌لنه‌بين، و دڤيت ئه‌م تايبه‌تمه‌نديا خۆ بپارێزين، و دڤێت بزانين مه هنده سنج و ئه‌خلاق و رێز و سه‌روبه‌رێت تايبه‌ت يێت هه‌ين و نابيت ئه‌م چاڤ ل رێز و سه‌روبه‌ر و عه‌ده‌تێت غه‌يرى خۆ بكه‌ين، چونكى پێغه‌مبه‌رێ خۆشتڤى سلاڤێت خودێ ل سه‌ربن دبێژيت: (من تشبه بقوم فهو منهم) هه‌چيێ خۆ وه‌كى غه‌يرى خۆ لێ بكه‌ت و ژ تايبه‌تمه‌نديێت خۆ ده‌ركه‌ڤيت ئه‌و ژ وانه يێت خۆ وه‌كى وان لێكرى، و ئه‌ڤ كاره پتر جهێ مه‌ترسيێيه هه‌كه ئه‌و چاڤلێكرن ژ حه‌ژێكرنێ بيت، هنگى دێ حه‌شرا مرۆڤى دگه‌ل وان بيت ئه‌وێت مه چاڤ لێ كرين، چونكى پێغه‌مبه‌رێ خۆشتڤى سلاڤێت خودێ ل سه‌ربن دبێژيت: (يحشر المرء مع من احب) مرۆڤ دێ دگه‌ل وى رابيت يێ حه‌ژێ دكه‌ت، به‌لێ هه‌كه مرۆڤ رۆژا بوونا خۆ يان يا عه‌يالێ خۆ بينيته بيرا خۆ؛ دا شوكرا خودێ بكه‌ت كو ئه‌ڤه هنده سال ژ ژيێ وى يان يێ عه‌يالێ وى ب سلامه‌تى و بێ به‌لا بۆرين، و خودێ ژ ئێش و نه‌خۆشى و ئاتاف و رويدانێت نه‌خۆش پاراست و هزرا خۆ بكه‌ت ئه‌ڤه هنده سال ژ ژيێ من چۆن، كا من چ تێدا كريه ئه‌رێ ئه‌ز تێدا يێ خوساره‌تم يان يێ فايده‌مه خێر و گونه‌هێت خۆ بينيته به‌رێك و هه‌لسه‌نگاندنه‌كێ بكه‌ت و جه‌رده‌كا هوير بۆ كار و كريارێت خۆ بكه‌ت چونكى دزانيت رۆژا قيامه‌تێ پسياره‌كا تايبه‌ت دێ ل سه‌ر ژيێ وى هێته‌كرن نه‌خاسمه ژيێ گه‌نجينيێ، پێغه‌مبه‌رێ خۆشتڤى سلاڤێت خودێ ل سه‌ربن دبێژيت: ((پێت چو به‌نده‌يان ناهێن و بچن (ئانكو مرۆڤ هه‌مى نه بۆ به‌حه‌شتێ نه بۆ جه‌هنه‌مێ دچن هه‌تا ئه‌ڤ پسياره ژێ نه‌هێنه‌كرن) هه‌تا پسيار ژ وى نه‌ئێته كرن: ژ ژيێ وى كا د چدا بۆرانديه، و ژ زانينا وى كا چ كار پێ كريه، و ژ مالێ وى كا ژ كيرێ ئينايه و د چدا مه‌زاختيه، و ژ له‌شێ وى كا د چدا كه‌ڤنار كريه (هه‌روه‌كى وه‌ختێ ئه‌و يێ جه‌حێل يێ ب هێز و نوى بوو، به‌لێ ئه‌ڤ نوياتيه كه‌ڤن دبيت هه‌روه‌كى جلكێ نوى كه‌ڤن دبيت)). دا بزانيت كا ئه‌و بۆ چ راست د ژيێ خۆدا دچيت، به‌لكى ل خۆ بزڤريت و حسێبه‌كا دى بكه‌ت يان يا عه‌يالێت خۆ دا بيرا وان بينيته شوكرا خودێ و بيرا وان بينيته هندێ چه‌ند ساله‌ك ژ ژيێ مه دچيت هند ئه‌م نێزيكى دويماهيك و مرن و گۆڕێ خۆ دبين. ئه‌ڤ ره‌نگه ساخكرنه باشه و چو تێدا نينه، چونكى پێغه‌مبه‌ر سلاڤێت خودێ ل سه‌ربن دبێژيت: (إنَّما الأَعمالُ بالنِّیات، وإِنَّمَا لِكُلِّ امرئٍ مَا نَوَى) ب راستى هه‌مى كار و كريار ب ئنيه‌تانه، و ب راستى بۆ هه‌ر مرۆڤه‌كى كا چ ئنيه‌ت ئينايه دێ ئه‌و بيت، به‌لێ ئه‌ڤا دهێته‌كرن ئاهه‌نگگێران و مه‌زخاندنا پاره‌كێ مه‌زن و كرنا گونه‌هان و دورستكرنا تێكه‌هه‌ليا حه‌رام و ئه‌ڤه هه‌می هه‌ر بۆ چاڤلێكرن و ته‌قليد، ئه‌ز نابينم يا دورسته، چونكى هه‌ر كاره‌كێ هه‌بيت ب ئنيه‌تا خۆڤه يێ گرێدايه، و خودێ چێتر دزانيت.
