ب / دڤێت ئه‌م بزانين خودێ مه‌زن فه‌رمانا ژن و مێران وه‌كى ئێك يێ كرى نه‌زه‌ر و به‌رێخۆدانا حه‌رام نه‌كه‌ن، د راستا زه‌لاماندا دبێژيت: (قُلْ لِّلْمُؤْمِنِينَ يَغُضُّواْ مِنْ أَبْصَارِهِمْ وَيَحْفَظُواْ فُرُوجَهُمْ ذالِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُون) و بێژه خودان باوه‌ران، بلا چاڤێ خۆ ژ به‌رێخۆدانا نه‌دورست و حه‌رام وه‌رگێڕن، و بلا ده‌همه‌ن و نامويسا خۆ بپارێزن، ئه‌ڤه بۆ وان چێتر و پاقژتره بكه‌ڤنه د پيساتيا گونه‌هێدا، ب راستى خودێ ئاگه‌هدارى وێيه، ئه‌وا ئه‌و دكه‌ن. و د راستا ژناندا دبێژيت: (وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُن) و بێژه ژنێت خودان باوه‌ر بلا چاڤێت خۆ ژ به‌رێخۆدانا نه‌دورست و حه‌رام وه‌رگێڕن، و بلا ده‌همه‌ن و نامويسا خۆ بپارێزن. ژ هه‌ردوو ئايه‌تان به‌رێخۆدانا حه‌رام و نه‌دورست نه‌زه‌ره و ئه‌مرێ مه هه‌ميان يێ هاتيه‌كرن ئه‌م ـ چ ژن چ مێر ـ خۆ ژێ بپارێزين، به‌لێ ئه‌رێ نه‌زه‌ر به‌رێخۆدانه يان ئه‌و به‌رێخۆدانه يا ئنيه‌تا خراب دگه‌ل و مه‌خسه‌د تێدا و تيرێت شه‌يتانى دگه‌ل تێكه‌ل، و هه‌كه ب ڤێ ئنيه‌تێ زه‌لام و ژنان به‌رێ خۆ دا ئێك و دوو ئه‌و هنگى نه‌زه‌ركر و كه‌فتنه د حه‌راميدا، و بلا بزانن به‌رێخۆدانا حه‌رام و نه‌زه‌ر ره‌نگه‌كه ژ ره‌نگێت زنايێ. پێغه‌مبه‌رێ خۆشتڤى سلاڤێت خودێ ل سه‌ربن دبێژيت: (العينان تزنيان وزناهما النظر) ئانكو: چاڤ زنايێ دكه‌ن و زنايا وان به‌رێخۆدانه. ڤێجا دڤێت ژن و زه‌لام ژ خودێ بترسن و هه‌كه ڤه‌شارتى و ب دزيڤه به‌رێخۆدانا حه‌رام كر و كه‌س پێ نه‌حه‌سيا، بلا بزانن ئه‌و نه‌شێن ل خودێ ڤه‌شێرن، خودێ مه‌زن دبێژيت: (يَعْلَمُ مَا يُسِرُّونَ وَمَا يُعْلِنُونَ إِنَّهُ عَلِيمٌ بِذَاتِ الصُّدُورِ) خودێ ب ئاگه‌هه ژ وێ يا ئه‌و نه‌په‌نى و ئاشكه‌را، دكه‌ن. ب راستى ئه‌و يێ ب ئاگه‌هه ژ وێ يا د دلان و سينگاندا ڤه‌شارتى. و د ئايه‌ته‌كا ديدا دبێژيت: (يعلم خائنة الأعين وما تخفي الصدور) خودێ خيانه‌تا چاڤان به‌رێخۆدانا ب دزى و نهێنيڤه و د دلاندا ڤه‌شارتى، ژێ ب ئاگه‌هه. ژ ئه‌ڤا بۆرى ديار دبيت به‌رێخۆدانا بێ ئنيه‌تا خراب، و به‌رێخۆدانا ئێكێ چو نينه و گونه‌هـ تێدا نينه، به‌لێ گونه‌هـ يا د وێ به‌رێخۆدانێدا ئه‌وا دويفڕا دهێت و يا ب مه‌ره‌م، پێغه‌مبه‌رێ خۆشتڤی سلاڤێت خودێ ل سه‌ربن دبێژيته عه‌لى خودێ ژێ رازی بیت (يا علي لاَ تُتْبِعِ النَّظْرَةَ النَّظْرَةَ فَإِنَّمَا لك الأُولَى وَلَيْسَتْ لك الآخِرَةُ) يا عه‌لى به‌رێخۆدانآ دويف به‌رێخۆدانێڤه نه‌به‌رده يا ئێكێ بۆ ته‌يه و يا دووێ ل سه‌ر ته‌يه، ئانكو: به‌رێخۆدانا ب مه‌ره‌م يا گونه‌هه، ڤێجا هه‌رگاڤا ئه‌ڤ به‌رێخۆدانه د ناڤبه‌را ژن و زه‌لاميدا چێ بوو ئه‌و يا حه‌رامه، و خودێ چێتر دزانيت.
