ب/ ده‌ستبه‌عى (عه‌ربوون) ئه‌وه: بكڕ يان كريِگرتى پاره‌كى وه‌ك ده‌ستبه‌عى بده‌ته خودانى، و بێژيتێ: هه‌كه ئه‌ز هاتم و من ڤيا دێ تماميا مايى يا بهايى ده‌مه ته، و هه‌كه ئه‌ز نه‌هاتم ئه‌و ده‌ستبه‌عى بۆ ته، باراپتر ژ زانايان ده‌ستبه‌عيێ دورست ناكه‌ن، به‌لێ ل ده‌ف ئيمام ئه‌حمه‌د دورسته، و ئبن قه‌ييم د كتێبا خۆدا (اعلام الموقعين) پشته‌ڤانيا مه‌زهه‌بێ ئيمام ئه‌حمه‌دى دكه‌ت و دورستتر ددانيت، و دورستيا ده‌ستبه‌عيێ دزڤريته عومه‌رێ كورێ خه‌تابى و عه‌بدوللايێ كورێ وى و ئبن سيرين و موجاهد و زه‌يدێ كورێ ئه‌سله‌مى خودێ ژ هه‌ميان رازى بيت و ديسا مه‌جمه‌عا فقهى ژى دخولا هه‌شتێدا يا سالا (1414 مش) دورستكريه، ب مه‌رجه‌كى هه‌كه بكڕى و فرۆشكارى ده‌مه‌ك د ناڤبه‌را خۆدا ئاشكراكر، و به‌لگه و ده‌ليل ل سه‌ر دورستيا ده‌ستبه‌عيێ ئه‌ڤه‌يه: واليێ عومه‌رێ كورێ خه‌تتابى خانيه‌ك ل مه‌كه‌هێ كڕى، و هنده پاره دانه خودانى و گۆتێ: هه‌كه ئيمام عومه‌ر پێ رازى بوو دێ يێت مايين بۆ ته ئينم، و هه‌كه رازى نه‌بوو و ئه‌وێت من داينه ته بۆ ته، ئه‌ز دبينم ئه‌ڤ ره‌ئيه ب هێزتره و پتر هه‌وجه‌ييێت ڤى چه‌رخى ب جهـ دئينيت، و خودێ چێتر دزانيت.
