ب / د بنياتدا خودانێ ساماني و كه‌ل و په‌لان د سيسته‌مێ ئابۆرێ ئيسلامێدا، يێ ئازاده و وى چاوا بڤێت دێ وه‌سا تشتێ خۆ فرۆشيت، ب وى بهايێ وى بڤێت، و دڤێت كه‌س خورتيێ لێ نه‌كه‌ت، و چو بهاى ل سه‌ر نه‌سه‌پينيت هندى ئه‌و به‌خت و وژدانا خۆ خراب نه‌كه‌ت، و ب بهايه‌كێ قايده و قه‌بويلكرى بفرۆشيت، چونكى خه‌لك د تشتێ خۆدا يێ ئازاده، و ب چ بها بڤێت دێ وه‌سا فرۆشيت، به‌لێ هه‌كه وژدان خراب بوو، و نه‌ما و بازرگان تێر نه‌بوو، و به‌س خێرا خۆ تنێ پاراست، و خه‌ما كه‌سێ نه‌هه‌لگرت، و خه‌م ل ده‌ف وى به‌س بوو به‌رويك و قازانجا وى و خه‌ما هه‌ژارى نه‌هلگرت.
ئها د ڤى كراسيدا كا دورسته ده‌سهه‌لات بێته د ناڤدا؛ دا دادپه‌روه‌ريآ به‌رچاڤ وه‌رگريت، د راستا بكڕاندا، و د راستا فرۆشكاراندا ژى، و تشتان بها بكه‌ت و ل سه‌ر بازرگان و فرۆشكاران دانيت پێگريآ ب وان بهايان بكه‌ن، و نه‌ده‌نه سه‌ر، ئه‌ڤه جهێ نه‌لێكيێيه د ناڤبه‌را زاناياندا ل سه‌ر دوو بۆچۆنان:
ئێك: فرۆشكار و بازرگان د ئازادن، و نابيت بهايه‌ك ل سه‌ر وان بێته دانان ئه‌و پێ نه‌رازى، به‌لگه‌يێ ژ هه‌ميان ب هێزتر يێ ڤێ بۆچۆنێ ڤه‌گێرا ئيمام ئه‌حمه‌د و ترمزى و ئبن حه‌بان و ئه‌بو داوود و ئبن ماجه‌يه: بها ل مه‌دينێ گران بوون و هنده‌ك هاتنه ده‌ف پێغه‌مبه‌رى سلاڤێت خودێ ل سه‌ربن و ژێ خواستن تشتان بۆ وان بها بكه‌ت به‌لێ پێغه‌مبه‌رى سلاڤێت خودێ ل سه‌ربن بها نه‌كر و گۆت: ((خودێ گران دكه‌ت و ئه‌رزان دكه‌ت)).
دوو: د كراسێ به‌خت خرابوونێدا، و بها گرانيێدا، و نه‌تێرى و ته‌مه‌عێدا، بۆ ده‌سهه‌لاتێ هه‌يه، به‌لكى هنده‌ك دبێژن ل سه‌ر واجبه ئه‌و ب دادپه‌روه‌رى خۆ بكه‌ته د ناڤدا، و بهايه‌كى دادپه‌روه‌ر ل سه‌ر تشتان ده‌ستنيشان بكه‌ت، خێرا هه‌ردوو لا، تێدا به‌رچاڤ بێته وه‌رگرتن، خێرا بكڕان و خێرا فرۆشكاران ژى، و دبێژن: نه‌بهاكرنا پێغه‌مبه‌رى سلاڤێت خودێ ل سه‌ربن ل مه‌دينێ ئه‌گه‌ر ئه‌و بوو نه‌گه‌هشتبوو تخويبه‌كێ زێده گران كو بخوازيت بچيته د ناڤدا و تشتان بها بكه‌ت و بهاكرنێ بكه‌ت، و يێت بۆ ڤێ بۆچۆنێ چۆين حه‌نه‌فى و مالكينه و هنده‌ك ژ شافعيان و سه‌عيد بن موسه‌يه‌ب و ره‌بيعه بن عه‌بدولره‌حمان و يه‌حيا بن سه‌عيدێ ئه‌نسارى و ئبن ته‌يميه و شاگردێ وى ئبن قه‌ييم خودێ ژ هه‌ميان رازى بيت، و ب راستى ئه‌ڤ بۆچۆنه پتر دكه‌ڤيته دلێ من و پتر دگه‌ل گيانێ ئيسلامێ دهێت ئه‌و گيانێ نه‌هێليت سته‌م ل كه‌سێ بێته‌كرن، و خودێ چێتر دزانيت.
