ب / نابيت و نه‌دورسته، ئه‌و ببيته ئه‌گه‌رێ دويماهيك ئينانا خۆ، و هه‌كه وه‌كر ئه‌و بوو بكوژێ خۆ، و ئه‌ڤه گونه‌هه‌كا مه‌زنه، چونكى ئه‌و نه‌خودانێ روحا خۆيه و وى نه‌دايه هه‌تا بريار يا وى بيت، هه‌رده‌مێ ڤيا نه‌هێليت، و ب دويماهى بينيت، و هه‌تا نه‌دورسته ئه‌و نفرينا ژى ل خۆ بكه‌ت و بێژيت: يا خودێ من نه‌هێله يان من بمرينه، هه‌كه گه‌له‌كێ بێزاره بلا ڤێ دوعايێ بكه‌ت هه‌روه‌كى بوخارى و موسلمى ژ ئه‌نه‌سى خودێ ژێ رازی بیت ڤه‌گێرايى دبێژيت پێغه‌مبه‌رى سلاڤێت خودێ ل سه‌ربن گۆت: (لا يَتَمَنَّيَنَّ أَحَدُكُمُ المَوْتَ لِضُرّ أَصَابَهُ فَإِنْ كانْ لابُدَّ فاعِلاَ، فَلْيَقُل: اللَّهُمَّ أَحْيِني ما كانَتِ الحَياةُ خَيْراً لي، وتَوَفَّني إِذا كانَتِ الوفاةُ خَيراً لي) ئانكو: كه‌س ژ هه‌وه خۆزيا مرنێ نه‌كه‌ت، و هه‌كه هه‌ر دێ كه‌ت بلا بێژيت: يا خودێ من ساخ بهێله، هندى ژيان بۆ من ب خێرتر بيت، و من بمرينه هه‌كه مرن بۆ من خێرتر بيت. قه‌يسێ كورێ ئه‌بى حازمى خودێ ژێ رازی بیت دبێژيت: ئه‌م چۆينه ده‌ف خه‌بابێ كورێ ئه‌ره‌تتى خودێ ژێ رازی بیت، سه‌را بده‌ين د نه‌ساخيا ويدا، و ئه‌و ل حه‌فت جهان هاتبوو داخكرن، گۆت: ب راستى هه‌ڤالێت مه يێت پێشيا مه چۆن و دنيايێ چو ژ وان كێم نه‌كر، و هند گه‌هشته مه ئه‌م چو جهان بۆ نابينين ژ دزيێ بپارێزين ئاخ نه‌بيت، هه‌كه ژبه‌ر هندێ نه‌بايه كو پێغه‌مبه‌رێ خودێ سلاڤێت خودێ ل سه‌ربن نه‌هيا مه يێ كرى ئه‌م مرنێ بخوازين دا مرنێ خوازم، پاشى جاره‌كا دى ئه‌م هاتينه ده‌ف و ئه‌و يێ ديواره‌كى ددانيت، گۆت: ب راستى موسلمان ب خێر دكه‌ڤيت ل سه‌ر هه‌ر تشته‌كێ ئه‌و بمه‌زێخيت، ژبلى ئه‌و بكه‌ته د ڤێ ئاخێرا، و خودێ چێتر دزانيت.
