ب : ئیسلام دینێ خودێیه و كاروبارێت خودێ یێت جوانن، و حه‌ز ژجوانیێ دكه‌ت، و چونا ده‌ستی دناڤبرا ژنان و ژناندا و زه‌لام زه‌لاماندا ژ كارێت جوانن، و چونا ده‌ستی سونه‌تا پێغه‌مبه‌رییه سلاڤێت خودێ ل سه‌ربن، و نه واجبه، به‌لێ یێ ب گه‌هیته هه‌ڤالێ خۆ یێ موسلمان و نه‌چیته ده‌ستێ وی، ئه‌وی دوو جار خۆ زینكاركر، ئێك: سونه‌ته‌‌ك ژ ده‌ستدا، دوو: خێرا چونا ده‌ستی ژ ده‌ست خۆ بر، و ل سه‌ر سونه‌تا چونا ده‌ستی پتر ژ حه‌دیسه‌كێ هاتیه، پێغه‌مبه‌ر سلاڤێت خودێ ل سه‌ربن دچو ده‌ستێ هه‌ڤالێت خۆ، ئه‌بو هوره‌یره خودێ ژێ رازی بیت دبێژیت: ئه‌ز كه‌فتمه د رێكا پێغه‌مبه‌ریدا سلاڤێت خودێ ل سه‌ربن، من خۆ ڤه‌گرت و ئه‌ز چوم من سه‌رێ خۆ شوشت پاشی ئه‌ز هاتمه ده‌ف پێغه‌مبه‌ری سلاڤێت خودێ ل سه‌ربن گۆته من بوچی ته خۆ ڤه‌گرت من گۆتێ یا پێغه‌مبه‌رێ ئه‌ز یێ ب جه‌نابه‌ت بووم ئینا گۆته من موسلمان پیس نابیت، و خۆ ڤه‌گرت دا نه‌چیته ده‌ستێ وی و ئه‌و یێ ب جه‌نابه‌ت، و چونا ده‌ستی ل سه‌ر ده‌مێ پێغه‌مبه‌ری سلاڤێت خودێ ل سه‌ربن یا به‌لاڤ بوو، بوخاری و ترمذی ژ ئه‌بو قه‌تاده‌ی ڤه‌دگێرن. دبێژیت: من گۆته ئه‌نه‌سێ كورێ مالكی هه‌ڤالێت پێغه‌مبه‌ری سلاڤێت خودێ ل سه‌ربن د چونه ده‌ستێت ئێك گۆت: به‌لێ، و دڤه‌گێره‌كا ئه‌بو داودیدا مرۆڤه‌كێ پسیار ژ ئه‌بو ذه‌ری خودێ ژێ رازی بیت كر ئه‌رێ پێغه‌مبه‌ر سلاڤێت خودێ ل سه‌ربن دهاته ده‌ستێت هه‌وه؟ گۆت: ئه‌ز نه چویمه ده‌ف پێغه‌مبه‌ری سلاڤێت خودێ ل سه‌ربن هه‌كه نه هاتبیته ده‌ستێ من، ژ به‌ر ڤان حه‌دیسان زانایێ ناڤدار نه‌وه‌وی خودێ ژێ رازی بیت دبێژیت: (المصافحة سنة مجمع عليها عند التلاقي) چونا ده‌ستی ده‌مێ دگه‌هنه هه‌ڤ سونه‌ته‌كه هه‌می ل سه‌ر كومن، و چونا ده‌ستی دبیته ئه‌گه‌رێ نه‌هێلانا كه‌رب و كین و نه‌ڤیانێ؛ له‌وا پێغه‌مبه‌رێ خوشتڤی سلاڤێت خودێ ل سه‌ربن دڤه‌گێرا مالكیدا د موطه‌ئێدا دبێژیت: (تصافحوا يذهب الغل) ئبن عه‌بدلبیر و عه‌بدولایێ كورێ موباره‌كی و خودانێ (المقاصد الحسنة) ڤێ حه‌دیسێ باش و دورست ددانن و ل سه‌ر خێرا چونا ده‌ستی د ڤه‌گێرا ئه‌بوداود و ئبن ماجه و ترمذیدا ژ به‌رائێ كورێ عازبی خودێ ژێ رازی بیت هاتیه، دبێژیت: پێغه‌مبه‌ری سلاڤێت خودێ ل سه‌ربن دبێژیت: (ما من مسلمين يلتقيان فيتصافحان إلا غفر لهما قبل أن يفترقا) نینه دوو موسلمان ب گه‌هنه ئێك و ب چنه ده‌ستێ هه‌ڤ هه‌كه خودێ گونه‌هێت وان به‌ری ژێكڤه ببن نه غه‌فرینیت و ژێ نه‌به‌ت، و ترمذی دبێژیت ئه‌ڤ حه‌دیسه یا حه‌سه‌نه هوسا دیاردبیت حه‌دیس یا دورسته و طه‌به‌رانی ژ سه‌لمانێ فارسی خودێ ژێ رازی بیت دڤه‌گێریت دبێژیت پێغه‌مبه‌ری سلاڤێت خودێ ل سه‌ربن دبێژیت: (إن المسلم إذا لقي أخاه المسلم فأخذ بيده تحاتت عنهما ذنوبهما كما يتحات الورق عن الشجرة اليابسة في يوم ريح عاصف وإلا غفر لهما ولو كانت ذنوبهما مثل زبد البحر) هه‌كه موسلمان گه‌هشته برایێ خۆ یێ موسلمان و چو ده‌ستێ وی و ده‌ستێ وی گرت گونه‌هێت وان وه‌ریان و چاوا به‌لگێت دارا هشك رۆژه‌كا وب باهور دوه‌ریین و خودێ دێ گونه‌هێت وان ژێ به‌ت خۆ هه‌كه هندی كه‌فزا به‌حرابن و دڤه‌گێره‌كا دیدا یا ئوبو داود دا هاتیه پێغه‌مبه‌ر سلاڤێت خودێ ل سه‌ربن دبێژیت: (إذا الْتَقَى الْمُسْلِمَانِ فَتَصَافَحَا وَحَمِدَا اللَّهَ عز وجل وَاسْتَغْفَرَاهُ غُفِرَ لَهُمَا) هه‌كه دووموسلمان گه‌هشتنه ئێك و چونه ده‌ستێ هه‌ڤ و حه‌مدا خودێ كرن و وگونه‌هژێبرن ژێ خوازت گونه‌هێت وان هاتنه ژێبرن و سلاڤا دورست ئه‌وه یا چونا ده‌ستی ل گه‌ل هه‌بیت هه‌روه‌كی ئه‌ڤه دڤه‌گێرا ترمذیدا ژ ئبن مه‌سعودی خودێ ژی رازی بیت هاتی دبێژیت پێغه‌مبه‌ر سلاڤێت خودێ ل سه‌ربن دبێژیت: (من تَمَامِ التَّحِيَّةِ الْأَخْذُ بِالْيَدِ) تمامیا سلاڤێ چونا ده‌ستی هه‌بیت خودێ چێتر دزانیت.
