ب : پیدڤیه هه‌تا ئه‌م ب گه‌هینه حوكمه‌كێ دورست ژ حه‌دیسه‌كێ ئه‌م ڤان لایان هه‌میان بزانین، دورستیا حه‌دیسێ، و پله‌یا دورستیا وێ، و ئهگهرێ هاتنا وێ حه‌دیسێ، كا ئه‌گه‌ره‌كێ تایبه‌ت هه‌یه، و كا بو ره‌وشه‌كا تایبه‌ت هاتیه گۆتن یان نه، و پاشی كا چو حه‌دیس دوی بابه‌تدا هاتینه هه‌می پێش چاڤیت مه‌بن، ئه‌م نه‌شێن ب گه‌هێنه حوكمه‌كێ دورست دویر ژ حه‌دیسێت وی بابه‌تدیا هاتین، دیسا ئه‌و حه‌دیس ب خۆ ژی كا ب چه‌ند بێژه و رێكا هاتیه؛ دا بزانین كێم و زێده‌یێت وان رێكان؛ دا ئه‌ڤه ببیته هاریكار ب گه‌هینه حوكمێ دورست، هه‌ر چه‌نده ئه‌ڤ حه‌دیسه ژ ڤه‌گێرا ئیمامێ موسلمه ژی به‌لێ زانایان ئاخفتنا ل سه‌ر هه‌ی:
ئێك: هه‌ركه‌سێ ئه‌ڤ حه‌دیسه ڤه‌گێرایی ژ سه‌هلێ كورێ ئه‌بی صالحی ژ ئه‌بو هوره‌یره ڤه‌گێرایه، و سه‌هلی ئاخفتنا ل سه‌ر ژبه‌ركرنا وی هه‌ی، كو له‌واز ببو هه‌ر وه‌كی بوخاری خودێ ژێ رازی بیت، دبێژیت ژ به‌رهندێ ژی حه‌دیسێت وی نه ئیناینه و ئه‌بو حاته‌م و ئبن مه‌عین دبێژن نابیته به‌لگه.
دوو: سوهه‌یلی ب تنێ ئه‌ڤه ڤه‌گێرایه و كه‌سێ ب ڤێ بێژه‌یێ ژ ئه‌بو هوره‌یری نه ڤه‌گێرایه و كه‌سێ ژ بلی وی بێژه‌یا: (واضطروهم إلى أضيق الطريق) نه‌ڤه‌گێرایه.
و هه‌كه ئه‌م بێژین چو توز ل سه‌ر دورستیا حه‌دیسێ نینه؛ چونكی حه‌دیس ڤه‌گێرانا موسلمییه و گه‌له‌ك زانا وه‌رگرتیه و دورست دانایه، ئه‌م دبێژین ئه‌ڤێ حه‌دیسێ ئهگهرێ خۆ یێ تایبه‌ت یێ هه‌ی، و رامانا گشت ره‌وش و كراسان ناده‌ت، به‌لكی بۆ ره‌وشه‌كا تایبه‌ت پێغه‌مبه‌ری سلاڤێت خودێ ل سه‌ربن، یێ گۆتی، ده‌مێ شه‌رێ ئه‌حزابا ن و خه‌نده‌كێ ب دویماهی هاتی و پێغه‌مبه‌ری سلاڤێت خودێ ل به‌ر بوو ئه‌وێت خیانه‌ت كرین ژ جویێت به‌نی قوریزه توره بده‌ت گۆت: ده‌ست ب سلاڤكرنا وان نه‌كه‌ن و به‌رێ وان بده‌نه رێكا ته‌نگ، چونكی ئه‌ڤه كراسی شه‌رییه نه ئاشتێیه و زانایێت دیاره‌كری ئه‌ڤه ئهگهرێ هاتنا ڤێ حه‌دیسێیه ئیسحاقێ كورێ راهه‌ویهی و ئبن ته‌یمییه و ئبن قه‌یمه خودێ ژ هه‌میان رازی بیت، و هوسا ژ ئهگهرێ هاتنا حه‌دیسێ دیاردبیت نابیت ئه‌م د كراسێ شه‌ریدا ئه‌م رێكا وان ڤه‌كه‌ین و یێت ئازادبن و هه‌كه نه ئه‌ڤ ره‌وش و كراسه بیت هنگی ئه‌م یێت ئاسایینه ل گه‌ل وان و نابیت ئه‌م رێكێ ل به‌ر ته‌نگه‌ین ب به‌لگه‌یا هندێ هه‌ر وه‌كی زانا دبێژن: ئاشكه‌ریا ژ سه‌ره‌ده‌ریا پێغه‌مبه‌ری سلاڤێت خودێ ل سه‌ربن ئه‌ڤه ل گه‌ل گاوران و نه‌موسلمانان چو فه‌له‌بن چو جوی بن چو بوت په‌ستبن نه‌كریه ململانێ درێكان ل گه‌ل وان نه‌كریه، و نه‌هاتیه زانین جاره‌كێ رێك ل ئێكێ ته‌نگ كربیت دگه‌ل كو مه‌دینه یا پر جوی بوو، و هه‌ڤالێت وی ژی ئه‌ڤه نه‌كریه ده‌می جهـ وه‌لات ڤه‌دكرن، هوسا دهێته زانین ئه‌ڤ رێك ته‌نگكرنه بۆ ره‌وشه‌كا تایبه‌ت بو ده‌مێ چوینه به‌نی قوره‌یزه؛ دا وان ل سه‌ر نه‌پاكی و خیانه‌تا وان سزابده‌ت و ئه‌ڤ دیاردكه‌ت ئه‌ڤ كریاره ل گه‌ل وان به‌س د ره‌وشا شه‌ریدایه ب تنێ و خودێ چێتر دزانیت.
