ب : ب راستی مرۆڤ ژ زه‌لامێ ته حێبه‌تی و گوهشین سه‌یر دبیت، وی ماف نینه ده‌مێ ئه‌و یێ ساخ و ل سه‌ر ئه‌ردی ئه‌و نه‌هێلیت تو ب چییه مزگه‌فتێ هه‌كه ته بڤێت بچی، ڤێجا چاوا ئه‌و وی مافی دده‌ته خۆ پشتی چویه بن ئه‌ری هه‌ر نه‌هێلیت و رێكێ ل ته بگریت، دژیانا خۆدا وی مافه‌ك داخۆ نه یێ وی، خودایێ وی و پێغه‌مبه‌رێ وی ئه‌و ماف دژیانا ویدا و ئه‌و ل سه‌ر ئه‌ردی نه دایێ ئه‌و رێكا مزگه‌فتێ ل ته بگریت، ڤێجا ئه‌ز نزانم ب چ جورئه‌ت و جه‌ساره‌ت و ب چ روی ئه‌و وی مافی ل گه‌ل خۆ دبه‌ته دگورێ خۆدا، ئه‌م نزانین كاو ی بوچی ئه‌ڤه كریه، بۆچی هند ره‌قی و ركی ل مزگه‌فتان هه‌یه، و حه‌ژێكرنا مزگه‌فتێ مرۆڤی هه‌ژی سیبه‌را عه‌رشێ خودێ دكه‌ت، رۆژا قیامه‌تێ د حه‌دیسا دورستدا هاتیه پێغه‌مبه‌ر سلاڤێت خودێ ل سه‌ربن دبیژیت: حەفتان خودێ دێ ئێخیتە بن سیبەرا خۆ، رۆژا چو سیبەر نەبن، سیبەرا وی نەبیت: ئێك ژ وان ئه‌و مرۆڤە یێ دلێ وی ب مزگەفتانڤە گرێدای، (ئانکو زێدە حەژ چۆنا مزگەفتان دکەت) و ئه‌ڤ حه‌دیسه ژ ژن ومێران دگریت بێ جوداهی، ھەرگاڤا دلێ زه‌لامی یان یێ ژنێ ب مزگەفتێڤە ھاتە گرێدان، و حەژ مەزگەفتێ کر ئەڤ حەدیسە ژێ دگریت؛ چونکی زانا دبێژن (قَلْبُەُ مَعلَّقٌ بِالمَسَاجِدِ) رامانا وێ ئەوە گەلەک حەژ مزگەفتا و نڤێژێت جماعەت بکەت، ڤێجا یێ دلێ وی ب مزگەفتێڤە گرێدای، ژن بیت یان مێر، بلا کەیفا وی ب سیبەرا عەرشێ خودێ خۆش ببیت، دێ ژ وان بیت یێت رۆژا قیامەتێ دکەڤنە بن سیبەرا عەرشێ وی، و نەیا دورستە ژن ژ مزگەفتێ بێتە ڤەگرتن و بۆ کەسێ نینە نە دایک، نە باب و نە زەلامێ ژنێ ژ مزگەفتێ ڤەگریت، ھەکە ژنێ ڤیا بچیتە مزگەفتێ، نەخاسمە ھەکە رێکا ئێمن بیت؛ چونكی ب ئاشكه‌رایی پێغه‌مبه‌ر سلاڤێت خودێ ل سه‌ربن د ڤه‌گێرا بوخاري و موسلميدا دبێژیت: (لا تَمْنَعُوا إِمَاءَ اللَّهِ مَسَاجِدَ اللَّهِ) ژنان به‌نده‌ییت خودێ ژ مزگه‌فتێت خودێ نه‌ڤه‌گرن، ژ به‌ر ڤێ حه‌دیسێ مه‌زنه صه‌حابی نه‌دوێران بێژنه هه‌ڤژینیت خۆ، نه‌چنه مزگه‌فتێ، بلا حه‌زكربان ل مال ژی بانه، عه‌بدوللاهێ كورێ عومه‌ری خودێ ژهه‌ردویان رازی بیت دڤه‌گێرا بوخاریدا دبێژیت: (كانت امْرَأَةٌ لِعُمَرَ تَشْهَدُ صَلَاةَ الصُّبْحِ وَالْعِشَاءِ في الْجَمَاعَةِ في الْمَسْجِدِ فَقِيلَ لها لِمَ تَخْرُجِينَ وقد تَعْلَمِينَ أَنَّ عُمَرَ يَكْرَهُ ذلك وَيَغَارُ قالت وما يَمْنَعُهُ أَنْ يَنْهَانِي قال يَمْنَعُهُ قَوْلُ رسول اللَّهِ صلی الله علیه وسلم لا تَمْنَعُوا إِمَاءَ اللَّهِ مَسَاجِدَ اللَّهِ) عومه‌ری هه‌ڤژینه‌ك هه‌بو نڤێژا عه‌یشا و سپێدێ د هاته مزگه‌فتێ، گۆتنێ: تو چاوا دهێیه مزگه‌فتێ و عومه‌ری پێ نه‌خۆشه؟! ئینا گۆت: ما چ نا هێلیت ئه‌و نه‌هێلیت ئه‌ز بهێم؟ گۆتن: گۆتنا پێغه‌مبه‌ری سلاڤێت خودێ ل سه‌ربن: (لا تَمْنَعُوا إِمَاءَ اللَّهِ مَسَاجِدَ اللَّهِ) ژنان به‌نده‌ییت خودێ ژ مزگه‌فتێت خودێ نه‌ڤه‌گرن، و دڤه‌گێره‌كا دیدا یا بوخاری پێغه‌مبه‌ر سلاڤێت خودێ ل سه‌ربن دبێژیت: (ائْذَنُوا لِلنِّسَاءِ بِاللَّيْلِ إلى الْمَسَاجِدِ) ده‌ستویریا ژنان بده‌ن ب شه‌ڤ بچنه مزگه‌فتان، به‌لكی دڤه‌گێرا موسلمیدا ئاشكراتر ڤێ دبێژیت، هه‌كه دڤه‌گێرا بوخاریدا بێژیت : ده‌ستویریا ژنان بده‌ن ب شه‌ڤ بچنه مزگه‌فتان، دڤه‌گێرا موسلمیدا دبێژیت:( لا تَمْنَعُوا النِّسَاءَ من الْخُرُوجِ إلى الْمَسَاجِدِ بِاللَّيْلِ) رێكا ژنان نه‌گرن ب شه‌ڤ (به‌رێ خۆ بدێ ب شه‌ڤ نه ب رۆژ و شه‌ڤ پتر جهێ ترسێیه) بچنه مزگه‌فتان، به‌رێ خۆ بدێ ده‌مێ كوره صه‌حابیه‌كێ ل ده‌ف بابێ خۆ گۆتێ ئه‌م نا هێلین ژنێت مه ب چینه مزگه‌فتێ، بابێ صه‌حابی چ گۆتێ؟ و چ هه‌لویست ژێ هه‌لگرت؟ سالمێ كورێ عه‌بدوللاهێ كورێ عومه‌ری، خودێ ژ هه‌میان رازی بیت دڤه‌گێرا موسلمیدا دبێژیت: (قال عَبْد اللَّهِ بن عُمَرَ قال سمعت رَسُولَ اللَّهِ صلی الله علیه وسلم يقول لا تَمْنَعُوا نِسَاءَكُمْ الْمَسَاجِدَ إذا اسْتَأْذَنَّكُمْ إِلَيْهَا قال فقال بِلَالُ بن عبد اللَّهِ والله لَنَمْنَعُهُنَّ قال فَأَقْبَلَ عليه عبد اللَّهِ فَسَبَّهُ سَبًّا سَيِّئًا ما سَمِعْتُهُ سَبَّهُ مثله قَطُّ وقال أُخْبِرُكَ عن رسول اللَّهِ صلی الله علیه وسلم وَتَقُولُ والله لَنَمْنَعُهُنَّ) سالمێ كورێ عه‌بدوللاهێ كورێ عومه‌ری دبێژیت: عه‌بدوللاهی گۆت: من گول پێغه‌مبه‌ری بوو سلاڤێت خودێ ل سه‌ربن گۆت: رێكا ژنێت خۆ نه‌گرن بچنه مزگه‌فتان هه‌كه ده‌ستویری ژ هه‌وه خوازت، گۆت: بیلالێ كورێ عه‌بدوللاهی گۆت: ب خودێ ئه‌م نا هێلین گۆت: عه‌بدوللاهی به‌رێ خۆ دایێ خه‌به‌ره‌كێ خراب گۆتێ من چ جار گولێ نه‌بویه ئه‌و خه‌به‌ر گۆتی، و گۆت: ئه‌ز دبێژمه ته پێغه‌مبه‌ری گۆت تو دبێژی ب خودێ ئه‌ز ناهێلم، دڤه‌گێره‌كێدا هاتیه سێ جاران گۆتێ له‌عنه‌تێت خودێ ل ته‌بن له‌عنه‌تێت خودێ ل ته بن له‌عنه‌تێت خودێ ل ته بن، و دڤه‌گێره‌كا دیدا ده‌ستێ خۆ ل سینگێ ویدا، ودڤه‌گێركا دیدا گۆتێ: هه‌ره ئه‌ز ل گه‌ل ته نا ئاخڤم، ئه‌ڤه هه‌می؛ چونكی به‌روڤاژی سونه‌ت و فه‌رمانا پێغه‌مبه‌ری سلاڤێت خودێ ل سه‌ربن ڤیا بكه‌ت، و دڤه‌گێره‌كا دی یا موسلمیدا هاتیه: (إذا اسْتَأْذَنَكُمْ نِسَاؤُكُمْ إلى الْمَسَاجِدِ فَأْذَنُوا لَهُنَّ) ئه‌گه‌ر ژنێت هه‌وه دوستوریا چونا مزگه‌فتان ژ هه‌وه خوازت ده‌ستوریا وان بده‌ن، و دڤه‌گێره‌كا دیدا یا موسلمی پێغه‌مبه‌ر سلاڤێت خودێ ل سه‌ربن دبێژیت: (لا تَمْنَعُوا النِّسَاءَ حُظُوظَهُنَّ من الْمَسَاجِدِ إذا اسْتَأْذَنُوكُمْ) رێكا ژنان ( شویكری نه شویكری ) ژ خێرا وان ژ مزگه‌فتان هه‌كه ده‌ستوی ژ هه‌وه خوازت نه‌گرن، ڤێجا ئه‌و زه‌لامێ دژیانا خۆدا نه‌هێلیت دێ چ ل ڤان حه‌دیسان كه‌ت و هه‌كه مر و هه‌ر ڤیا ل سه‌ر وی هه‌لویستی بیت دێ چاوا جابا خودایێ خۆ ده‌ت، ب راستی جھێ نەخۆشیێیە ئەڤرۆ رێکا ژنێ یا ڤەکری بیت بۆ ھەمی جھان ـ سویکێ و دائیرێ و سەیرانێ و دەواتا تێکەل و جڤینێت تێکەل و ئاھەنگێت تێکەل ـ بەلێ رێکا وێ یا گرتی بیت بۆ مالا خودێ و مزگەفتێ، ئەڤە کارەکێ نەیێ جوانە و نەیێ شەرعیە، ئەم رێکا مزگەفتێ لێ بگرین، نەخاسمە ھەکە ئنیەت نەبەس نڤێژ ب تنێ بیت، بەلکی دگەل نڤێژێ گوھدانا شیرەت و ئاخفتنا خێرێ بیت، ژبه‌ر ئه‌ڤا بوری هه‌كه ژنێ ده‌ستوری بۆ چونا مزگه‌فتێ خوازت، دڤێت دەستویری ژ سەمیانێ وێ بۆ بێتە دان، و ئەز نابینم سەمیانی ھێجەت ھەبیت نەھێلیت، نەخاسمە مزگەفت و ھۆلێت ژنان د جودانە و تێکەلی چێ نابیت، و ھەکە ترسا تێکەلیێ و خرابیێ نەما رێگرتن ژی دڤێت نەمینیت، هه‌ژییه بێژین زانایێ ناڤدار ئبن حه‌زم دبێژیت: ده‌ستویرخوازی نه بۆ هندێیه زه‌لامی بڤێت بێژتێ: ئه یان نه؛ چونكی هه‌كه ژن ب مه‌رجێت ده‌ركه‌فتنا ژنان ده‌ركه‌فت، بۆ زه‌لامی نینه نه‌هێلیت، و دڤێت ده‌ستویریا وێ بده‌ت، و پشتی ده‌ستویرخوازتنێ هه‌كه زه‌لامی ده‌ستویری نه‌دا، ژن دشێت بێ ده‌ستوریا وی ده‌ركه‌ڤیت و بچیته مزگه‌فتێ و نه یا گونه‌هكاره و خودێ چێتر دزانیت.
