ب: دڤێت موسلمانان ب گشتی که‌سایه‌تیه‌کا تایبه‌ت ھه‌بیت، و ب تایبه‌تمه‌ندیا ئیسلامێ ھاتبیته ئاڤاکرن، که‌سایه‌تیه‌کا وه‌سا به‌رده‌وام پاراستنا سه‌ربه‌خۆییا خۆ بکه‌ت، و ئه‌ڤ که‌ساتیه ھه‌ر بمینیت نیشانه‌كا ئاشکرا و به‌رز د ناف که‌سایه‌تیێت جۆره و جۆردا، و د که‌سایه‌تیێت دیدا نه‌حه‌لیێت، چونکی یا وه‌رگرتیه ژ ره‌سانه‌تیا ئیسلامێ، ئه‌و ره‌سه‌ناتیا پشتا خۆ نه‌ده‌ته ھه‌ڤچه‌رخی و نویخوازیێ، و دڤێت موسلمان ب گشتی و ب تایبه‌ت کچا موسلمان كورێ موسلمان یێت به‌رنیاس بن، ب رێز و سه‌ر و به‌رێت خۆڤه، و ب سنج و ره‌وشتێت خۆڤه، و نیشانه‌كا گه‌ش بن د ناف ره‌گه‌زێت خۆدا، و که‌سایه‌تیه‌کا نموونه‌یی بیت، و لاواز و چاڤلێکه‌ر نه‌بیت، ھه‌رجھێ بایێ لێدا ب وی ره‌خیڤه خوارببیت، دڤێت موسلمان ب گشتی و کچا موسلمان و كورێ موسلمان ب تایبه‌ت ژ ھندێ مه‌زنتر بن ببنه ئێخسیرێت چاڤلێکرنێ و ب کۆره‌یی چاڤلێکرنێ بکه‌ن، و به‌رێ خۆ بده‌نه خه‌لكی کا ئه‌و چ دکه‌ن ئه‌و ژی بکه‌ن، نه.. ئه‌ڤه یا خه‌له‌ته، ئیمان و باوه‌ریا د دلاندا پێدڤیه د گه‌ش بن و سه‌رکێش و ئاراسته‌کرنا وان بکه‌ن، مودێلا جادێ و گوھۆرینا جادێ کارلێکرنێ ل ره‌سه‌ناتیا وان یا موکم ناکه‌ن دگه‌ل کو رۆژا خۆ دژین و ئاگه‌ھ ژ زه‌مان و چه‌رخێ خۆ و پێشکه‌فتنا ب خۆڤه دبینیت ھه‌یه، به‌لێ ئه‌مرێ مه موسلمان یێ ھاتیه‌کرن مه تایبه‌تمه‌ندیا خۆ ھه‌بیت، و ناسناما مه یا جڤاکی و ئه‌خلاقی و ئابۆری و ھه‌ر لایه‌کێ دی د چو ناسنامێت دیدا حه‌لنه‌بن، و دڤیت ئه‌م تایبه‌تمه‌ندیا خۆ بپارێزین، و دڤێت بزانین مه ھنده سنج و ئه‌خلاق و رێز و سه‌روبه‌رێت تایبه‌ت یێت ھه‌ین و نابیت ئه‌م چاڤ ل رێز و سه‌روبه‌ر و عه‌ده‌تێت غه‌یری خۆ بکه‌ین، چونکی پێغه‌مبه‌رێ خۆشتڤی سلاڤێت خودێ ل سه‌ربن دبێژیت: (من تشبه بقوم فهو منهم) ھه‌چیێ خۆ وه‌کی غه‌یری خۆ لێ بکه‌ت و ژ تایبه‌تمه‌ندیێت خۆ ده‌رکه‌ڤیت ئه‌و ژ وانه یێت خۆ وه‌کی وان لێکری، و ئه‌ڤ کاره پتر جھێ مه‌ترسیێیه ھه‌که ئه‌و چاڤلێکرن ژ حه‌ژێکرنێ بیت، ھنگی دێ حه‌شرا مرۆڤی دگه‌ل وان بیت ئه‌وێت مه چاڤ لێ کرین، چونکی پێغه‌مبه‌رێ خۆشتڤی سلاڤێت خودێ ل سه‌ربن دبێژیت: (يحشر المرء مع من احب ) مرۆڤ دێ دگه‌ل وی رابیت یێ حه‌ژێ دکه‌ت.
تایبه‌ت دڤێت گه‌نجان كچ و كوران ئاگه‌ھ ژ خۆ هه‌بن و كه‌سایه‌تیا خۆ ب پارێزن و نه‌بنه به‌نده و دیل و ئێخسیرێت مودێلان، و ب زانن گه‌نجاتیا وان دێ پسیار ل سه‌ر هێته كرن، ڤێجا دڤێت هه‌ر ئێك ھزرا خۆ بکه‌ت ئه‌ڤه ھنده سال ژ ژیێ وی چون، کا وی چ تێدا کریه ئه‌رێ ئه‌و تێدا یێ خوساره‌ته یان یێ فایده‌یه، فه‌ره خێر و گونه‌ھێت خۆ بینیته به‌رێک و ھه‌لسه‌نگاندنه‌کێ بکه‌ت و جه‌رده‌کا ھویر بۆ کار و کریارێت خۆ بکه‌ت؛ چونکی دزانیت رۆژا قیامه‌تێ پسیاره‌کا تایبه‌ت دێ ل سه‌ر ژیێ وی ھێته‌کرن نه‌خاسمه ژیێ گه‌نجینیێ، پێغه‌مبه‌رێ خۆشتڤی سلاڤێت خودێ ل سه‌ربن دبێژیت: (پێت چو به‌نده‌یان ناھێن و بچن (ئانکو مرۆڤ ھه‌می، نه بۆ به‌حه‌شتێ نه بۆ جه‌ھنه‌مێ دچن ھه‌تا ئه‌ڤ پسیاره ژێ نه‌ھێنه‌کرن) ھه‌تا پسیار ژ وی نه‌ئێته کرن: ژ ژیێ وی کا د چدا بۆراندیه، و ژ زانینا وی کا چ کار پێ کریه، و ژ مالێ وی کا ژ کیرێ ئینایه و د چدا مه‌زاختیه، و ژ له‌شێ وی کا د چدا که‌ڤنار کریه (ھه‌روه‌کی وه‌ختێ ئه‌و یێ جه‌حێل یێ ب ھێز و نوی بوو، به‌لێ ئه‌ڤ نویاتیه که‌ڤن دبیت ھه‌روه‌کی جلکێ نوی که‌ڤن دبیت). دا بزانیت کا ئه‌و بۆ چ راست د ژیێ خۆدا دچیت، به‌لکی ل خۆ بزڤریت و حسێبه‌کا دی بکه‌ت به‌لێ مخابن گه‌له‌ك خه‌له‌ك ب ناڤێ مودێلێ هنده كاران دكه‌ن و پاران دمه‌زێخن و ئاھه‌نگان دگێرن و تێكه‌لیا حه‌رام دكه‌ن و ئه‌ڤه ھه‌مه ھه‌ر بۆ چاڤلێکرن و ته‌قلید، و ژ گونههێ پێڤه‌تر ده‌ستخۆڤه نائینن و ژ بلی گونههێ ناگه‌هنه چێ دی؛ چونكی مودیل و دویڤچونا مودێلێ رازیبوون و رازیكرنا خه‌لكییه و دژی نه‌رازیبوونا خودێیه، و خودایێ مه‌زن ئه‌مرێ مه دكه‌ت وی و پێغه‌مبه‌رێ وی رازی كه‌ین وخودا پێغه‌مبه‌رێ وی هه‌ژیترن ئه‌م رازیكه‌ین، نه خه‌لك دبێژیت: (وَاللَّهُ وَرَسُولُهُ أَحَقُّ أَن يُرْضُوهُ إِن كَانُواْ مُؤْمِنِينَ) و خودێ و پێغه‌مبه‌رێ وی ھێژاترن ئه‌و ڕازی بکه‌ن، ئه‌گه‌ر ڕاست ئه‌و ژ خودان باوەران بن، و پێغه‌مبه‌ر سلاڤێت خودێ ل سه‌ربن دبێژیت: (مَنْ أَرْضَى اللَّهَ بِسَخَطِ النَّاسِ كَفَاهُ اللَّه وَمَنْ أَسْخَطَ اللَّهَ بِرِضَا النَّاسِ وَكَلَهُ اللَّه إِلَى النَّاسِ) هه‌ر كه‌سێ خودێ ب نه‌رازیبوونا خه‌لكی رازیكه‌ت خودێ به‌سی و‌ییه و یێ خودێ ب رازیبوونا خه‌لكی نه‌رازیكه‌ت خودێ دێ وی هێلیته ب هیڤیا وانڤه، و دڤه‌گێره‌كا دیدا دبێژیت: (مَنِ الْتَمَسَ رِضَى اللَّهِ بِسَخَطِ النَّاسِ رَضِيَ الِلَّهِ عَنْهُ وَأَرْضَى النَّاسَ عَنْهُ وَمَنِ الْتَمَسَ رِضَا النَّاسِ بِسَخَطِ اللَّهِ سَخَطَ اللَّه عَلَيْهِ وَأَسْخَطَ عَلَيْهِ النَّاسَ) هه‌ركه‌سێ رازیبوونا خودێ ب نه‌رازیبوونا خه‌لكی بخوازیت خودێ دێ ژێ رازی بیت و خه‌لكی ژی دێ ژێ رازیكه‌ت و هه‌ركه‌سێ رازیبوونا خه‌لكی ب نه رازیبوونا خودێ بخوازیت خودێ دێ ژێ نه‌رازی بیت و خه‌لكی ژی دێ ژێ نه رازیكه‌ت.
