ب : موسلمان ئه‌وه خه‌ما به‌لاڤكرنا دینێ خۆ بخۆت و پشتگری و پشته‌ڤانیا دینی بكه‌ت و ب سه‌ر بێخیت، و دڤێت ئه‌م بزانین به‌لاڤكرن و پشته‌ڤانیكرن و ئیسلامخوازی و ده‌عوه بۆ دینێ خودێ سه‌رفه‌رازی و په‌رستنه، و قه‌در و عیباده‌ته، خودایێ مه‌زن ئه‌مر دکه‌ت : (وَمَنْ أَحْسَنُ قَوْلاً مِّمَّن دَعَآ إِلَى اللَّهِ وَعَمِلَ صَالِحاً وَقَالَ إِنَّنِي مِنَ الْمُسْلِمِينَ) ما ئاخفتنا کێ ژ یا وی چێتره ئه‌وێ بۆ رێکا خودێ گازی خه‌لکی بکه‌ت، و کار و کریارێت دورست دکه‌ت، و بێژیت ب راستی ئه‌ز موسلمانم. و ئه‌ڤه ژ ژن مێران دگریت بێ فه‌رق و جوداھی، و به‌لاڤكرنا دینی و بانگخوازی و ئیسلامخوازی ئه‌و رێکه یا دلێت په‌رده‌کری ڤه‌دکه‌ت و دلێت ره‌ق نه‌رم دکه‌ت، و ئه‌و رێکه یا چاڤێت تاری رۆن دکه‌ت و گوھێت گران ڤه‌دکه‌ت و خه‌لکی به‌ر ب دینێ خودێڤه دئینیت، و رێکا ھه‌می پێغه‌مبه‌رانه سلاڤێت خودێ ل سه‌ر وان بن ھه‌ر ژ ئاده‌م پێغه‌مبه‌ر بگره ھه‌تا دگه‌ھیه پێغه‌مبه‌رێ مه یێ خۆشتڤی سلاڤێت خودێ ل سه‌ربن. خودایێ مه‌زن دبێژیت: (رُّسُلاً مُّبَشّرِينَ وَمُنذِرِينَ لِئَلاَّ يَكُونَ لِلنَّاسِ عَلَى اللَّهِ حُجَّةٌ بَعْدَ الرُّسُلِ وَكَانَ اللَّهُ عَزِيزاً حَكِيماً) ئه‌و پێغه‌مبه‌ر مزگین ئین و ئاگه‌ھدارکه‌ر بوون، دا مرۆڤان پشتی ھنارتنا پێغه‌مبه‌ران چو ھێجه‌ت به‌رانبه‌ری خودێ نه‌مینن و خودێ ب خۆ ژی یێ سه‌رده‌ست و کار بنه‌جھه، و رێکا ھه‌ر که‌سه‌کێیه خۆ دویفچۆیێ پێغه‌مبه‌ری بزانیت چ ژن چ مێر و خۆ ژ وان بدانیت یێت رێکا پێغه‌مبه‌ری گرتین. خودایێ مه‌زن د قورئانا خۆ یا پیرۆزدا دبێژیته پێغه‌مبه‌رێ خۆ: (يا أَيُّهَا النَّبِيُّ إِنَّآ أَرْسَلْنَاكَ شَاهِداً وَمُبَشِّراً وَنَذِيراً وَدَاعِياً إِلَى اللَّهِ بِإِذْنِهِ وَسِرَاجاً مُّنِيراً) ھه‌ی پێغه‌مبه‌ر مه تو یێ ھنارتی دا ببیه شاھد و مزگین ئین و ئاگه‌ھدارکه‌ر و بانگھه‌لدێر بۆ دینێ خودێ، دیسا ئه‌مر دکه‌ت و دبێژیته پێغه‌مبه‌رێ خۆ: (قُلْ هَذِهِ سَبِيلِى أَدْعُو إِلَى اللَّهِ عَلَى بَصِيرَةٍ أَنَاْ وَمَنِ اتَّبَعَنِى) ھه‌ی موحه‌ممه‌د بێژه ئه‌ڤه رێکا منه کو ده‌عوه و بانگخوازیه بۆ ڤی دینی، و ئه‌ز ب زانین و به‌لگه‌یێت ئاشکرا بانگی بۆ رێکا خودێ ھه‌لددێرم ئه‌ز و ھندی دویف من که‌فتین چ ژن چ مێر بێ فه‌رق و جوداھی، له‌وا دڤێت ئه‌ڤ رێکه ھه‌ر یا به‌رده‌وام بیت ھه‌تا رۆژا قیامه‌تێ، و نابیت ب چو ره‌نگان ده‌ستان ژێ به‌رده‌ین و سستیێ تێدا بکه‌ین و ئه‌م ھه‌می ژن و مێر.
خه‌مخوارن و به‌لاڤكرن و بانگخوزیا ڤی دینی ئه‌ركه ل سه‌ر ژن و مێران بێ جوداهی، و ئه‌ڤێت دبێژن بانگخوازی و ئیسلامخوازی ل سه‌ر ژنێ نه‌واجبه و ناھێلن ژن رۆلێ خۆ ببینیت، ما ئه‌و به‌رێ خۆ ناده‌نه ده‌ستپێکا ھاتنا ئیسلامێ کا ده‌عوه به‌س د ناف زه‌لاماندا یا به‌لاڤ بوو و به‌س زه‌لام ب ده‌عوێ رادبوون؟! باشه ده‌ورێ دایکا مه موسلمانان خه‌دیجایێ خودێ ژێ رازی بیت چ بوو؟! و ده‌ورێ ئه‌سمایێ خودێ ژێ رازی بیت د مشه‌ختبوونا پێغه‌مبه‌ریدا سلاڤێت خودێ ل سه‌ربن چ بوو؟! باشه شه‌ھیدا ئێکێ د ئیسلامێدا کی بوو؟! باشه ژنێ پشکداری د مشه‌ختبوونا ئێکێ و یا دووێدا بۆ حه‌به‌شه و مه‌دینێ کر یان نه؟! باشه ده‌مێ ئه‌بو به‌کر ھاتیه ئێشاندن و ھای ژ خۆ نه‌مایی پشتی ھشیار بووی و ڤیای ده‌نگ و باسێت پێغه‌مبه‌ری سلاڤێت خودێ ل سه‌ربن بزانیت، داخوازا کێ کر زه‌لامان یان یا فاتیما کچا خه‌تابی خودێ ژێ رازی بیت ؟! باشه ئه‌گه‌رێ موسلمانبوونا عومه‌رێ کورێ خه‌تابی عیملاقێ ئیسلامێ کی بوو ژن بوو یان زه‌لام؟! باشه سۆز و په‌یمانا عه‌قه‌به یا دووێ ژن یا پشکدار بوو یان نه؟! باشه خیتابا شه‌رعی ژن و مێران وه‌کی ئێک ناگریت ده‌مێ دبێژیت؟!: (وَادْعُ إِلَى رَبِّكَ) و بۆ رێکا خودایێ خۆ گازی خه‌لکی بکه، ئه‌رێ ئه‌ڤ گازیه و ئه‌ڤ ئه‌مره بۆ زه‌لامی ب تنێیه یان ژ ھه‌ردوویان دگریت؟ یان ده‌مێ دبێژیت: (ادْعُ إِلِى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ) و ب حیکمه‌ت، ئانکو ب ئاخفتنا بنه‌جه و موکوم و ب ده‌لیل و نیشان و ب نه‌رمی و ب ئاوایه‌کێ کارلێکه‌ر و شیره‌تا قه‌نج کو پێ بزانن ته ب وان شیره‌تان خێرا وان دڤێت، و ته چو مه‌ره‌مێت دی نینن یان ژی ب قورئانێ ئه‌وا کو ئه‌و ب خۆ حیکمه‌ت و شیره‌تکاره‌کا قه‌نج، بانگھلدێره بۆ رێکا خودایێ خۆ کو ئیسلامه، ئه‌رێ ئه‌ڤه ئه‌مره ل ھه‌ردوویان دھێته‌کرن یان ل زه‌لامی تنێ ژبلی ژنێ؟! ده‌مێ دبێژیت: (وَلْتَكُن مِّنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُوْلَائِكَ هُمُ الْمُفْلِحُونَ) بلا ھوین ھه‌می ببنه مله‌ته‌ک، داخوازا قه‌نجییێ بکه‌ن و فه‌رمانا چاکیێ بکه‌ن، و خه‌لکی ژ خرابیێ بده‌نه پاش، و ھه‌ر ئه‌ڤه‌نه د سه‌رفه‌راز. و ل ڤێرێ ژی دیار دبیت که‌س نینه ئه‌ڤ بڕیاره ژێ نه‌گریت.. و که‌س نینه بێژیت ئه‌ڤ ئه‌مره ژ من ناگریت.. و که‌س نینه بێژیت ئه‌ز ژ وان نینم یێت کو دڤێن ب گازیا دینێ خودێ رابن و ھنده‌کێت دی دێ شوینا من پێ رابن، ئه‌رێ ئه‌ڤه به‌حسێ زه‌لامی ب تنێیه و که‌سه‌ک جھێ که‌سه‌کێ دی دگریت زه‌لام شوینا ژنێ؟! نه‌خێر که‌س شوینا که‌سێ ناگریت، و پێدڤیه ل سه‌ر مه ھه‌می که‌سان ـ ھه‌ر ئێک د جھێ خۆدا ژن و زه‌لامان ـ گازیا دینێ خودێ بکه‌ت، و ھه‌ر ئێک ژی پێدڤیه بزانیت ب رێکه‌کێ دڤێت ده‌عوا دینێ خۆ بکه‌ت، دیسا ده‌مێ دبێژیت: (وَتَعَاوَنُواْ عَلَى الْبرِّ وَالتَّقْوَى) و ل سه‌ر باشی و پارێزکاریا خودێ ھاریکارێت ئێک بن، ئه‌رێ ئه‌ڤه ئه‌مره یان نه؟! ژن و زه‌لامان دگریت یان نه؟! باشه بانگخوازی و ئیسلامخوازی باشیه یان خرابیه؟! باشه ھه‌که باشی بیت پا نه ئه‌رک و واجب و پێدڤیه ل سه‌ر ھه‌می که‌سان ژن و مێران ھاریکاری ھه‌ڤبن ل سه‌ر؟! دیسا ده‌مێ دبێژیت: (وَالْعَصْرِ إِنَّ الإنسَانَ لَفِى خُسْرٍ إِلاَّ الَّذِينَ ءامَنُواْ وَعَمِلُواْ الصَّالِحَاتِ وَتَوَاصَوْاْ بِالْحَقّ وَتَوَاصَوْاْ بِالصَّبْرِ) سویند ب ده‌می. ب راستی مرۆڤ ھه‌می د خوساره‌تن (به‌ر خوساره‌تن). ئه‌و نه‌بن ئه‌وێت باوه‌ری ئیناین، و کار و کریارێت قه‌نج کرین، و ھه‌ڤدوو ل سه‌ر ھه‌قیێ شیره‌ت کرین، و ھه‌ڤدوو ب بێنفره‌ھیێ شیره‌ت کرین. ھه‌لبه‌ت ل ڤێرێ ژی یا دیاره خودایێ مه‌زن سویند دخۆت کو مرۆڤ ھه‌می د خوساره‌تن ژن و مێر نه زه‌لام ب تنێ ژبلی ژنان ئه‌و نه‌بن یێت ب کارێ ده‌عوێ و گازیا دینێ خودێ رادبن و بێھنا خۆ ل سه‌ر ئه‌زیه‌ت و نه‌خۆشیان ژی دکێشن ئه‌وێت د رێکا ڤێ گازیێدا دگه‌ھنێ.
ڤێجا ھه‌که چو به‌لگه و نیشانێت دی د قورئانێدا نه‌بن سۆره‌تا عه‌سر نه‌بیت به‌سی مه‌یه ئه‌م بزانین گازیا دینێ خودێ ل سه‌ر مه ھه‌میان واجبه ژن و مێران، و دڤێت ئه‌م بکه‌ین ھه‌که مه ژن و مێران بڤێت ئه‌م ژ خوساره‌تان نه‌بین. دیسا ده‌مێ دبێژیت: (وَالْمُؤْمِنُونَ وَالْمُؤْمِنَاتِ بَعْضُهُمْ أَوْلِيَاء بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ) زەلام و ژنێت خودان باوەران ھاریکار و پشته‌ڤانێت ئێکن، فه‌رمانێ ب قه‌نجی و باشییێ دکه‌ن و ڕێکێ ل خرابییێ دگرن، ب راستی ئه‌ڤ ئایه‌ته چو ھێجه‌تان بۆ که‌سێ ناھێلیت نه ژنان، نه ئه‌و زه‌لامێت باوه‌ری ب ئه‌رکێ بانگخوازیا ژنێ نه‌یی و رێکا وێ دگرن و نه‌ھێلن ژن ب ڤی واجبێ پیرۆز رابن، واجبێ ئه‌مر ب باشیێ و دانه‌پاش ژ خرابیێ، و ل ڤێرێ نابیت ژن ھزر بکه‌ت یان زه‌لامه‌ک ھزر بکه‌ت ژن نه‌یا داخوازکریه بۆ ڤی واجبی و ئه‌رکی، به‌لکی ئه‌و ژی وه‌کی زه‌لامیه د ڤی ئه‌رکیدا، و ده‌ستپێکێ که‌سێ ئێکێ باوه‌ری ب پێغه‌مبه‌ری سلاڤێت خودێ ل سه‌ربن ئینای و پشته‌ڤانی و ھاریکاریا وی کری ژن بوو (خدیجه) دایکا مه موسلمانان.
ڤێجا نابیت ئه‌ڤرۆ ئه‌ڤ کۆما ھنده یا مه‌زن خۆ ژ جڤاکی بده‌ته پاش و بێژیت مانێ زه‌لام تنێ ده‌عوێ دکه‌ن، به‌لکی ل سه‌ر وێ ژی واجبه وه‌کی زه‌لامی : (وَالْمُؤْمِنُونَ وَالْمُؤْمِنَاتِ بَعْضُهُمْ أَوْلِيَاء بَعْضٍ) زەلام و ژنێت خودان باوەران ھاریکار و پشته‌ڤانێت ئێکن، ڤێجا یێ خۆ دیندار بدانیت ژن بیت یان مێر ھه‌که ئه‌و خۆ ژ (مؤمن و مؤمنات)ـان حسێبکه‌ن پێدڤیه بزانن ل سه‌ر وان ئه‌رکه ھاریکاریا ئێكدوو بكه‌ن و ده‌عوا دینێ خودێ بکه‌ن و خه‌ما دینێ خۆ بخون ب سه‌ر بێخن و پشته‌ڤانیێ بۆ بكه‌ن ب خۆ و ب مالداریا خۆ و ده‌ست ژێ به‌رنه‌ده‌ن و خودایێ مه‌زن دبێژیت: (انْفِرُواْ خِفَافًا وَثِقَالاً وَجَاهِدُواْ بِأَمْوَالِكُمْ وَأَنفُسِكُمْ فِى سَبِيلِ اللَّهِ ذالِكُمْ خَيْرٌ لَّكُمْ إِن كُنتُمْ تَعْلَمُونَ) و ھوین [گه‌لی خودان باوه‌ران] ب دلخوازی و دلنه‌خوازی و ب گه‌نج و پیره‌مێرڤه و ب سوار و په‌یاده‌ڤه و د خۆشی و نه‌خۆشییاندا و ب زاڕۆک و بێ زاڕۆکڤه و ب بارسڤکی و ب بارگرانیڤه و ب مال و جانێ خۆڤه، جیھادێ د ڕێکا خودێدا بکه‌ن، ئه‌ڤه بۆ ھه‌وه چێتره ئه‌گه‌ر ھوین بزانن و دئایه‌ته‌كا دیدا دبێژیت: (ياأَيُّهَا الَّذِينَ ءَامَنُواْ هَلْ أَدُلُّكمْ عَلَى تِجَارَةٍ تُنجِيكُم مِّنْ عَذَابٍ أَلِيمٍ تُؤْمِنُونَ بِاللَّهِ وَرَسُولِهِ وَتُجَاهِدُونَ فِى سَبِيلِ اللَّهِ بِأَمْوَالِكُمْ وَأَنفُسِكُمْ ذَلِكُمْ خَيْرٌ لَّكُمْ إِن كُنتُمْ تَعْلَمُونَ) گه‌لی خودان باوه‌ران، ئه‌رێ ئه‌ز بازرگانییه‌کێ نیشا ھه‌وه بده‌م، ھه‌وه ژ ئیزایه‌کا دژوار و ب ژان ڕزگار بکه‌ت، باوه‌رییێ ب خودێ و پێغه‌مبه‌رێ وی بینن، و جیھادێ ب نه‌فسا خۆ و مالێ خۆ د ڕێکا خودێدا بکه‌ن، ئه‌ڤه [باوه‌ری ئینان و جیھاد د ڕێکا خودێدا] بۆ ھه‌وه [ژ ھه‌وه و مالێ ھه‌وه] چێتره، ئه‌گه‌ر ھوین بزانن و جیهاد ب رامانا خۆ یا راست و دورستڤه ئه‌ڤه یه ئه‌م دینێ خودێ ب سه‌ر بێخین و به‌لاڤكه‌ین و ب سه‌ر هه‌می دینان بێخین، و نابیت ب چ مهان و هجه‌تان ئه‌م خۆ ژڤی ئه‌ركی ڤه‌دزین و ڤه‌كێشین و ھه‌که ھات و جانێ خۆڤه‌کێشانێ د ناف موسلماناندا به‌لاڤ بوو کو موسلمان خۆ بپارێزیت و بترسیت و خۆ ژ گوھۆڕینا دویربێخیت دا یێ ته‌نا و ب سلامه‌ت بیت، چونکی دترسیت بێژنێ ئه‌ڤه مایێ خۆ د سیاسه‌تێ دکه‌ت وی ده‌می بلا گه‌له‌ک و گه‌له‌ک ژ خۆ بترسین چونکی پێغه‌مبه‌رێ خۆشتڤی سلاڤێت خودێ ل سه‌ربن ئه‌م یێت ژ ڤی ھه‌لویستی ترساندین، ئه‌مر دکه‌ت: (إذا رأيت أمتي تهاب فلا تقول للظالم يا ظالم فقد تودع منهم) ئانکو: ھه‌که ته دیت موسلمان نه‌وێریان بێژنه سته‌مکاری: ھه‌ی سته‌مکار، ده‌ستێ خۆ ژ وان بشۆ. ژبه‌ر ھندێ سه‌حابان خودێ ژ وان رازی بیت دگۆتن: ھوین دزانن که‌له‌خ و ته‌رمێ د ناف زێندیاندا کیژکه؟! گۆتن ئه‌وه یێ ئه‌مری ب باشیێ نه‌که‌ت، و خه‌لکی ژ خرابیێ نه‌ده‌ته پاش. ئه‌رێ ئه‌ڤرۆکه چه‌ند ته‌رم ژ ڤی ره‌نگی د ناف موسلماناندا ھه‌نه، و ئه‌ڤ خه‌له‌تیه و خرابیه چه‌ند ژ وان دکه‌ڤنه د بازنێ سیاسه‌تێدا، به‌لێ ما چێ دبیت ئه‌م مایێ خۆ تێ نه‌که‌ین و پشتا خۆ بده‌ینێ چونکی ژ سیاسه‌تێ دھێته ھه‌ژمارتن؟!.
