ب : مافێت ژنێ ئه‌و ئه‌ركن یێت ل سه‌ر زه‌لامی، و دڤێت دراستا ژنێدا رابیت، و مافێت زه‌لامی ئه‌و ئه‌ركن یێت ل سه‌ر ژنێ، و دڤێت دراستا زه‌لامیدا رابیت، هوسا دیاردبیت مافێت ژنی دوان ئه‌ركاندایه یێت ل سه‌ر زه‌لامی، و مافێت زه‌لامی یێت وان ئه‌ركاندا یێت ل سه‌ر ژنێ، و دڤێت پێ راببیت، كورت و كرمانج، ئه‌ركێ ل سه‌ر زه‌لامی دبێژنێ مافێ ژنێ، و ئه‌ركێ ل سه‌ر ژنێ دبێژنێ مافێ زه‌لامی، هه‌ر چه‌نده خودایێ مه‌زن دراستا مافێت زه‌لامیدا دبێژیت (وَلِلرِّجَالِ عَلَيْهِنَّ دَرَجَةٌ) ر زه‌لامی ده‌ره‌جه‌كا زێده یا هه‌ی به‌لێ ل گه‌ل هندێ ژی زانایێت مه به‌رێ به‌حسێ مافێت ژنێ دكه‌ن و پێش یێت زه‌لامی دئێخن، ئه‌و ژی ژ به‌ر دوو ئه‌گه‌ران:
ئێك: ژن لایێ له‌وازه، و ئیسلام ب گشتی پشته‌ڤانیا لایێ له‌واز و هه‌وجه دكه‌ت؛ له‌وا پێغه‌مبه‌ر سلاڤێت خودێ ل سه‌ربن دبێژیت: (اللَّهُمَّ إِنِّى أُحَرِّجُ حَقَّ الضَّعيفينِ الْيَتِيمِ والمرْأَةِ) یا خودێ ئه‌ز گونه‌ھ ددانم، یان حه‌رام دكه‌م، حه‌قێ هه‌ردوو بێ هێز و بێ چاره‌یان بێته خوارن، سێوی و ژنێ، و دڤه‌گێره‌كا دیدا دبێژیت: (ابْغونِي في الضُّعَفَاءَ) نێزیكیێ ژ من بخوازن ب نێزیكبوونا خۆ ژ بێ چاره‌یان، و ئاشكرایه ژن یا بێ چه‌نكه، و هه‌ژییه به‌ره‌ڤانی ژێ بێته‌كرن، و مافێ وێ پێش زه‌لامی بكه‌ڤیت، و پێغه‌مبه‌ری سلاڤێت خودێ ل سه‌ر بن دڤه‌گێره‌كا دیدا ئێخسیر و دیل دانایه و دبێژیت: (أَلا واسْتَوْصوا بِالنِّساءِ خَيْراً، فَإِنَّمَا هُنَّ عَوانٍ عَنْدَكُمْ لَيْس تمْلكُونَ مِنْهُنَّ شَيْئاً غيْرَ ذلِكَ) ھشیار بن ھه‌وه ئه‌مانه‌ت ژن، و ئه‌مر و وه‌سیه‌تا من د راستا ژناندا وه‌رگرن، و خێر و شیره‌تان و باشیێ ژ خۆ بۆ ژنان بخوازن، (ئانکو نه‌فسا خۆ ل سه‌ر ھندێ راکه‌ن باشییێ و خێرێ بگه‌ھیننه ژنێ) ب راستی ئه‌و ئێخسیرن ده‌ف ھه‌وه، و ھه‌وه ژ بلی ڤێ کو خێرخواز و باشیخواز بن بۆ ژنا چێ دی (ژ قوتان و پشتدانێ) ل سه‌ر وان نینه، ژبه‌ر ڤێ چه‌ندێ مافێ ژنێ به‌ری مافێ زه‌لامی هاته ئینان.
دوو: رێز و قه‌درگرتنه بۆ ژنێ، مافێت وێ به‌ری یێت زه‌لامی بێنه ئاشكراكرن، و دیاره‌كرن، و هیڤیه ژن ڤێ بۆ خۆ بزانیت، و ل ده‌ف وێ یا ئاشكرابیت كا ئیسلامێ چه‌ند جهێ وێ بلند و به‌رز راگرتیه، و هه‌ر ژڤێ رامانێ ژی، ئه‌م ده‌ستپێكێ دێ به‌حسێ مافێ هه‌ڤژینا ژن كه‌ین به‌ری زه‌لامی.
