ب : هه‌كه زه‌لامی پتر ژ نه‌كێ هه‌بن دڤێت دادوه‌ری و عه‌داله‌تێ د ناڤبه‌را واندا بكه‌ت، و نا بیت فه‌رق و جوداهی دناڤبه‌را واندا بێته‌كرن، و دڤێت زه‌لام بزانن، بنیات د ژنئینانێدا ئێكه، نه ژ ئێكێ پتر و فره ژنیه، و خودایێ مه‌زن پتر ژ ژنه‌كێ بو زه‌لامی دورستنه‌كریه، ب مه‌رجێ خۆ نه‌بیت، و هه‌رگاڤا ئه‌و مه‌رج نه‌هاته جیھـ، هنگێ فره‌ژنی نه یا حه‌لاله، و نه یا دورسته؛ چونكی بنیات دئیسلامێدا، ئێك ژنیه، نه فره‌ژنیه، و ئه‌و مه‌رج ژی ئه‌ڤه‌یه: دادوه‌ریێ و عه‌داله‌تێ د ناڤبه‌را واندا بكه‌ت، و هه‌رگاڤا ترسیا نه‌شێت ڤی مه‌رجی ب جھـ بینیت، بۆ وی دورست نینه، ئه‌و ژنا دوویێ بینیت، خودایێ مه‌زن دبێژیت: (وَإِنْ خِفْتُمْ أَلا تُقْسِطُوا في الْيَتَامَى فَانْكِحُوا ما طَابَ لَكُمْ من النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً). و ئینانا پتر ژ ژنه‌كێ حاجه‌ته و هه‌وجه‌ییه، و نه بنیاته، هه‌كه زه‌لامی هه‌وجه‌یی هه‌بیت، و بزانیت دێ عه‌داله‌تێ دناڤبه‌را واندا كه‌ت، هنگی دورسته بۆ ئه‌و پتر ژ ئێكێ بینیت، و هه‌كه زه‌لامی دوو ژن هه‌بن دڤێت ئه‌و عه‌داله‌تێ دناڤبه‌را واندا بكه‌ت، خۆ هه‌كه ئێك ژوان یا موسلمان بیت یا دی یا فه‌له‌بیت، هه‌ر دڤێت ئه‌و دادوه‌ریێ دناڤبه‌را واندا بكه‌ت، و نابیت بێژیت ئه‌ڤه موسلمانه دێ پتر ده‌مێ خۆ ل گه‌ل وێ به‌م، و دڤێت عه‌داله‌ت دهه‌می تشتاندا بێته‌كرن، د خارنێدا و د ڤه‌خارنێدا و د جلكاندا و د خانیدا و د نڤینیدا و دهه‌می تشتاندا، تشته‌ك تنێ نه‌بیت، ئه‌وژی یا ئه‌و نه‌شێت و نه دشیانێت ویدا، و نه دبن ده‌سهه‌لاتا ویڤه ئه‌و ژی حه‌ژێكرن و ڤیانا دلییه، ڤیان تشته‌که نه د ده‌ستێ مرۆڤیدایه و که‌س نه‌شێت ڤیانا خۆ ده‌سته‌سه‌ر بکه‌ت، و کار تێدا بکه‌ت، زه‌لام نه‌یێ گونه‌ھکاره به‌لێ ھه‌که زولمێ و سته‌مێ ل ژنا خۆ یا دی نه‌که‌ت، و ما به‌ینا وان نه‌خۆش نه‌که‌ت، ھه‌که وه‌کر هنگی یێ گونه‌ھکاره، به‌لێ ڤیان و نه‌ڤیان تشته‌كه نه دده‌ستی ویدایه و ئه‌و نه‌یێ گونه‌هكاره، هه‌كه ئێك پتر یا دی بڤێت، به‌لێ دڤیت ئاشكرانه‌كه‌ت و نه‌كێشیته فه‌رق و جوداهیێ، خودایێ مه‌زن دبێژیت:(وَلَن تَسْتَطِيعُواْ أَن تَعْدِلُواْ بَيْنَ النِّسَآءِ وَلَوْ حَرَصْتُمْ فَلاَ تَمِيلُواْ كُلَّ الْمَيْلِ فَتَذَرُوهَا كَالْمُعَلَّقَةِ) چوجا ھوین نه‌شێن د ناڤبه‌را ژناندا دادوه‌رییێ بکه‌ن مه‌خسه‌د عه‌داله‌تا ڕاست و دورست و ته‌کووز و حه‌ژێكرنێدا ، خۆ ھوین د مجد ژی بن. ڤێجا ئه‌وا دلێ ھه‌وه ل سه‌ر كێم، ب ئێکجاری به‌رێ خۆ ژێ وه‌رنه‌گێڕن، ڤێجا ھوین وێ وه‌کی یا ھه‌لاویستی بھێلن نه‌یا ب زه‌لامه و نه یا بێ زه‌لامه، و پێغه‌مبه‌ری سلاڤێت خودێ ل سه‌ربن عه‌داله‌ت دناڤبه‌را هه‌ڤژینیت خۆدا دكر و دگۆت: (اللهم هذه قِسْمَتِي فِيمَا أَمْلِكُ فلا تَلُمْنِي فِيمَا تَمْلِكُ ولا أَمْلِكُ) یا خودێ ئه‌ڤه شیانا منه، ڤێجا ل من نه‌گره ل سه‌ر یا تو دشێی و ئه‌ز نه‌شێم، و نه‌وه‌وی خودێ ژێ رازی بیت د شه‌رحا موسلمیدا دبیژیت: موسلمان هه‌می ئێكن ڤیان و حژێكرنا دلی، ده‌رڤه‌ی ده‌سهه‌لاتا مرۆڤییه، خودێ لێ ناگریت؛ له‌وا پێغه‌مبه‌ری سلاڤێت خودێ ل سه‌ربن وه‌دگۆت، به‌لێ نابیت ئه‌و بۆ وان ب نیشانا یان ب ئیشاره‌تا یان ب دیاریان یان ب هه‌ر رێكه‌كێ ڤێ حه‌ژێكرنا زێده بۆ ئێك ژ وان ئاشكرابكه‌ت.
نه ژ عه‌داله‌تێیه
ئێك: نه ژ عه‌داله‌تێیه ئه‌و ب دویف دلێ خۆ كا كی ژ وان بڤێت بچیته ده‌ف، یان وێ بینیته ده‌ف خۆ.
دوو: هه‌كه ئێك ژ وان دچلكاندا بیت، یان دعادێدا بیت، و شه‌ڤا وێ بیت، نابیت ئه‌و وێ بهێلیت ب چیته ده‌ف یادی ئه‌ڤه نه ژ عه‌داله‌تییه ژبلی هه‌كه ژن ده‌ستویریێ بده‌ت. سێ: دیسا نه ژ عه‌داله‌تێیه هه‌كه ئێك ژوان یا نه‌ساخ بیت بهێلیت ب چیته ده‌ف یا دی و یا نه‌ساخ بهێلیت هه‌كه شه‌ڤا وێ بیت یان رۆژا وێ دیسا ژ بلی ژن ده‌ستویریی بده‌ت.
چار: دوه‌غه‌ر و گه‌ریاناندا نابیت ئه‌و وێ ل گه‌ل خۆ ببه‌ت یا پتر دلێ وی ل سه‌ر، دڤێت پشكێ بێخیته دناڤبه‌را واندا، كی ده‌ركه‌فت دڤێت وێ ل گه‌ل خۆ ببه‌ت، و ئه‌ڤه بوچونا جمهورێ زانایانه، هه‌رچه‌نده ئه‌بو حه‌نیفه خودێ ژێ رازی بیت دبیژیت پشكێ بێخیته دناڤبه‌را واندا موسته‌حبه‌به و باشه و نه واجب و ئه‌ركه، به‌لێ بوچونا جمهوری ب هێزتره؛ چونكی پیشایی و چاڤلێكریێ مه پێغه‌مبه‌ره سلاڤێت خودێ ل سه‌ربه‌ن ده‌مێ وه‌غه‌ره‌كێ ده‌ركه‌تبا پشك دهاڤێته دناڤبه‌را هه‌ڤژینێت خۆدا، پشكا كێ ده‌ركه‌تبا ئه‌و ل گه‌ل خۆ دبر، ژبلی ئێك ژ وان بێژیت ئه‌زا نه‌ساخم یان یا ب شولم و ئه‌ز نه‌شێم بهێم، هنگی یا دورسته یا دی ل گه‌ل خۆ بێ پشككێشان ببه‌ت.
