ب / خواندنا ڤێ دوعايێ پشتى قامه‌تێ مه‌سه‌له‌كه، وه‌كى هه‌ر مه‌سه‌له‌كا فقهى، و نه ژ دۆزێت مه‌زنه، و شه‌نگستێت ئيمان و باوه‌ريێ پێڤه نه د گرێداينه، و بابه‌ت د ناڤبه‌را دورست و دورستتردايه، و نه د ناڤبه‌را دورست و بيدعه و باتليدايه، و مه‌زنكرنا ڤێ مه‌سه‌لێ ب ڤى ره‌نگى نه يا دورسته، و ژ كێم زانينێيه، و راسته هه‌روه‌كى زانا دبێژن: زانين سێ بهۆستن يێ بهۆستا ئێكێ چۆ د ناڤدا.. خۆ مه‌زنكر، و يێ بهۆستا دووێ چۆ د ناڤدا.. خۆ شكاند، و يێ بهۆستا سيێ چۆ د ناڤدا.. زانى ئه‌و يێ كێم زانينه. ڤێجا مخابن ئه‌وێت تشتێ نه‌هه‌ژى مه‌زن دكه‌ن و موسلمانان پێڤه مژويل دكه‌ن هه‌روه‌كى وان چو دۆز و گرفت نينن، ئه‌و نه‌بيت يێت د بهۆستا ئێكێدا دژين، له‌وا شيره‌ت و دان و ستاندنێ قه‌بويل ناكه‌ن، و د ڤى واريدا چو بهاى ناده‌نه ئاخفتا زانايان.
پشتێ ڤێ رۆنكرنێ، دێ هێين حوكمێ خواندنا ڤێ دوعايێ دياره‌كه‌ين. ده‌ف ئيمامێ شافعي(خودێ ژێ رازي بيت)، و مه‌زهه‌بێ شافعي ئه‌ڤ دوعايه پشتى بانگى دهێته خواندن و پشتى قامه‌تێ ژى دهێته خواندن، و ژ تابعينان ئه‌ڤه ره‌ئيا ئيمام حه‌سه‌ن به‌سريه ژى(خودێ ژێ رازي بيت)، و ده‌ليلێ وان بۆچۆنا حه‌سه‌ن ئه‌لبه‌سريه و حه‌ديسه‌كا دورست و ب هێزه گۆتنا حه‌سه‌ن ئه‌لبه‌سرى ئه‌ڤه‌يه: ((عن أبي حَمْزَه عَنِ الْحَسَنِ قال إذا سَمِعْت الْمُۆذنَ فَقُلْ كما يقول فَإذا قال حَێ على الصَّلاَه فَقُلْ لاَ حَوْلَ وَلاَ قُوَّه إِلاَّ بِاَللَّهِ فَإژا قال قد قَامَتْ الصَّلاَه فَقُلْ اللَّهُمَّ رَبَّ هذه الدَّعْوَه التَّامَّه وَالصَّلاَه الْقَائِمَه اعط مُحَمَّدًا سُۆلَهُ يوم الْقِێامَه فَلَنْ ێقُولَهَا رَجُلٌ حين يُقِيمُ إِلاَّ أَدْخَلَهُ اللَّهُ في شَفَاعَه مُحَمَّدٍ (سلاڤێت خودێ لێ بن) يوم الْقِێامَه))، ئاشكرايه ئه‌گه‌ر قامه‌ت ئينا و گۆت قد (قامت الصلاه) بێژه: (اللهم رب .....) و حه‌ديس ئه‌ڤيه پێغه‌مبه‌رێ خودێ (سلاڤێت خودێ لێ بن) دبێژيت: ((هه‌ركه‌سێ ده‌مێ گوه ل بانگى دبيت بێژيت: يا خودێ خودانێ ڤێ گازيا ته‌كويز و بێ كێماسى و خودانێ ڤێ نڤێژا دهێته‌كرن (يان نڤێژا هه‌ر دێ مينيت) وه‌سيله‌يێ (جهێ تايبه‌ت ژ به‌حه‌شتێ) و پله‌يا تايبه‌ت بده موحه‌ممه‌دى و بگه‌هينه جهێ په‌سندكرى [ئه‌و جهێ شوكرا وى تێدا دئێته‌كرن رۆژا مه‌هده‌را مه‌زن])). و پێغه‌مبه‌رێ خودێ ب خۆ (سلاڤێت خودێ لێ بن) د حه‌ديسه‌كا سه‌حيحدا هه‌روه‌كى د موسلم و بوخاريێدا هاتى.. قامه‌تێ ب بانگ ددانيت، دبێژيت: ((بين كل أَذانَيْنِ صَلاه)) د ناڤبه‌را هه‌ر دوو بانگاندا نڤێژه‌كا هه‌ي، و هه‌مى زانا ئێكن كو مه‌خسه‌د ب دوو بانگان قامه‌ت و بانگه، و پێغه‌مبه‌رێ خودێ (سلاڤێت خودێ لێ بن) قامه‌تێ ب بانگ ددانيت. و د حه‌ديسه‌كا ديدا دبێژيت: ((هه‌ركه‌سێ ده‌مێ گوه ل بانگى دبيت، بێژيت: يا خودێ خودانێ ڤێ گازيا.... رامانا وێ ئه‌وه دورسته ئه‌ڤ دوعايه دويف قامه‌تێرا بێته خواندن، چونكى قامه‌ت ژى بانگه و به‌لگه‌يێ وان ئه‌ڤێت دبێژن: ئه‌ڤ دوعايه پشتى قامه‌تێ ناهێته خواندن چونكى پێغه‌مبه‌ر (سلاڤێت خودێ لێ بن) ڤێ دوعايێ ب بانگى تنێڤه گرێ دده‌ت، و چونكى وارد نه‌بوويه پێغه‌مبه‌رى (سلاڤێت خودێ لێ بن) دويف قامه‌تێرا خواندى. ل ڤێرێ ديار دبيت بابه‌ت بابه‌ته‌كێ فقهيه و د ناڤبه‌را راجح و مه‌رجوحيه و دورست و دورستتريه نه‌كو بيدعه و باتله، و ب به‌ر ناكه‌ڤيت ئه‌م بكه‌ينه ئه‌گه‌رێ دلمان و ڤێكراچۆنێ، يێ دلێ وى بۆ ره‌ئيا شافعيان ره‌حه‌تتر بيت بلا بخوينيت، و يێت دى گازندان ژێ نه‌كه‌ن، و يێ دلێ وى بۆ بۆچۆنا دى ره‌حه‌تتر بيت، بلا نه‌خوينيت و بلا يێت دى گازندێ ژێ نه‌كه‌ن، و ئه‌ڤه ئه‌خلاق و سنجێ زانا و موسلمانانه و خودێ چێتر دزانيت.
