ب /روكن: پارچه‌يه‌كه ژ تشتي، و تشت نه‌يێ تمامه ئه‌گه‌ر دگه‌ل نه‌بيت. و روكنێ نڤێژێ پارچه‌يه‌كه ژێ، و هه‌كه نه‌ئێته‌كرن، نڤێژ نه‌يا دورسته، چونكى پارچه‌يه‌ك ژێ هاته هێلان، وه‌كى: سوجدێ و ركووعێ.
و روكن و ستوينێت نڤيژێ ئه‌ڤێت ژێرينه:
1 ـ ئنيه‌ت: و جهێ وێ يێ دورست دله، دڤێت ئنيه‌ت بێته ئينان به‌رى ئه‌م بكه‌ڤينه د نڤێژێدا، دگه‌ل ته‌كبيرا ئيحرامێ يان كێمه‌كێ به‌رى وێ دڤێت بێته ئينان، و مه‌رج نينه ئنيه‌ت ب ئه‌زمانى بێته ئينان.
2 ـ رابوون دگه‌ل شيانێ: ئه‌گه‌ر نڤێژكه‌ر بشێت ژ پێرڤه راوه‌ستيت دڤێت ژ پێرڤه نڤێژێ بكه‌ت، به‌لێ ئه‌گه‌ر يێ نه‌ساخ بيت، و شيانا ژ پێرڤه راوه‌ستيانێ ژ نه‌ساخى يان ژ لاوازى يان ژ پيراتى يان ژ بريندارى نه‌بيت، هنگى بۆ هه‌يه روينشتى نڤێژێ بكه‌ت، ئه‌گه‌ر نه‌شيا، درێژكرى دێ كه‌ت، و ئه‌گه‌ر نه‌شيا، دێ ب وى ره‌نگى كه‌ت يێ كو بشێت و پێ چێ ببيت. به‌لێ سونه‌تان هه‌ر وه‌خته‌كێ هه‌بيت دورسته روينشتى بكه‌ت، بلا شيان ژى هه‌بن ل سه‌ر پيان راوه‌ستيت.
3 ـ ته‌كبيرا ئيحرامێ: و ب ڤى ره‌نگيه: (الله أكبر) ژبه‌ر كو پێغه‌مبه‌ر (صلى الله عليه وسلم) دبێژيت: ((كليلا نڤێژێ ده‌ستنڤێژه، و ده‌ستپێكرنا وێ ته‌كبيرا ئيحرامێيه، و ژێ ده‌ركه‌فتنا وێ سلاڤا ملانه)). و دڤێت ب ده‌نگ بێته گۆتن و ب ئنيه‌تێڤه بێته گرێدان وه‌ختێ به‌رامبه‌ر قيبلێ دراوه‌ستيت.
4 ـ خواندنا فاتحێ د هه‌مى ركاعه‌تاندا (فه‌رز و سونه‌ت) و دڤێت (بِسْمِ اللَّهِ الرَّحْمَٰنِ الرَّحِيمِ ) دگه‌ل بێته خواندن ل دويف بۆچۆنا ئيمامێ شافعى(رضي الله عنه)، ئه‌گه‌ر نه، نڤێژ دێ نه‌يا تمام بيت، چونكى (بِسْمِ اللَّهِ الرَّحْمَٰنِ الرَّحِيمِ) ئانكو: ئينانا ناڤێ خودێ ئايه‌ته‌كه ژ فاتحێ، و دڤێت فاتحه ژ پێرڤه بێته خواندن، ئه‌گه‌ر نه‌هاته تمامكرن و ما بۆ روكووعێ نڤێژ دێ نه‌يا دورست بيت.
5 ـ ركووع (داچه‌ميان): ئه‌و ژى ب ڤى ره‌نگيه، نڤێژكه‌ر دێ پشتا خۆ چه‌مينيت و له‌پێت خۆ دانيته سه‌ر چۆكێت خۆ، كو پشتا وى و سه‌رێ وى، بكه‌ڤنه راسته‌كێ، و هۆسا هند بمينيت كو كێم كێم جاره‌كێ بێژيت: (سُبْحَانَ رَبِّێ الْعَڤيمِ).
6 ـ رابووناڤه ژ ركووعێ و پشت راستكرن.
7 ـ چۆنا سوجدێ دوو جاران و د هه‌مى ركاعه‌تاندا: هه‌ر سوجده‌يه‌كێ دڤێت هه‌ردوو له‌پ و هه‌ردوو چۆك و هه‌ردوو سه‌رتلێت پيان و ئه‌نى و دفن بكڤنه عه‌ردى. و ئه‌و جهێ نڤێژێ ل سه‌ر دكه‌ت دڤێت ئه‌نيا وى بگه‌هيتێ و چو د ناڤبه‌را ئه‌نيا وى و وى جهيدا نه‌بيت، و هند بمينيته د سوجدێدا كێم كێم جاره‌كێ بێژيت: (سُبْحَانَ رَبِّێ الأعلى).
8 ـ خۆگرتن د ناڤبه‌ر ا هه‌ردوو سوجداندا و د هه‌مى ركاعه‌تاندا.
9 ـ روينشتنا دويماهيێ و خواندنا ته‌حياتێ كو ب گه‌له‌ك ره‌نگ و ريوايه‌تان ته‌حيات هاتيه ڤه‌گێران، و ريوايه‌تا ژ هه‌ميان پتر ئيمامێ شافعى(رضي الله عنه)، حه‌ژێ دكر ئه‌ڤه‌يه: (التَّحِێاتُ الْمُبَارَكَاتُ الصَّلَوَاتُ الطيِّبَاتُ لِلَّهِ السَّلامُ عَلَيْكَ أَيُّهَا النَّبِيُّ وَرَحْمَه اللَّهِ وَبَرَكَاتُهُ السَلامٌ عَلَيْنَا وَعَلَى عِبَادِ اللَّهِ الصَّالِحِينَ أَشْهَدُ أَنْ لا إِلَهَ إِلا اللَّهُ وَأَشْهَدُ أَنَّ مُحَمَّدًا رَسُولُ اللَّهِ). ئانكو: مان و مه‌زناتى هه‌مى و نڤێژ و عيباده‌ت هه‌مى (چ ب گۆتن، چ ب كريار) و ئاخفتنا جوان و كارێت چاك و راست هه‌مى بۆ خودێ بن. سلاڤا پێشكێشى پێغه‌مبه‌ران بووى و دلۆڤانى و قه‌نجى و به‌ره‌كه‌تێت خودێ يێت زێده ژى ل سه‌ر ته بن هه‌ى پێغه‌مبه‌ر و سلاڤ ل سه‌ر مه و به‌نده‌يێت خودێ يێت كێرهاتى بن. ئه‌ز شه‌هده دده‌م كو ب راستى چو په‌رستى يێت راست و دورست نينن خودێ نه‌بيت، و ئه‌ز شه‌هده دده‌م موحه‌ممه‌د ب راستى پێغه‌مبه‌رێ ويه.
10 ـ سلاڤا ملان: سلاڤا ده‌ركه‌فتنێيه ژ نڤێژێ. نڤێژكه‌ر به‌راهيێ دێ ملێ راستێ سلاڤكه‌ت پاشى يێ چه‌پێ، و ب ڤى ره‌نگى: (السَّلامُ عَلَيكُم وَرَحْمَه الله وَبَرَكَاتُهّ) يان (السَّلامُ عَلَيكُم وَرَحْمَه الله).
