ب/ هه‌لبه‌ت ئه‌گه‌ر بچيته مزگه‌فتێ و ب جه‌ماعه‌ت بكه‌ت بخێرتره، چونكى هه‌مى فه‌رز ل مزگه‌فتێ بخێرترن. هه‌ر د ڤى واريدا پێغه‌مبه‌رێ خودێ (صلى الله عليه وسلم) دبێژيت: ((گه‌لى خه‌لكى ل مالێت خۆ نڤێژێ بكه‌ن، ب راستى خێرترين نڤێژ نڤێژا مرۆڤ د مالا خۆڤه دكه‌ت يا فه‌رز نه‌بيت)). و نه‌چۆنا مزگه‌فتێ خۆزرباركرنه ژ خێره‌كا مه‌زن، پێغه‌مبه‌رێ خودێ (صلى الله عليه وسلم) دبێژيت: ((هه‌ركه‌سێ ده‌ستنڤێژێ ل مالا خۆ بشۆت، پاشى بچيته ماله‌كێ ژ مالێت خودێ دا فه‌رزه‌كێ ژ فه‌رزێت خودێ بكه‌ت، پێنگاڤێت وى ئێك گونه‌هه‌كێ ژێ دبه‌ت، و يا دى ده‌ره‌جه‌كێ بلند دكه‌ت)). و نه‌چۆنا مزگه‌فتێ هێلانا سونه‌تا پێغه‌مبه‌ريه (صلى الله عليه وسلم)، چونكى وى ل مال نڤێژ نه‌كريه، يێت سونه‌ت نه‌بن، د ڤێ راستێدا ئبن مه‌سعود(رضي الله عنه)، دبێژيت: ((هه‌ركه‌سێ پێ خۆش بيت سوبه‌هى موسلمان بگه‌هيته خودايێ مه‌زن، بلا پارێزيێ ل ڤان نڤێژان بكه‌ت هه‌ر جهێ بانگ بۆ بێته دان، و ب راستى خودێ رێكێت راسته‌رێيێ بۆ پێغه‌مبه‌رێ خۆ يێت داناين و دياركرين، و هه‌كه هه‌وه نڤێژێت خۆ ل مالێت خۆ كرن هه‌روه‌كى ڤى پاشڤه‌ماى ل مالا خۆ كرى، دێ رێكا پێغه‌مبه‌رێ خۆ هێلن، و هه‌كه هه‌وه رێكا پێغه‌مبه‌رێ خۆ هێلا، دێ سه‌ردا چن و به‌رزه بن، و مه خۆ ديت كه‌س ژ نڤێژێ نه‌ڤه‌دما دوورويه‌ك نه‌با يێ دووروياتيا وى ئاشكه‌را، و زه‌لام هه‌بوو د مابه‌ينا ملێت دوو زه‌لاماندا دئينا مزگه‌فتێ هه‌تا ل رێزا ئێكێ دراوه‌ستيا. ديسا پێغه‌مبه‌ر (صلى الله عليه وسلم) دبێژيت: ((نڤێژا مرۆڤێ ب جه‌ماعه‌ت بيست و تشته‌ك ده‌ره‌جان ژ نڤێژا وى يا دسويكا ويدا و مالا ويدا زێده‌تر و ب خێرتره، ئه‌و ژى هه‌كه ده‌ستنڤێژا خۆ شويشت و باش شويشت، و پاشى بێته مزگه‌فتێ، ژ نڤێژێ پێڤه‌تر چو يێ دى نه‌ڤێت و چو يێ دى ئه‌و نه‌ده‌رئێخستى و راكريه نڤێژ نه‌بيت، نينه ئه‌و پێنگاڤه‌كێ باڤێت هه‌كه پێ ده‌ره‌جه‌كێ بلند نه‌بيت و گونه‌هه‌ك پێ ژێ نه‌وه‌ريێت هه‌تا دچيته د مزگه‌فتێڤه، و هه‌كه چۆ د مزگه‌فتێڤه، ئه‌و يێ د نڤێژێدا هندى نڤێژ وى بهێليت، و ملياكه‌ت دوعا بۆ ئێكى ژ هه‌وه دكه‌ن هندى ئه‌و د جهێ خۆدا بيت يێ نڤێژ تێدا كرى، دبێژن: يا خودێ ره‌حمێ پێ ببه، و گونه‌هێت وى ژێ ببه، و ته‌وبه‌يێ بده سه‌ر، هندى ئه‌و ئه‌زيه‌تا كه‌سێ نه‌كه‌ت يان ده‌ستنڤێژا خۆ نه‌شكێنيت)). به‌لێ دگه‌ل ڤێ ژى نڤێژا وى يا دورسته و ب جه‌ماعه‌ت هاته هه‌ژمارتن هه‌روه‌كى ئه‌ڤه ب رۆنى د فقهێ شافعيدا هاتى، به‌لێ پا ل مزگه‌فتێ ب خێرتره و دڤێت ئه‌م ل سه‌ر خێرێ د رژد و هشيار بين، و هه‌ژيه بزانين ده‌ف ئيمام ئبن حه‌زم(رضي الله عنه)، هه‌كه گول بانگى بوو نڤێژا وى نه‌يا دورسته هه‌كه ل مزگه‌فتێ نه‌كه‌ت و خودێ چێتر دزانيت.
