ب / پتريا پترين ژ زانايان و ژ هه‌مي مه‌زهه‌بان دگه‌ل هندێنه.. نه‌دورسته ژن ئيمامه‌تيا زه‌لامى بكه‌ت؛ چونكى بۆ نه‌دورسته بانگى بده‌ت و قامه‌تێ بينيت، چاوا دێ به‌رنڤێژيێ بۆ كه‌ت، جهێ ژنێ دگه‌ل زه‌لامى رێزا پشت ويه، و هه‌كه بوو ئيمام دڤێت به‌راهيا وى بكه‌ڤيت، و ئه‌ڤه نه‌يا دورسته، ژبه‌ر ئه‌ڤا بۆرى نه‌دورسته ژن ببيته ئيمام، دگه‌ل هندێ ژى هنده زانايان ئيمامه‌تيا ژنێ دورستكريه، ژ وان: موزنى و ئه‌بو سه‌ور و ته‌به‌ري و سه‌نعانى خودانێ سوبل ئه‌لسه‌لامآ، ژبه‌ر حه‌ديسا حاكم و ئبن خوزه‌يمه و ئه‌بو داوود و به‌يهه‌قى و داره‌قوتنى ڤه‌گێراي: (عن عبد الرحمن بن خَلَّادٍ عن أُمِّ وَرَقَه بِنْتِ عبد اللَّهِ، كان رسول اللَّهِ صلى الله عليه وسلم ێزُورُهَا في بَيْتِهَا وَجَعَلَ لها مُۆذنًا يُۆذنُ لها وَأَمَرَهَا أَنْ تَۆمَّ أَهْلَ دَارهَا، قال عبد الرحمن: فَأَنَا رأيت مُۆذنَهَا شَيْخًا كَبِيرًا). سه‌نعانى دبێژيت: ئه‌ڤه به‌لگه‌يه ل سه‌ر دورستيا ئيمامه‌تيا ژنێ به‌رى خه‌لكێ مالا خۆ، خۆ هه‌كه زه‌لام ژى دگه‌ل وان هه‌بن، يا ئه‌ز ژ ڤێ حه‌ديسێ تێ دگه‌هم دورسته ژن ئيمامه‌تيا زه‌لامان ل مالا خۆ بكه‌ت، هه‌كه ئه‌و ژ هه‌ميا زاناتر بيت، و پتر قورئان ژبه‌ر بيت، و زه‌لامێت حازر د بێچاره بن، يان د نه‌زان بن، نه‌شێن ئيمامه‌تێ بكه‌ن، چونكى ئه‌ڤه ژ حه‌ديسێ دهێته زانين، ئه‌و زه‌لامێ ڤێ ژنێ به‌رنڤێژى به‌راهيێ دكر، مرۆڤه‌كێ دانعه‌مر بوو، هه‌روه‌كى د ڤه‌گێرانا ئه‌بو داووديدا ئه‌ڤه ئاشكرا يا هاتى، وه‌كى عه‌بدولره‌حمانێ كورێ خه‌لادى ڤه‌گوهێزێ حه‌ديسێ گۆتى: من موئه‌زنێ وێ ديت بوو يێ پير بوو، و ديسا د ڤه‌گێرانا ئبن خوزه‌يمه و ئه‌بو داوودا هاتيه يا قورئان خوين بوو (وكانت قد جمعت القرآن) و خودێ چێتر دزانيت.
